Mamyr aıynyń bastapqy kúnderinde Elektrondyq eńbek bırjasynda elimizdiń barlyq aımaqtaryndaǵy jumys berýshilerden 125,4 myń bos jumys orny jáne 75 myńnan astam túıindeme ornalastyrylǵan.
Bul rette mamandar jumys izdeýshilerdiń túıindemesiniń eki ese az, ıaǵnı 75,7 myńdy quraıtyndyǵyn aıtady.
«Eńbek resýrstaryn damytý ortalyǵy» AQ sarapshylarynyń aıtýynsha, bos jumys oryndary men túıindemeler sanynyń kúrt tómendeýi naýryz aıynda tirkelgen. Máselen, bos oryndar sany 2019 jyldyń sońynda 68,9 myńnan 2020 jyldyń naýryz aıynda 34,2 myńǵa deıin azaıdy. Túıindeme sany aǵymdaǵy jyldyń aqpan aıynda 29 myń bolsa, naýryz aıynda 20,1 myńǵa deıin tómendegen.
«Bos jumys oryndary men túıindemelerdiń kúrt tómendeýi elde engizilgen tótenshe jaǵdaı rejımimen tikeleı baılanysty. Alaıda, karantındik shekteýler alynyp, naryqqa jan bitip, kásiporyndar jumysyn qaıta bastady jáne olar kadrlarǵa muqtaj», - dep túsindirdi «Eńbek resýrstaryn damytý ortalyǵy» AQ vıse-prezıdenti Baljan Shamenova.
Túıindemeler sany boıynsha suranysqa ıe kásiptiń birinshi úshtigine 2,6 myń - avtokólik júrgizýshisi, 2,3 myń – medısına (medbıke) qyzmetkerleri jáne 2,2 myń – zańger kirdi. Alaıda, jumys berýshiler úshin qajet mamandardyń úshtigine - patrýldeý ınspektory, kúzetshi jáne medısınalyq qyzmetkerler endi. Eń az suranysqa ıe mamandyqtar (túıindemeler men bos oryndar araqatynasy boıynsha) - zańger, is júrgizýshi jáne dene shynyqtyrý muǵalimi.
Jalpy, jumys berýshiler tarapyna eń úlken suranysqa ıe mamandar: kásibı mamandar - 36,6 myń, qyzmet kórsetý jáne satý salasynyń qyzmetkeri – 21,2 myń, qurylys, kólik jáne basqa da uqsas sala jumysshylary – 19,5 myń bos jumys orny bar.
О́ńirler boıynsha 2020 jyldyń I toqsanynyń qorytyndysy boıynsha eń kóp bos jumys oryndary Qostanaı oblysynda – 17,7 myń. Ekinshi orynda Nur-Sultan – 15,8 myń, úshinshi Qaraǵandy oblysy – 10,9 myń. Tórtinshi orynda Almaty – 10,6 myń bos jumys ornyn usynǵan.
Eń az bos oryndar sany Mańǵystaý oblysynda – 3,1 myń, Qyzylorda jáne Soltústik Qazaqstan oblystarynda – árqaısysynda 3,6 myń bos oryndar.
Birqatar oblystarda jumys izdeýshiler sany usynylǵan bos jumys oryndarynan artyq. Mysaly, Túrkistan oblysynda jumys izdeýshilerdiń sany – 8,9 myń, Mańǵystaý oblysynda – 6,9 myń, Qyzylorda oblysynda – 6,5 myń túıindeme ornalastyryldy. Bul óńirlerde jumysqa suranys usynystan asyp túsedi. Mańǵystaý oblysynda 100 bos orynǵa 219 rezıýme, Qyzylorda oblysynda – 182 rezıýme, Túrkistan qalasynda – 112 rezıýme, Almaty oblysynda – 105 rezıýme. Al, keıbir oblystarda kerisinshe bos jumys oryndary jeterlik, biraq jumys izdeýshilerdiń sany az. Qostanaı oblysynda 100 bos orynǵa 16 rezıýme, Nur-Sultanda – 26 rezıýme, Almaty – 27 rezıýme.
Jumyspen qamtýdyń jol kartasy (JJK) jáne túrli memlekettik baǵdarlamalar aıasynda bıylǵy jyly jumyspen shamamen 1 mln 220 myń adamdy qamtý josparlanýda. Jol kartasy aıasynda 2020 jyly 1265 jobany iske asyrý bastaldy, onda 17 myń jumys orny quryldy, 10,3 myń adam jumysqa ornalastyryldy.
Jalpy, Jumyspen qamtý jol kartasy aıasynda 255 myń jumys ornyn ashý josparlanýda. Sonymen qatar, Jol kartasy jobalary bolashaqta 100 myńnan astam turaqty jumys ornyn ashýǵa negiz bolady.
Jumyspen qamtý jol kartasy ınfraqurylymdyq jobalary 4 negizgi baǵyt boıynsha iske asyrylady:
-áleýmettik-mádenı nysandardy kúrdeli jáne aǵymdaǵy jóndeý, qaıta qurý jáne salý (2 703 joba);
-turǵyn úı-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý (1 039 joba);
-kúrdeli, ortasha jáne aǵymdaǵy jóndeý, qaıta jańartý, ınjenerlik-kóliktik ınfraqurylym qurylysy (1 799 joba);
- eldi mekenderdi abattandyrý (965 joba).