Zobalań jyldarynda jazyqsyz atylyp ketken qazaq zııalysynyń biri Jetisýda ómir súrgen Pyshan Jálmendeuly. Zamanynda aqyndyq óneri men azamattyq ustanymy Alataýdyń qos qaptalyna áıgili bolǵan Pyshan serini Sovet úkimeti 1921 jyly oqqa baılaǵan, - dep habarlady Egemen.kz.
– Pyshan Jálmendeulynyń esimi qazaqtyń Aqan seri, Estaı, Úkili Ybyraı, Birjan sal sııaqty erkin oıly óner dúldilderiniń qatarynda atalady. О́zi oryssha bilim alǵan saýatty, júırik ustap, qus salǵan saıatshy, dilmar sheshen ári qara qyldy qaqa jarǵan ádil bolǵan adam. Ákesi Jálmende bolystyń jolymen el basqaryp, aýyl arasyndaǵy tektekti tıyp, tektini qoldap otyrǵan eken. Pyshan sııaqty parasatty qazaqtar qyzyl kommýnısterdiń quryǵyna birden ilingen ǵoı. 1921 jyly serini dushpandarynyń syrttaı kórsetýimen qamaýǵa alady da, sottyń aqtaý úkimi shyqqanyna qaramastan atyp tastaǵan. Marqumnyń súıegi Taldyqorǵannyń irgesindegi "Shaıqorǵan" beıitinde jatyr, - deıdi Pyshan Jálmendeulynyń tikeleı urpaǵy, aqyn, oblystyq "Jetisý" gazetiniń bas redaktory Ámire Árin.
Pyshan seriniń sońynda sara sóz, áýendi án qaldy. Aqynnyń ataqty "Jálmendeni balasy Pyshan edim..." atty áni de qazir halyq mýzykasyna qosylǵan súbeli úles qatarynda urpaq qulaǵynda jańǵyryp keledi. Súıinerligi, Pyshannyń zaman keıpin sýrettegen 24 shýmaq óleńi Jetisý ólkesinen jaryq kórgen "Kedeı erki" gazetine basylǵan eken. Bul 1922 jyly bolǵan, seri atylyp ketkennen keıingi jaǵdaı. Pyshan murasyn alǵashqy bolyp jınaqtap, óleńderin baspaǵa usynǵan onyń zamandasy, ózi de bolys bolǵan Kenjebaı Saǵynaıuly eken.
Aıtpaqshy, Pyshan Jálmendeulynyń alaqan taby tıgen tasbıh tabyldy. Tasbıhty Pyshannyń zamandasy, aqyn atylǵannan keıin onyń joqtaýshysyna aınalǵan Kenjebaı bolystyń báıbishesi saqtap kelipti. Kúlánda ájeı seriden qalǵan jádigerdi uzaq jyl jurt kózine túsirmeı saqtap, dúnıeden óter shaǵynda óz urpaǵy Saǵymbaı Ysqaquly aqsaqalǵa tabystapty. Qazir Pyshan seriniń tasbıyǵy Taldyqorǵanda turatyn osy kisiniń áýletinde qundy mura qatarynda tur.