Burnaǵy kúni Almaty qalasy Almaly aýdandyq soty byltyrǵy jylǵy tamyz aıynda Ile Alataýy ulttyq tabıǵı saıabaǵy aýmaǵynda jasalǵan jappaı kisi ólimine basty kúdikti sanalyp otyrǵan Saıan Qaıyrovtyń ústinen sot prosesin bastady.
Burnaǵy kúni Almaty qalasy Almaly aýdandyq soty byltyrǵy jylǵy tamyz aıynda Ile Alataýy ulttyq tabıǵı saıabaǵy aýmaǵynda jasalǵan jappaı kisi ólimine basty kúdikti sanalyp otyrǵan Saıan Qaıyrovtyń ústinen sot prosesin bastady.
Sotta aldymen ulttyq saıabaqtaǵy 12 adamnyń ólimine baılanysty aldyn ala jabyq rejimdegi tyńdaý bolyp ótti. Advokat Jandos Bulhaıyrdyń sózine qaraǵanda, onyń qorǵaýyndaǵy azamatqa shekarany zańsyz kesip ótip, terrorlyq uıymnyń jumysyna jáne Ile Alataýy ulttyq saıabaǵyndaǵy qandy qyrǵynǵa qatysqan, degen aıyp taǵylyp otyrǵan kórinedi. Qorǵaýshy sondaı-aq, oǵan kisi óltirdi degen naqtyly aıyp taǵyla qoımaǵanyn aıtady. Sebebi, ol qandy qasap jasalyp jatqan kezde Qyrǵyzstanda bolǵan sııaqty.
Aıyptalýshy Saıan Qaıyrovtyń zaıyby Shynar Bısenbaeva da osylaı deıdi. Ol kúıeýiniń bul oqıǵadan bir aı buryn Qyrǵyzstan jaqqa saparlap ketkenin jetkizdi. Ol sondaı-aq, óziniń sol ýaqyttary sodyrlar ulttyq parkke qurǵan lagerde bolǵanyn da joqqa shyǵarmaıdy. Aıtýy boıynsha, munda odan basqa taǵy birneshe áıel men balalar bolǵan. Keıin ormanshy men onyń jaqyndary tap osy lagerdiń ústinen túsedi. Olar sol úshin de óltirilgen bolyp shyqty.
Osy tusta bir aıta ketetin jaıt, sodyrlar qyrǵynnan soń ózderimen birge 10 jasar Islam degen balany ala ketedi. Al Baǵanashyl aýyly tusynda bolǵan arnaıy operasııanyń kezinde bul balaqaı qaza tabady. Joǵaryda atalǵan Shynar Bısenbaeva kúıeýi Saıan qamaýǵa alynǵannan keıin onyń óz uly ekenin aıtyp júrgen kórinedi. Munyń qanshalyqty ras-ótirik ekeni ázirge anyqtalǵan joq. Sebebi, jýrnalısterdiń tikeleı qoıǵan suraqtaryna áıel jaýap berýden bas tartyp otyr.
Eske sala keteıik, bul qaıǵyly oqıǵa 2012 jylǵy 13 tamyz kúni Almatyǵa taıaý mańdaǵy Aqsaı shatqalynda oryn aldy. Osy jerde qylmyskerler 12 adamdy baýyzdap óltirdi. Olardyń arasynda óziniń brakonerlerge ymyrasyzdyǵymen erekshe kózge túsip kelgen eger Panaıot Zaharopýlo, onyń áıeli men qyzmettes dostary bolǵan. Al ormanshynyń uly Igor aıaq astynan joq bolyp ketken. Onyń keıingi taǵdyry jóninde áli kúnge deıin naqty derek joq.
Quqyq qorǵaý organdarynyń málimetteri boıynsha, Batys Qazaqstan oblysynyń Qaztalov aýdanyndaǵy Bostandyq aýylynyń týmasy bolyp tabylatyn 1975 jylǵy Saıan Qaıyrov – uıymdasqan qylmyskerler toby men Ile Alataýy saıabaǵynda bolǵan qandy qyrǵyn týraly jan-jaqty aıtyp bere alatyn birden-bir adam. Ol Qazaqstandaǵy radıkaldy dinı aǵymnyń belsendi múshesi bolyp tabylady. Saıabaqtaǵy oqıǵadan keıin oǵan birden izdeý jarııalanǵan. Ulttyq qaýipsizdik qyzmetkerleri S.Qaıyrovty bıylǵy 16 mamyrda Qyrǵyzstannyń Shý oblysynda páter jaldap jatqan jerinde qolǵa túsirdi. Ustalǵan kezinde onyń qaltasynan Qazaqstan azamattyǵyn bildiretin qujattan bólek, Qyrǵyzstannyń eki pasporty shyqqan. Osy is boıynsha ekinshi bir kúdikti adam – Jambyl oblysyndaǵy Jýaly aýdanynyń turǵyny, 1978 jylǵy Záýirbek Botabaev áli izdestirilip jatyr.
Murat AITQOJA.