«Egemen Qazaqstan» gazetiniń bıylǵy 17 naýryzdaǵy sanynda jaryq kórgen «Halyq sanyn qandastar kóshiniń esebinen kóbeıte alamyz ba?» atty maqala óte ózekti máseleni qozǵapty. Kólemdi maqalada qandastardyń máselesi jan-jaqty tereń taldanyp, júıeli usynystar jasalǵan.
Shynynda halyq sanyn qandastar kóshiniń esebinen kóbeıte alamyz ba? Qazirdiń ózinde bir mıllıondaı qandasymyz alpaýyt Reseı halyqtarynyń arasyna iz-túzsiz sińip ketedi degen qaýip bar. Olardyń aıtýyna qaraǵanda, orystaný qaýpi bar jáne qandastarymyz ártúrli qyspaq ta kóredi eken. Al Reseı basshylyǵy basqa elderdegi orystardy óz jerine úlken jeńildiktermen kóshirip alýǵa belsene kiriskeni belgili. Árıne, shetelden kelgen qandastarymyzdy eń aldymen baspana máselesi alańdatady. Bul jaǵdaıda eki jaqqa da utymdy joly: Qazaqstan jáne Reseı turǵyndary arasynda jeke úı ne páterler aıyrbastaý ınternettik bazasyn qurý durys bolar edi. Sonda is alǵa basatyny sózsiz. Ol úshin eki el arasynda kelisimshart jasalýy tıis. Taǵy bir aıta keter jaıt, qandastardyń basym kópshiligi ońtústik óńirlerge kóship kelýde. Bul árıne, túsinikti, biraq qandastarymyzdy soltústik aımaqtarǵa ornyqtyrýǵa da zor kóńil bólinýi qajet. Bul máselede shaǵyn qalalardyń múmkindikterin tıimdi paıdalaný qajet. Ondaı qalashyqtar sany elimizde az emes. Sondaı-aq soltústik oblystarda qanshama aýyldar bos qalǵan.
Taǵy bir oı. Soltústik oblystarda qandastarymyz ýaqytsha turatyn jataqhanalar salý isi qolǵa alynsa. Jataqhanalar eshqashan artyq bolmaıdy. Jalpy alǵanda qandastardyń hal-ahýalyn qadaǵalaý, muń-muqtajyna kóńil aýdarý, kómek kórsetý tek Úkimettiń ǵana emes, barshamyzdyń mindetimiz.
Naqypbek SÁDÝAQASOV,
zańger