Jýrnalıst, zertteýshi Asqar Omarov tarıh ǵylymdarynyń doktory Darhan Qydyráliniń búgin QazAqparatqa bergen suhbatynda asharshylyq qurbandaryn eske alý úshin arnaıy «alapat qasiret» kúnin belgileý týraly usynysyna pikir bildirdi.
«HH ǵasyrdyń otyzynshy jyldary qazaq dalasynda bolǵan asharshylyqtyń qupııasyn ashyp, oǵan ádil baǵa berý jóninde qoǵam talaby jyldan jylǵa kúsheıip keledi. Osy rette tarıh ǵylymdarynyń doktory, áriptesimiz Darhan Qydyráli búgin QazAqparat agenttigi arqyly jaqsy bir usynysty ortaǵa tastady. Men de bir aýyz pikir bildirsem deımin»,- dep bastady Asqar Omarov.
Zertteýshi Darhan Qydyráliniń asharshylyq jyldaryn «Alapat qasiret» dep ataýyn qoldady.
«Birinshiden, asharshylyq jyldaryn «Alapat qasiret» kezeńi dep ataýdy qoldaımyn. Halqymyzdyń basynan ótken sol náýbetti biz osy ýaqytqa deıin birde asharshylyq, birde zulmat dep júrmiz. Asharshylyq sóziniń ózi – «golodomordyń» tikeleı aýdarmasy. Al zulmat - keń uǵym. Mundaı aýqymdaǵy náýbet álem halqynyń birazynyń basynan ótken. Aqtaban kúıde shubyryp, Syrdan ótip Alqakólge jetip qulaǵan qazaqtyń tarıhyndaǵy aýyr qasirettiń biriniń «Aqtaban shubyryndy, Alqakól sulama» degen ataýmen tarıhta qalǵany belgili. Mundaı aýyr qasiretti halqymyz jadynan óshire almaıdy. Sovet bıligi tusynda asharshylyq jaıynda aýyz ashýǵa tyıym salynǵandyqtan, ótken ǵasyrdaǵy náýbettiń naqty ataýy bolmady. Bul uly tragedııa bolǵandyqtan biz qazaq dalasyndaǵy sol asharshylyq kezeńin «Alapat qasiret» dep atasaq bolady»,- dedi Asqar Omarov.
Ol bul qasirettiń resmı túrde naqty baǵasyn alýy úshin ǵalymdar osyǵan deıin jaýapsyz kelgen suraqtardy zertteýi kerek ekenin aıtady.
«Alapat qasirettiń bolǵanyn moıyndadyq, tarıhy zerttelip jatyr. Sebebi halqymyzdyń basyna mundaı qasirettiń aınalyp soqqanyn, bolshevıkterdiń qanǵa boıalǵan qyzyl ıdeologııasynyń qaıta oralǵanyn qalamaımyz! Alapat qasiret qaıtalanbasyn! Menińshe bul máselemen ǵalymdar aınalysý qajet. Kim kináli? Qansha adam qyryldy? Bul qoldan jasalǵan zulmatyn saıası statýsy qandaı? Naqty jaýapsyz suraqtar óte kóp. Sol kezde ǵana «ALAPAT QASIRET» tarıhı kezeńi resmı túrde naqty baǵasyn ala alady»,- dep qorytyndylady A.Omarov.