Júrgizýshi – Rýslan Igilik.
Búgin, 17 qazan kúni 56 jáne 75 kıloǵa deıingi salmaqtar boıynsha irikteý urystary bolyp ótti.
Qytaıdyń 56 kıloǵa deıingi salmaqtaǵy nómiri birinshi boksshysy Jıaveı Zang germanııalyq Edgar Valtpen kezdesýinde Azııa boks mektebiniń kári qurlyqtan tómen emes ekenin tanytty. Ras, bul aıqas eki jaqtyń birdeı derlik múmkindikterin kórsetýleri negizinde órbidi. Aqyrynda tóreshiler Aspan asty eli ókiliniń myqtyraq ekenin moıyndady. Al ony kelesi joly budan da myqty – kýbalyq 20 jasar Robeısı Ramıres kútip tur. Búginde atynan at úrketin Robeısı Eloı Ramıres Karrazananyń ataqtaryn tizip shyǵýdyń ózine qyrýar ýaqyt ketedi. Biz solardyń birqataryn atap kóreıik. Ol 1993 jylǵy 20 jeltoqsanda týǵan. 2012 jylǵy London Olımpıadasynyń chempıony, álemniń 2009 jylǵy kadetter arasyndaǵy qola júldegeri, álemniń 2010 jylǵy jastar arasyndaǵy chempıony, PanAmerıka oıyndarynyń 2010 jáne 2011 jyldarǵy chempıony, Kýba Olımpıadasynyń 2010 jylǵy fınalısi, Jastar Olımpııalyq oıyndarynyń 2010 jylǵy chempıony, Kýbanyń 2010 jylǵy qola júldegeri, 2012, 2013 jyldarǵy chempıony. Al Bakýde 1/8 fınalda reseılik Mısha Aloıannan utylyp qalǵan.
Armıan Aram Avagıan men brıtanııalyq Djamal Iаfaıdiń arasyndaǵy urys ta tartysty ótti. Ekeýi de jurtty ashyq urysymen qýandyrdy. Sonda da bolsa, bulardyń aldyńǵylarynyń basymdylyǵy biline berdi. Tóreshiler de sosyn ádildigine júginip, ataǵy artyqtaýyna jeńilgenin moıyndatty. Kelesi jekpe-jekte ıtalıan Iаhın Parınelo úsh raýndta shydas bermegen grýzın Avtandıl Chýbabrııadan basym tústi.
Bizdiń jankúıerlerdi bul salmaqta eleńdetken bárinen buryn rýmyn Nıkolae Andreana men kanadalyq taı jigiti Tanjıt Lallıdiń arasyndaǵy aıqas boldy. Sebebi, osylardyń jeńgeni kelesi aınalymda bizdiń Qaırat Erálıevpen aıqasatyn edi. Bul urys teń dárejede ótti. Ekinshi raýndta kanadalyq belsendi kórindi. Biraq sońǵy raýnda rýmyn jigiti kóbirek dál soqqy jasady. Osy shaıqastyń taǵdyryn sheship ketti.
75 kıloǵa deıingi boksshylar arasynda bizge eki juptyń teketiresi nazar aýdartty. Bulardyń birinshisinde reseılik Artem Chebotarev pen Gaıana ókili Dennıs Tomas ushyrasty. Baıqap qarap turǵan adam Artemniń taza orys oǵlany ekenine kúmán keltirer edi. Shynynda da ol biz biletin bul násil ókilderine uqsaı bermeıdi. Túri aqshyl bolǵanymen, shashy qoıý. Kózderi qońyr. Sóıtsek, onyń anasy qazaqtyń qyzy eken. Sol jıen bala bul kúni jaqsy aıqasty. Sonyń dáleli, ekinshi raýndta shaıqasty óz paıdasyna sheshe bildi. Kelesi kezekte túrkimen Azız Achılov óziniń qımylymen unady. Urysymen unady. Al urysty tez bitirgenderdiń biri bolǵan ózbek Azızbek Abdýgafarov jóninde sóz basqa. Bul joly Seıshel araldarynan kelgen Jovette Jındi birinshi raýndta-aq iske alǵysyz etip tastaǵan onyń alysqa baratyny anyq sııaqty.
Búgingi kúnniń bir ereksheligi, ol 1/32 fınaldyq irikteý shaıqastaryn aıaqtaıdy. Búgin keshki sessııa bitkesin, erteń 1/16 fınal bastalady. Olarda qazaq boksshylary birinshi ret sharshy alańǵa shyqqaly tur. Bizdiń jigitterdiń arasynda ázirge tek Jánibek Álimhanuly men Ivan Dychkonyń ǵana qarsylastary kim bolatyny belgisiz. Keshki sessııadan keıin bulardyń aldyńǵysynyń básekelesi anyqtalady. Al Ivan 1/8 fınaldan bastap qana urysqa qosylady.
Biz erteńnen bastap jigitterimizdiń kimdermen shyǵatyndaryn keshke baıandap beremiz.
Chempıonat týraly barlyq materıaldarmen gazettiń Egemennews.kz saıtynan tanysa alasyzdar. Osy jerdi basyńyz.