Abaı atyndaǵy Opera jáne balet teatry uly aqyn ári oıshyl Abaı Qunanbaıulynyń 175 jyldyq mereıtoıyn merekeleý aıasynda 13 shilde men 9 tamyz aralyǵynda kásibı emes oryndaýshylarǵa arnalǵan «Abaı ánderi» onlaın-konkýrsyn jarııalaıdy.
Baıqaýǵa barlyq tilek bildirýshiler qatysa alady. Ol úshin Abaı Qunanbaıulynyń ózińiz súıip tyńdaıtyn týyndysyn oryndap, ony beınetaspaǵa jazyp, qazylar alqasyna jiberýińiz qajet. Is-shara týraly tolyq aqparat resmı saıtta www.gatob.kz jáne teatrdyń áleýmettik jelilerindegi akkaýnttarda jarııalanǵan. Baıqaýǵa qatysýshylardyń beıne-jazbalary teatrdyń resmı YouTube arnasynda ornalastyrylady, onda ashyq onlaın daýys berý ótedi.
– Abaıdyń 175 jyldyǵyna oraı 2020 jyly aýqymdy baǵdarlama daıyndadyq, – dedi MAOBT dırektory Aıa Qalıeva, – Mereıtoı aıasynda TÚRKSOI elderiniń qatysýshylarymen halyqaralyq festıval ótkizý josparlanǵan bolatyn. Alaıda pandemııaǵa baılanysty barlyq is-sharalardy keıinge qaldyrýǵa týra keldi. Biraq biz onlaın-baıqaý ótkizýdi jáne oǵan kásibı emes oryndaýshylardy tartýdy durys kórdik, óıtkeni Abaı – halyq aqyny. Baıqaýǵa Túrki elderiniń ókilderi de qatysa alady, osylaısha biz shyǵarmashylyqtyń kókjıegin keńeıtemiz, ártisterdi janrlarmen shektemeımiz, olar oıshyldyń shyǵarmalaryn jeke jáne ansamblderde oryndaı alady. Baıqaý sonymen qatar talanttardy ashýǵa arnalǵan. Ashyq onlaın daýys berý sońynda barlyq jeńimpazdar uıymdastyrýshylardan alǵys hattar men dıplomdarǵa ıe bolady, erekshe kózge túsken ónerpazdardy teatrdaǵy qoıylymdarǵa shaqyramyz.
Teatrda karantın bastalǵannan beri uıymdastyrylǵan onlaın-baǵdarlamadan basqa jazdyń sońyna qaraı Abaı qurmetine ashyq aspan astynda konsert ótkizilmek.