Mahal ata úshin nemere-shóbereleriniń qarashańyraqqa kelgeni eń merekeli de qýanyshty kún, qundy syılyq. Ul-qyzdary otbasymen birge ákeniń hal-jaǵdaıyn surap jıi kelýge tyrysady, árıne. Uly Jeńis kúni Mahal Polatbekovtiń 13 perzentinen taraǵan 56 nemere, 105 shóberesi Ekinshi dúnıejúzilik soǵys ardagerin merekesimen quttyqtaý úshin qarashańyraqqa asyǵady. Keıde barlyǵy túgel jınalady, endi birde múmkindigi bolmaǵan bir-ekeýiniń orny bilinip turady. Qalaı bolǵanda da Jeńis kúni Mahal ata úshin erekshe qýanysh syılap, qýat beretin aıtýly mereke.
Soǵys ardageri, Ordabasy aýdanynyń turǵyny Mahal Polatbekov atamyzdy biz de aldaǵy merekesimen quttyqtap qaıtqan edik. Qan maıdandaǵy erlikteri úshin, beıbit ómirdegi eńbegi baǵalanyp berilgen orden-medaldaryn syńǵyrlata, qımyly shıraq qarııa kenje ulymen bizdi qarsy aldy. Mereke jaqyndaǵan saıyn kelýshilerdiń de jıileıtini anyq. Kópti kórgen qarııanyń kórgendi kelini baýyrsaǵyn pisirip, dastarqan jaıyp qoıypty. Toqsannyń altaýyna kelgen ata áli de tyń. Shaı iship otyryp, eldegi jaǵdaıdy kóbirek surady, urpaǵynyń da, eldiń de amandyǵyna alańdaıtynyn ańǵartty. Jańalyqtardy qalt jibermeıtin Mahal ata búginde tek qulaǵynyń aýyrlaǵanyna ǵana ókpe aıtady. Al kúndelikti kelip turatyn gazetterdiń birin jibermeı jáne kózildirik taqpaı oqıdy eken. Qolymyzdaǵy keseni baqylap, shaıymyzdyń taýsylmaýyn qadaǵalap ta otyrdy. Maıdanda kórgen qıyndyqtary týraly aıtqandy asa unata bermeıtin ardager soǵys múldem bolmasyn dep tileıdi. Surapyl soǵysty eske alýdy aýyrsynatyn Mahal atanyń qabaǵyna qaıǵy, kóńiline muń uıalatatyn taǵy bir jaıt, jarynyń dúnıeden ozǵany. Odan beri de 30 jyldan asypty, degenmen ul-qyzdarynan bólek nemere-shóbereleriniń ystyq yqylasy men syı-qurmeti kóńilge demeý. Al úıdegi kenje balasy Muhtar men nemereleri atany áńgimege kóbirek tartyp, ásirese nemereleri týǵan jer tarıhyn kóbirek bilgisi keledi eken. Iá, ol zańdy da. Barlyq nemere-shóberelerin jaqsy kórip, erkeletetin qarııa janynda jıi bolatyn Asanbaı men Saqypjamaldy jaqyn tutady. Az-kem áńgimeden, qarııanyń estelikterinen túıgenimizdi qysqasha baıandap ótelik.
Mahal Polatbekov 1924 jyly 1 mamyrda dúnıege kelgen. Áke-sheshesinen erte aıyrylyp, týystarynyń qolynda ósken ol 1932-1936 jyldary asharshylyqtyń saldarynan Tashkentke qonys aýdarýǵa májbúr bolǵan. «Soǵys bastalǵanda 17 jastamyn. Tashkentte 1942 jyly áskerge shaqyrylǵan 20 jigittiń qatarynda men de barmyn. Sol kúni kolhozdyń tóraǵasy kelip: «Senderdi keıinge qaldyratyn boldyq. Voenkomatpen de kelisip qoıdym. Er-azamat isteıtin jumys kóp, bir aı boıy bıdaı orýǵa kómektesesińder», dedi. Bıdaı orýdyń ornyna soǵysqa barǵandy jón kórdim. Voenkomatqa ózim baryp, maıdanǵa jiberýin ótindim. Aqyry 18 orys, bir evreı jáne jalǵyz qazaq bolyp maıdanǵa attandyq. Qoryqpaı barǵanymnyń ózi erlik boldy. Soǵysqa eldi, jerdi aman saqtap qalamyn dep bardym», deıdi qarııa. Osylaısha maıdanǵa attanǵan jas jigit Ýlıanov oblysyna kishi komandırler daıarlaıtyn 6 aılyq kýrsqa joldanǵan. Kýrsty úzdik bitirip, serjant shenin ıelengen. Smolensk, Mınsk, Vıtebsk qalalaryn azat etýge qatysqan. «Biraz ýaqyt batalon komandıriniń adıýtanty da boldym. О́zimizdiń elden, kórshiles О́zbekstannan, Túrikmenstannan, Qyrǵyzstannan jigitter keldi. Ol zamanda eshqaısysy orys tilin bilmeıdi, túsinbeıdi. Meni komandır adıýtant retinde jigitterge til úıretip, soǵysqa daıarlyǵyn pysyqtaý úshin jiberdi. Iá, qanshama jyldar ótse de ol kúnder, qan maıdandaǵy jankeshti erlikter, qyrshyn ketken jaýyngerler beınesi kómeskilene túskenimen esten shyǵa qoıǵan joq. Qaısybirin aıtaıyn, elge aman oralǵanymyzǵa táýbe ettik. Surapyl jyldar eseıtti, shynyqtyrdy, ómirge kózqarasymyzdy ózgertti. Elge kelgen soń aýylsharýashylyq jumystaryn istep, partııanyń hatshysy sekildi biraz qyzmetterdi atqardyq. Jeńiske 75 jyl tolsa, men sonyń 70 jylyn aıanbaı, aýyl sharýashylyǵyna arnadym», deıdi Mahal ata.
Qazirgi Qyzyljar aýylynyń negizin qalaýǵa maıdannan oralǵan Mahal Polatbekov bastamashyl bolyp, úlken úles qosqan eken. Ár jerde 5-6 úıden shashyrap ornalasqan otbasylardyń basy qosylyp, irgeli aýyl qurylady, ortalyqtyń qarsylyǵyna qaramastan, 30 jyldan asa osyndaǵy ujymdy basqaryp, sharýashylyqty kótergen. Aýyl turǵyndaryn uıymdastyryp, mektep, klýbtyń ǵımaratyn ózderi turǵyzyp alypty. Surapyl soǵystan elge oralǵan soń, Mahal Polatbekov Tashkent oblysy, Lenın aýdanynda №109 mektepte áskerı jetekshi, dırektordyń orynbasary boldy. Odan keıin qazirgi Túrkistan oblysy Ordabasy aýdany, «Qyzyljar» ujymsharynda basqarma tóraǵasynyń orynbasary ári partııa uıymynyń hatshysy, Lenın atyndaǵy ujymsharda basqarma tóraǵasynyń orynbasary, keıinnen tóraǵasy boldy. Tórtkúl bólimshesin, sondaı-aq Q.Sypataev atyndaǵy maqta keńshary qurylǵanda №2 bólimsheni basqardy. Sol kezderi bólimshe 2,5 myń gektar maqta alqabyn ósirip «aq altyn» óndirisinde oblys, respýblıka boıynsha aldyńǵy orynǵa shyqqan eken. Halqymyzdyń taý tulǵasy, qoǵam jáne memleket qaıratkeri Dinmuhamed Qonaev osy óńirge kelgende Mahal atanyń shańyraǵynan dám tatyp, pikirlesken. Sol tarıhı oqıǵanyń árbir sáti jasy 96-ǵa kelgen ardagerdiń jadynda jattalyp qalǵan. El basqarǵan asyl azamattyń erekshe bolmysyn, kishipeıildigi men qarapaıymdylyǵyn aıtyp, jıi eske alyp otyrady.
Mahal Polatbekovtiń eńbegi men erligi baǵalanyp, kóptegen marapat ıesi atanǵan. Ár jyldary «Lenın», Eńbek Qyzyl Tý, Qurmet belgisi, Parasat ordenderimen, «Eńbektegi erligi úshin», «Eren eńbegi úshin», KSRO Halyq sharýashylyǵy jetistikteri kórmesiniń altyn, eki kúmis, qola medaldarymen, «Astanaǵa 10 jyl» jáne Ekinshi dúnıejúzilik soǵystaǵy Jeńistiń birneshe merekelik medaldary qarııanyń azamattyǵynyń, patrıottyǵy men eńbekqorlyǵynyń, elge degen minsiz qyzmetiniń belgisi ispetti. Sondaı-aq ol 1994 jylǵy tamyzda aýdandyq máslıhattyń sheshimimen «Ordabasy aýdanynyń qurmetti azamaty» atanǵan. «Árbir nagradanyń ózindik orny, esteligi bar, bári men úshin qymbat ári baǵaly. О́sip-óngen urpaǵym bar, táýbe, táýelsiz elim bar men baqyttymyn, qaraǵym. Baqytty tek eńbekten izdeý kerek. Sony umytpańdar!», dedi qarııa bizben qoshtasarda.
Túrkistan oblysy