Qashyqtan oqyp jatqan mektep oqýshylary aıdan astam merzimde bilim oshaqtaryn, ustazdaryn saǵynysyp qalǵany belgili. Kúndelikti qashyqtan bilim alý rejimine úırene almaǵan balalar, karantın aıaqtalysymen mektepke qaraı qustaı ushatyndaı kúı keshýde.
«Biz, synybymyzdy, mektebimizdi, synyp jetekshimiz Sabına apaıymyzdy saǵyndyq», deıdi №178 mekteptiń 11 «J» synybynyń oqýshy Mahabbat Ábdijálel. Qyzynyń sózin quptaı ketken anasy Sáýle Tabaldınova fızıka-matematıka baǵdarynda bilim beretin bul mektepte oqý árbir oqýshyǵa úlken mártebe. Mekteptegi bilim berý úrdisi kóptegen bilim oshaqtaryna úlgi bolarlyqtaı, deıdi. Sonymen qatar S.Tabaldınova ustaz jaıyndaǵy júrekjardy pikirimen bólisip, oqýshylary rasymen de saǵynyp júrgen Sabına Hanasılovany balaǵa úıreteri mol ustaz dep atap ótti. «Halqymyz «Ustazy myqtynyń ustamy myqty», dep tegin aıtpasa kerek. Balalardyń boıyna úlgi-ónege daryta biletin Sabına ustaz balalardyń bolashaǵyna jol sala biledi. Ár balanyń bilimine ǵana emes, onyń uqypty kıinip júrýine, kóńil-kúıine baıyppen qaraıdy. Kóńiline kirbiń túsken oqýshysyn nazardan tys qaldyrǵan emes. О́zi de árdaıym jadyrap júretin ustaz balalardan da osyndaı kórkem minez kórgisi keledi. Balanyń ishki álemine tereńnen úńile biletin óz isiniń kásipqoıy. Árbir oqýshysyna jiger berip, alǵa umtylýǵa ıtermeleıdi. Meıirimdi ustazdyń mereıli isterine ata-analardyń da alǵystan basqa aıtary joq», dep atap ótti.
Iá, ustaz bolý ekiniń biriniń qolynan kelmeıtin kıeli kásip. «Ustazdyq – ulyq emes, uly qyzmet» dep, batyr babamyz Baýyrjan Momyshuly aıtqandaı, ol adam balasynyń janyn nurlandyratyn, shákirtiniń boıyna bilim nárin sebetin, jaýapkershiligi joǵary mindet. Ustazdyqtyń taǵylymy tereńde deıtin bolsaq, shyn ustaz bolý úshin tabıǵı daryn, izdenis pen qajymas qaırat kerek. Al ol úshin muǵalimniń mártebesi bıik bolǵany abzal. Osy tusta Muhtar Áýezovtyń «Ustaz bolý óz ýaqytyńdy aıamaı, ózgeniń baqytyn aıalaý» degeni eske oralady. Endeshe karantın rejimi tez aıaqtalyp, mektebi men ustazyn saǵynǵan balalar synybyna tezirek oralsyn deımiz.
ALMATY