Búginde pandemııa búkil álemdi dúrliktirip, álekke salyp otyr. Indet elimizdiń densaýlyq salasynyń qaýipsizdigine de qater tóndirip, epıdemııalyq jaǵdaıdy kúrdelendirip jiberdi. «Tas túsken jerine aýyr» degendeı, COVID-19-dy jáne vırýstyq pnevmonııany aýyzdyqtaý isi eń aldymen dárigerler men barlyq medısına qyzmetkerlerine aýyr salmaq túsirýde. Jan alysyp, jan berisken bul kúresti myltyqsyz maıdanǵa teńesek, artyq aıtqandyq bolmaıdy. Osyndaı jaýapkershiligi mol, qaýiptiligi joǵary «maıdannyń» aldyńǵy shebinde aqtóbelik dárigerler de ýaqytpen sanaspaı eńbek etip júr.
Olardyń erlikpen para-par is-qımyldary barsha qazaqstandyqtar men naýqasqa shaldyqqan azamattardyń sheksiz rızashylyǵy men alǵys sezimin týǵyzdy. Tipti elimiz úshin úlken syn bolyp otyrǵan osynaý almaǵaıyp kezeńde kún saıyn óz basyn qaýip-qaterge tigip júrgen dárigerlerdiń is-áreketi jaýmen arystansha arpalysqan keshegi kúnniń batyrlaryn eske túsiredi. Aıtaıyn degenimiz, Memleket basshysy Qasym-Jomart Toqaevtyń tarapynan dárigerlerdiń jankeshti eńbekteri tıisti deńgeıde eskerilip, baǵalanyp kele jatqany. Bul oı-tujyrymymyzǵa Prezıdenttiń pandemııamen kúrestiń bel ortasynda júrgenderdi óz Jarlyǵymen marapattap, kótermelep otyrǵany aıqyn aıǵaq. Olardyń arasynda medısınalyq klaster sheńberinde indetpen kúresip júrgen aqtóbelik densaýlyq saqtaý salasynyń ókilderi de bar.
Osy oraıda biz Aqtóbe aımaǵynan qazaqtyń tuńǵysh dáriger qyzy Aqqaǵaz Dosjanova, otandyq medısınanyń damýyna súbeli úles qosqan Ishanbaı Qaraqulov pen Jaqsylyq Dosqalıev jáne Qazaqstannyń Eńbek Eri Serik Aqsholaqov syndy medısıa maıtalmandary shyqqanyn laıyqty maqtanysh ete alamyz. Atalǵan belgili tulǵalardyń qataryna indetpen kúres kezinde sońǵy demi úzilgenshe azamattyq ar-ujdanymen dárigerlik antyna kir keltirmeı koronavırýsqa shaldyqqan adamdarǵa arasha túsý kezinde ózi de osy dertke tap bolyp, sonyń saldarynan dúnıeden ótken aqtóbelik áriptesimiz, osy óńirdiń bas ınfeksıonıst dárigeri marqum Qalıhan Qozybaǵarov ta qosylǵany kámil.
Elimizdegi indetpen kúres barysy el úshin týǵan halqymyzdyń taǵy bir adal ulyn anyqtap berdi. Onyń Memleket basshysy Qasym-Jomart Toqaevtyń Jarlyǵymen elimizdiń eń joǵary memlekettik marapaty – Qazaqstannyń Eńbek Eri ataǵymen marapattalýy barsha otandyq dárigerlerdiń eren eńbegi úshin berilgen bıik baǵa dep bilemiz. Sol úshin biz el Prezıdenti Qasym-Jomart Toqaevqa barsha aqtóbelik densaýlyq saqtaý salasy qyzmetkerleri atynan sheksiz rızashylyǵymyz ben alǵysymyzdy bildirgimiz keledi.
Sonymen birge biz búginde eldiń ózge óńirlerimen salystyrmaly túrde alǵanda Aqtóbe óńirinde epıdemııalyq ahýaldyń oń úderisi men dınamıkasy baıqala bastaǵanyn da aıta ketkendi jón kóremiz. О́ıtkeni sońǵy aptalarda óńirde naýqastardyń sany birshama kemip, dertten saýyǵyp shyqqandardyń qatary ósip keledi. Árıne, bul oń kórinis bosańsýǵa esh negiz bola almaıdy. Kerisinshe, dertti emdeý men odan saqtandyrý sharalary júıeli túrde jalǵasatyn bolady. Qazirgi kúni oblys aýmaǵynda buǵan qajetti barlyq alǵysharttar jasalǵan. Maman-kadrlar jetkilikti, qajetti medısınalyq qural-jabdyqtar men qondyrǵylar naýqastardy qamtı alady. Aýrýhanalar men provızorlyq gospıtaldarda jáne emhanalar janyndaǵy stasıonarlyq oryndarda jańa naýqastardy qabyldaýǵa múkindik bar. Dári-dármekpen qamtý isinde buǵan deıin ártúrli ister oryn alǵanymen, keıingi kezde oblys ákiminiń tarapynan jedel sharalar júzege asyrylǵannan soń bul másele de tolyqtaı sheshimin tapty deı alamyz.
Bereke men birlik bar jerde alynbaıtyn asý, berilmeıtin qamal joq. Bul rette qazirgi kezde oblys turǵyndary bir-birine janashyrlyqpen qoldaý kórsete bilgeni de atap aıtýǵa turarlyq. Aqtóbe – elimizdiń iri ónerkásip ortalyqtarynyń biri. Mundaǵy iri kásiporyn basshylary men kásipkerleri jáne myńdaǵan erikti bir jaǵadan bas, bir jeńnen qol shyǵara otyryp indetti aýyzdyqtaýǵa bir kisideı jumylyp keledi. Biz kókeıde júrgen oı-pikirlerimizdi elimizdiń bas basylymyna joldaı otyryp, barsha el-jurtymyz úshin aýyr syn bolyp otyrǵan qaýipti indetti joıyp, artqa tastaý úshin aýyzbirshilik úlgisin kórsete bereıik demekpiz.
Aqtóbe oblystyq dárigerler qaýymdastyǵy atynan:
Qaırat SABYR,
«Senim» densaýlyq saqtaý júıesi jumyskerleriniń salalyq kásipodaǵy» RQB Aqtóbe oblystyq fılıalynyń tóraǵasy,
Roman RAHIEV,
Aqtóbe oblystyq densaýlyq saqtaý salasy qyzmetkerleri ardagerler keńesiniń tóraǵasy,
Roza IZTILEÝOVA,
Aqtóbe oblystyq dárigerler men provızorlar qaýymdastyǵy qoǵamdyq birlestiginiń prezıdenti
AQTО́BE