Máýlen Áshimbaevtyń tóraǵalyq etýimen Senat Bıýrosynyń otyrysy ótip, onda palatanyń 11 maýsymǵa josparlanǵan otyrysynyń kún tártibi bekitildi. Bul týraly Senattyń baspasóz qyzmeti habarlady.
Senatorlar aldaǵy otyrysta Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksi jobasyn jáne densaýlyq saqtaý máseleleri jónindegi ilespe zań jobasyn qaraýdy josparlap otyr.
Buǵan qosa otyrysta zańnamalyq aktilerge atqarýshylyq is júrgizýdi jáne qylmystyq zańnamany jetildirý, sıfrlyq tehnologııalardy retteý, tutynýshylardyń quqyqtaryn qorǵaý, sondaı-aq halyqaralyq avtomobıl tasymaldaryn qadaǵalap otyrý máseleleri boıynsha engiziletin túzetýler qaralady.
Sonymen qatar Bıýroda Májilisten kelip túsken zań jobalary salalyq komıtetterge bólinip berildi.
Qarjy jáne bıýdjet komıteti «Qazaqstan Respýblıkasynyń keıbir zańnamalyq aktilerine aýdıtorlyq qyzmet máseleleri boıynsha ózgerister men tolyqtyrýlar engizý týraly» zań jobasy boıynsha bas komıtet bolyp belgilendi.
Ekonomıkalyq saıasat, ınnovasııalyq damý jáne kásipkerlik komıteti «Qazaqstan Respýblıkasynyń keıbir zańnamalyq aktilerine bıznes-ahýaldy jaqsartý máseleleri boıynsha ózgerister men tolyqtyrýlar engizý týraly» zań jobasyn odan ári pysyqtaýmen aınalysady.
Al «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy Konstıtýsııalyq zańnama, sot júıesi jáne quqyq qorǵaý organdary komıtetine bekitildi.
Bas komıtetterge Senattyń basqa komıtetteriniń usynystaryn qorytý jáne osy qujattar boıynsha qorytyndylar daıyndaý tapsyryldy.