Reseımen shekaralas aımaqta qazaqstandyq shekarashylar jylqylardy zańsyz aıdap ótýdiń jolyn kesti, dep habarlady QR UQK ShQ-nyń baspasóz qyzmeti.
Reseımen shekaralas aımaqta qazaqstandyq shekarashylar jylqylardy zańsyz aıdap ótýdiń jolyn kesti, dep habarlady QR UQK ShQ-nyń baspasóz qyzmeti.
Budan bir kún buryn shekara otrıadyna Reseı Federasııasyndaǵy áriptesterden 100 bas jylqynyń urlanǵandyǵy týraly aqparat kelip túsken-di. Naqtyraq aıtqanda, memlekettik shekaradan 40 shaqyrym jerde ornalasqan Novopeschanoe (RF) eldi mekeni mańynda belgisiz adamdar baqtashylardyń qol-aıaǵyn baılap, boı tasalaǵandyǵy belgili bolatyn.
Aldyn-ala derekter boıynsha, jylqy urlaýshylardyń maqsaty iri qarany Qazaqstan Respýblıkasynyń aýmaǵyna aıdap ótý bolǵan.
Qazaqstan men Reseı shekara vedomstvolary arasyndaǵy ózara yntymaqtastyq kelisimi negizinde oqıǵa bolǵan aýmaqqa Pavlodar shekara otrıadynyń «Jetisý», «Arlan» zastavalarynyń úsh birdeı shekara narıady jiberildi.
Izdestirý sharalary barysynda tosqaýyldar qoıylyp, Ekaterınoslavka, Galıskoe, Sosnovka sekildi eldi mekenderde qazaqstandyq shekarashylar qyzmettik ıtterdiń kómegimen jumys istedi.
Kóp uzamaı nátıjesi de kórindi – 80-ge jýyq jylqy memlekettik shekaradan 50-60 shaqyrym jerdegi Sosnovka (Qazaqstan) eldimekeniniń mańaıynan tabyldy, olardy quramynda «Jetisý» shekara zastavasynyń bastyǵy aǵa leıtenant Azamat Saıranbaev, aǵa tehnık Amankeldi Naımanov, efreıtor Jánibek Syzdyqovtan quralǵan top anyqtady.
Qazirgi ýaqytta, jylqylardy zańdy ıelerine qaıtarý maqsatynda reseılik áriptestermen kezdesý sharasyn ótkizý josparlanýda.