StopMusor – dál osyndaı ataýmen Nur-Sultan men Almaty shaharlarynda ekologııalyq joba qolǵa alynady. Onyń negizgi maqsaty – turmystyq qaldyqty jınaýda halyqtyń mádenıeti men áleýmettik jaýapkershiligin arttyrý. Qoqysty suryptaý arqyly elimizdiń azamattaryn qaıta óńdeý salasyna jumyldyryp, «jasyl ekonomıka» tujyrymdamasyn damytý kózdelgen. Bul týraly Prezıdent janyndaǵy Ortalyq kommýnıkasııalar qyzmetinde ótken baspasóz jıynynda Qazaqstannyń ekologııalyq uıymdar qaýymdastyǵynyń tóraǵasy Aıgúl Soloveva aıtty.
Ekologııalyq bastamany kótergen qoǵam belsendileri bul jumysty iske asyrý úshin aldymen qajetti ınfraqurylymdy damytyp, ınvestısııalyq shyǵyndardy ońtaılandyrý kerektigin jetkizdi.
«Bıyl Davosta ótken dúnıejúzilik ekonomıkalyq forýmnyń basty taqyryby ekologııa máselesine arnaldy. Bizdiń qaýymdastyq adam balasy sapaly qorshaǵan ortada ómir súrýge quqyly degen ustanymda. Elimizdegi ekologııalyq jaǵdaıdy jaqsartý maqsatynda uıym bastamasymen StopMusor jobasy qolǵa alynady. Ol 2021 jylǵa deıin jalǵasady. Basymdyq Nur-Sultan men Almaty qalalaryna beriledi. Osy rette Qazaqstan halqyn áleýmettik jaýapkershilikke shaqyryp, barshamyzǵa ortaq ekologııamyzdy taza qalpynda saqtaýǵa kúsh biriktirýge shaqyramyz. Ata-analarymyz bala kezden «Mádenıet tazalyqtan bastalady» dep beker úıretpese kerek. Sondyqtan osy aksııanyń kómegimen qoǵamnyń nazaryn atalǵan máselege aýdaryp, ekologııaǵa qatysty kúrmeýli problemalar sheshimin tabady degen úmitimiz basym», dedi Qazaqstannyń ekologııalyq uıymdar qaýymdastyǵynyń tóraǵasy A.Soloveva.
Qazaqstannyń ekologııalyq uıymdar qaýymdastyǵy basqarma tóraǵasynyń orynbasary Eldos Abaqanovtyń aıtýynsha, qaldyqty suryptaý mádenıetin qalyptastyrmaıynsha, qaıta óńdeý salasyn damytý qıynǵa soǵady.
«Syrtta júrgende shólmek, paket jáne taǵy da basqa qaldyqtar kózge jıi túsedi. Sol sebepti Halyqaralyq qorshaǵan ortany qorǵaý kúni aıasynda osyndaı aksııany bastaýdy qup kórdik. Áleýmettik zertteý kórsetkendeı, usaq turmystyq qaldyqtyń 80%-y qoǵamdyq oryndaryndaǵy arnaıy jáshikterge salynbaıdy eken. Tótenshe jaǵdaı jáne karantın rejiminde qorshaǵan ortaǵa beıqam qaramaıtyn adamdar bar ekeni qýantqany ras. Osyǵan baılanysty zertteý júrgizildi. Nátıjesin keıin usynatyn bolamyz. Saýaldamaǵa qatysqandardyń basym bóligi qoǵamdyq oryndarda usaq qoqysty baıqaıtyndaryn jetkizdi» dedi E.Abaqanov.
Qoǵam belsendileri aksııanyń negizinde beıneleý óneri ókilderin tartý arqyly shyǵarmashylyq jobalardy júzege asyrý josparlanǵanyn aıtty.