Almaty qalasy Alataý aýdanyndaǵy matematıka-fızıka baǵytyndaǵy №178 lıseıde robottehnıka úıirmesine qatysatyn balalardyń sany artyp keledi. Jaqynda kishkentaı ónertapqyshtar Aıtóre Hamzahan, Nuralı Toqbergenov ustazdary Begaly Ahmetovtyń jetekshiligimen basqarý quraly arqyly qozǵalatyn robotty besik qurastyrdy.
ergen ónertapqysh jetkinshekter sábıdiń daýysy shyqqan sátte onyń birden qozǵalýyn basshylyqqa alǵan. Besikke ornatylǵan dıktofonǵa anasy óz daýysymen besik jyryn jaza alady. Besik dybyssyz terbeledi. Basqarǵyshpen qashyqtan terbetýge ári temperatýrasyn ekran arqyly qadaǵalaýǵa bolatyn besiktegi kez kelgen qolaısyzdyqta eskertý dybysy beriledi.
Lıseı dırektorynyń oqý isi jónindegi orynbasary Kúljan Shajabaeva robotty tehnıka úıirmesine qatysatyn oqýshylar jyl saıyn modeldeý túrlerinen aýdandyq, qalalyq, halyqaralyq, respýblıkalyq jarystar men olımpıadalarda baqtaryn synap, júldeli oryndarǵa ıe bolyp júrgenin jetkizdi. Robotty tehnıka zerthanasynyń mindeti oqýshylardyń jańashyl tehnıkalyq bilim alýǵa degen qushtarlyǵyn damytý bolsa, olardy zamanaýı kásipke baýlýda robotty tehnıka úıirmesiniń oqytýshylary Dastan Rahatov, Begaly Ahmetovtyń eńbekteri zor. Bir robotty qurastyrý men baǵdarlama jazyp shyǵýǵa ketetin ýaqyt mólsheri onyń kúrdeliligi boıynsha anyqtalady. Munda maqsatqa jetý mańyzdy. Jańadan kelýshilerdi jetekshileri ǵana emes, sondaı-aq joǵary synyp oqýshylary da baýlıdy. Bitirýshi synyp oqýshylary izbasarlaryna aldymen robot qurastyrýdy, baǵdarlamalaýdy úıretedi.
Lıseı oqýshylary aldaǵy ýaqytta robotty tehnıka úıirmesinde radıo júıesi arqyly basqarylatyn, adamdardyń dene qyzýyn ólsheıtin jáne zalalsyzdandyrýda qoldanatyn robot oılap shyǵarýdy josparlap otyr. Qazirgi kezde mekteptegi úıirme jumystaryna qatysatyn 5-10-synyptyń belsendi oqýshylary baǵdarlamalardy qashyqtan júıeleý jumystaryn jetildirý ústinde.
ALMATY