Memleket basshysy Qasym-Jomart Toqaev «Egemen Qazaqstan» gazetine bergen suhbatynda kúrdeli tótenshe jaǵdaı kezeńinde túıgen oıyn aıtyp berdi.
«Tótenshe jaǵdaı kúndelikti ómirimizge eleýli ózgeris engizdi. Josparlanǵan jumystardy, túrli is-sharalardy keıinge qaldyrýǵa májbúr boldyq. Osyndaı kezde, eń aldymen, ne nárseniń asa baǵaly ekenin túsindik. Bul – adamnyń ómiri, adamı qarym-qatynastar, azamattardyń densaýlyǵy, qoǵamnyń bereke-birligi. Bir-birimizge qoldaý kórsetýdiń qanshalyqty mańyzdy ekenin de ańǵardyq. Qalǵan dúnıeniń bárin birtindep retke keltirýge bolady. Pandemııa kezinde búkil qoǵamymyz synǵa tústi. Kóptegen azamattar qıyn sátte elge qyzmet etýdiń ozyq úlgisin tanytty. Bul – parasatty patrıotızmniń kórinisi. Kez kelgen kúrdeli kezeń adamnyń jigerin janyp, rýhyn qaıraıdy. Álemge jaıylǵan indet tusyndaǵy ahýal halqymyzdy odan ári uıystyra túsetini anyq»,- dedi Qasym-Jomart Toqaev.
Osy rette, el Prezıdenti uly Abaıdyń «Toqtaýlylyq, qalypty shydamdylyq – bul qaırattan shyǵady, bilseń kerek» degen óleń joly oıǵa oralatynyn aıtty.
«Shyn máninde, tabandylyq pen tózimdilik tanytsaq, qıyndyqqa tótep beremiz. Elimiz bul qıyndyqtan shırap ári shyńdalyp shyǵady dep tolyq senimmen aıta alamyn. Barlyq qıyndyqty birge jeńemiz!» dep qorytyndylady Memleket basshysy.