Otbasy degen shaǵyn memlekette ákeniń qaıraty men aıbaty, ananyń meıirimi men mahabbaty qatar tógilip, eki sezim egiz burymdaı órilgende ǵana irgesinen izgilik shýaǵy shashyramaq. Bundaıda qazaq «Erkek – úıdiń egesi, áıel – úıdiń shegesi» dep jatady.
Otaǵasy Serik Tóleýbaev Pavlodar oblysy, Ekibastuz qalasyndaǵy «Bogatyr» kómir kenishinde jol jóndeýshi bolyp jumys isteıdi. Al otanasy Nursulý Erkebaıqyzy mádenıet salasynyń qyzmetkeri. Otbasynda bir qyz, eki ul ómirge kelip, olardan 7 nemere súıip otyr. Serik Aıtqululy ujymda bedeldi. Kóp jyldan beri eńbegin adal atqarǵany úshin III dárejeli «Eńbek dańqy» ordenimen marapattalǵan. Bos ýaqytynda nemerelerin aýylǵa aparyp, tórt túlik malmen, aýyl ómirimen tanystyrady. Otaǵasy úshin otbasynyń árbir múshesiniń jeti atasyn bilgeni óte mańyzdy. «Jeti atasyn bilgen ul jeti jurttyń qamyn jer» degen ataly sózdi arqaý etip, nemerelerine ata tarıhy týraly aıtyp, olardyń qandaı jan bolǵanyn, eli-jurty úshin etken erligi, ónegeli isteri jaıynda áńgimelep otyrady. Osylaısha, bala ata dástúrin jalǵastyrsa eken deıdi. Al jary Nursulý Erkebaıqyzy joǵary bilimdi, Ekibastuz qalasy ákimdigi Mádenıet jáne tilderdi damytý bóliminiń «Atamura» mádenıet ortalyǵynda 20 jyldan beri qyzmet istep keledi. Ekibastuz qalasy ákiminiń janyndaǵy memlekettik til saıasatyn odan ári jetildirý jónindegi jumys tobynyń belsendi múshesi. 2018 jyldan qala ákimi janyndaǵy qoǵamdyq keńestiń múshesi, Ekibastuzdaǵy isker áıelder assosıasııasynyń múshesi.
«Shúkir, balalarymyzdyń barlyǵy ómirden óz oryndaryn taýyp úlgerdi, ulymyzdy uıaǵa, qyzymyzdy qııaǵa qondyrdyq. Búginde olardan nemere súıip otyrmyz. Úlken ulym áke jolyn qýyp kenshi boldy. Al kenje ulymyz bolsa, mádenıet salasyna moıyn burdy. Búginde Qorǵanys mınıstrligi ortalyq áskerı orkestriniń solısi. Kelinderim de shyǵarmashylyqqa jaqyn jandar. Qaı ata-ana bolmasyn balasyna túzý tárbıe berýge tyrysady ǵoı. Biz de solaı, balalarymyzǵa úlkenge izet, kishige qurmet kórsetýdi, adal bolýdy, adam bolýdy úırettik. Ata-ana jaqsy isimen de úlgi bolýy kerek. Kelinderimiz bizdiń otaǵasy ekeýmizdiń aramyzdaǵy qarym-qatynasqa tańǵalyp, qyzyǵyp jatady. Bizdiń shańyraq kótergenimizge 34 jyl bolsa da, bir-birimizge únemi qamqorlyq tanytyp, balalarymyzǵa úlgi bolýǵa tyrysamyz. Balalaryma únemi aıtyp otyramyn: «Meni otbasynyń kıesine aınaldyrǵan ákeleriń», dep. Otbasynda ákeniń rólin kóterý arqyly balany durys tárbıeleı alasyń», deıdi N.Erkebaıqyzy.
Aıtpaqshy, Tóleýbaevtar otbasy ótken jyly «Mereıli otbasy» ulttyq baıqaýynyń respýblıkalyq kezeńine joldama alyp, Qazaqstan Respýblıkasy Tuńǵysh Prezıdenti – Elbasy Qorynyń arnaıy syılyǵynyń ıegeri atanǵan.
«Otanasy Nursulý Erkebaıqyzy otbasynyń ǵana emes, qalamyzdyń mádenı, qoǵamdyq sharalaryna belsene qatysady. Al Qazaqstan Respýblıkasy Qarýly Kúshteri Ulttyq áskerı-patrıottyq ortalyǵy Ortalyq ansambliniń konsertmeıster uldary Dáýren jaqynda Qazaqstan Respýblıkasy Prezıdentiniń 2020 jylǵy 30 sáýirdegi Jarlyǵymen «Eren eńbegi úshin» medalimen marapattaldy. Bul da zor qýanysh boldy», deıdi Pavlodar oblysy, Ekibastuz qalasy Mádenıet jáne tilderdi damytý bóliminiń basshysy Aıjan Hamzaqyzy.