Prezıdent janyndaǵy Ulttyq qoǵamdyq senim keńesiniń úshinshi otyrysy bilim berý, ǵylym jáne densaýlyq saqtaý syndy mańyzdy salalarǵa arnaldy. Memleket basshysy Qasym-Jomart Toqaev keńes otyrysynda sóılegen sózinde: «Biz bilim men ǵylym salasynyń bolashaqtaǵy rólin aıqyn túsinýimiz kerek. Búkil memlekettik saıasatty soǵan sáıkes júzege asyramyz», dep bilim berý jáne ǵylym salasynyń mańyzyn odan ári arttyra tústi.
Prezıdenttiń bilim berý men ǵylym júıesin reformalaý qajettiligine toqtalýy ustazdar qaýymynyń maqsat-múddesimen úndes keledi. О́ıtkeni adam kapıtalyn arttyrý urpaq tárbıesindegi jetistiktermen ólshenedi.
Bilim berý júıesin damytýǵa jáne pedagogter mártebesin arttyrýǵa baǵyttalǵan jumystardyń memlekettik deńgeıde qolǵa alynǵanyna rızashylyǵymyz zor. Elimizde «Pedagog mártebesi týraly» zań qabyldanyp, ıgi ister atqarylýda. Memleket basshysy jańa oqý jyly qarsańynda «Bilim jáne Ǵylym» atty respýblıkalyq Tamyz keńesine qatysyp, bilim salasy qyzmetkerlerimen kezdesti. Bul – barlyq pedagogterge degen qurmettiń belgisi. Minekeı, endi sol zańda bekitilip, Tamyz keńesinde tapsyrǵan naqty jumystar óz jemisin berip keledi. Ulttyq qoǵamdyq senim keńesiniń kezekti otyrysynda da Prezıdent elimizdiń jarqyn keleshegi – ulttyq qundylyqtarǵa qanyǵyp ósken, tanymy tereń, oıy ozyq urpaqty tárbıeleıtin muǵalimder qaýymyna júkteler jaýapkershiliktiń zor ekenine toqtala kele, ustazdardyń jalaqysy ósetinin málimdedi. Ustazdar qaýymyn naqty qoldaý – elimizdiń jarqyn bolashaǵy bolar bilimdi urpaǵyna degen qamqorlyqtyń kórsetkishi dep bilemiz.
Ulttyq keńes otyrysynda sóz etilgen pedagogıkalyq mamandyqqa oqýǵa túsý talaptaryn arttyrý, bilim baǵdarlamalaryn jańartý, IT-quzyrettilikke oraı arnaıy modýldiń jáne bilim berýdiń jańa tehnologııalary men ádisteriniń engizilý qajettiligi, pedagogterdi daıarlaıtyn arnaıy oqý oryndarynyń bolýy keregi, osy mamandyqta oqyp jatqan stýdentterdiń shákirtaqysyn kóterý, jataqhanalarmen qamtamasyz etý, JOO arasyndaǵy básekelestikti arttyrý syndy naqty qadamdar bilim berý salasyna oń ózgerister ákeletini sózsiz.
Mektep ınfraqurylymyn damytý, ıaǵnı zamanaýı talaptarǵa saı synyptar men oqý jabdyqtarymen qamtamasyz etý, aýyl mektepteri men qala mektepteri arasyndaǵy aıyrmashylyqty azaıtý, mektep janyndaǵy ınternattardyń jumysy máseleleriniń talqylaýdan tys qalmaýy da kóńil qýantady. Bul qazirgi tańda ózekti máselelerge aınalyp otyrǵany belgili.
Munyń bári bilim salasyn alǵa súıreıtin aıqyn baǵyttar men bastamalar boldy. Eń bastysy Ulttyq keńeste belgilengen josparlar men maqsat-mindetterdi júzege asyrýda árqaısymyz jaýapkershilik tanytýymyz qajet. Sonyń ishinde ustazdarǵa artylar júk te, senim de zor ekenin sezinemiz.
Baıan TEMIRJANQYZY,
«Bilim-ınnovasııa» lıseı-ınternatynyń muǵalimi, «Úzdik pedagog-2019» baıqaýynyń jeńimpazy
Aqtóbe oblysy