Elorda kúni merekesiniń qarsańynda Qarqaraly aýdanynda úsh áleýmettik nysan paıdalanýǵa berildi.
Aýdan ortalyǵynda jańadan boı kótergen deneshynyqtyrý-saýyqtyrý kesheni 320 adamǵa laıyqtalyp jobalanǵan. Jalpy aýmaǵy 2437,7 sharshy metr jerdi alatyn keshende sporttyń voleıbol, basketbol, gandbol, kúres túrlerimen shuǵyldanýǵa barlyq jaǵdaı bar. Sport saraıynyń ishi jattyǵýlarǵa qajetti qural-jabdyqtarmen tolyqtaı qamtamasyz etilgen.
Qarqaraly qalasynda taǵy bir sport nysany – ústel tennısiniń ortalyǵy da kelýshilerge aıqara esik ashty. Munda bir mezgilde 60-tan astam adam sporttyń osy túrimen aınalysa alady. Tennıs ortalyǵy zamanaýı talaptarǵa saı jaraqtandyrylǵan.
Sonymen qatar aýdandaǵy iri eldi mekenderdiń biri Qaraǵaıly kentinde dárigerlik ambýlatorııanyń jańa ǵımaraty paıdalanýǵa berildi. Jergilikti halyq kópten kútken bul medısınalyq mekeme bir mezgilde 100 adamǵa deıin qabyldaı alady, 25 tósektik kúndizgi stasıonar medısınalyq kerek-jaraqpen tolyq jabdyqtalǵan.
Qarqaraly aýdanynyń ákimi Eldar Dúısetaev halyqtyń ál-aýqatyn jaqsartý maqsatyndaǵy jumystardyń aldaǵy ýaqytta da jalǵasyn tabatynyn aıtady.
Qaraǵandy oblysy,Qarqaraly aýdany