Jetimder men olardy asyrap alýshylarǵa, tárbıeleýshilerge belgilengen zań aıasynda kómek qoldaryn sozyp, qamqorshy bolýdyń saýapty amaldarǵa jatatynyn jete sezingen Atyraý oblysynyń sottary ujymdary respýblıkalyq «Qýan,sábı!» aksııasyna belsene qatysýda.
Sondaı sharanyń biri Qazaqstan sýdıalar odaǵy Atyraý fılalynyń tikeleı qoldaýymen uıymdastyryldy. Ol oblystyq densaýlyq saqtaý departamentiniń «Ortalyq nerv júıesi zaqymdalǵan balalar úshin arnaýly sábıler úıinde» órken jaıdy.
-Biz oblys sottarynyń sýdıalary men sot qyzmetkerlerine, oblystyq sot basshylyǵyna dán rızamyz, -dep bastady óz sózin sábıler úıiniń bas dárigeri Gúlmıra Rysmaǵanbetova. - Jaryq dúnıeniń esigin ashar-ashpastan jetimdik pen joqshylyqtyń, túrli aýrýlar men turmys taýqymetin tartyp, sońynan kelip bizden pana tapqan barsha búldirshinderimizdiń atynan sizderge shyn júrekten rızashylyqtarymyzdy bildiremiz. Qandaı mereke bolmasyn, bizderdi umytpaısyzdar. Eńbekterińiz jemisti, árbir araılap atqan aq tań shýaqty bolsyn.
Oblystyq sotynyń azamattyq jáne ákimshilik ister jónindegi apellıasııalyq sot alqasynyń tóraǵasy Ádilhady Shyǵambaev: «Jetim jáne ata-analarynyń qamqorlyǵynsyz qalǵan beıkúná sábılerdi alaqandaryńyzǵa salyp aıalap, júrek jylýymen olardyń erteńgi kúnge degen úmitterin óshirmeı otyrǵan sizderge aıtar alǵysymyz sheksiz. Jetim kórsek jebeı júrý - urpaqtan- urpaqqa jalǵasyp kele jatqan ultymyzdyń eń jaqsy ımanı qasıeti. Bizderdiń búgingi sharamyz bir kúndik emes. Turaqty túrde kelip, qoldan kelgen kómegimizdi, jaqsylyǵymyzdy aıamaıtyn bolamyz»,- dedi.
Munan keıin Qazaqstan sýdıalar odaǵy Atyraý fılalynyń tóraǵasy Bazarǵalı Qadirǵalıev sábıler úıi ujymyna sońǵy úlgimen óndiriske shyǵarylǵan túrli-tústi televızor, kilemder, jemis-jıdekter men táttilerdi tartý etti.
Osy sharaǵa arnaıy shaqyrylǵan, oblysymyzda jas urpaqty ımandylyqqa tárbıeleýge súbeli úles qosyp júrgen ardaqty ana Dildá qajy Mataıqyzy sábıler úıiniń tárbıelenýshileri men tárbıeshilerine, sot ujymyna júrekjardy alǵysyn aıtyp, aq batasyn berdi.
Boranbaı Ǵalıev,
Atyraý oblystyq sotynyń baspasóz hatshysy.
Sýretti túsirgenavtor.