Prezıdenttiń parasatyna senemiz

Bes kúndik ǵumyryń – bazar men mazar arasyndaǵy jol. Sol jol ústi, árkimge torqaly toıda «qý bas domalata» almaǵanyn da, topyraqty ólimde «oı, baýyrymdap» qalmaǵanyn da súıekke tańba sanatar uly salty bar, «ólimnen uıat kúshti» ustanymyna berik, ojdany bıik halqymyzǵa senemiz! Jer-jerde joqtan bar jasap, ajal aldyndaǵy adamdarǵa jappaı jantalasa tegin kómek kórsetip jatqan qarapaıym uldarymyz men qyz­darymyzdyń jasampazdyǵy da – qazaq arlylyǵynyń qudireti! Tóbesinen myń urǵandy mańdaıynan bir sıpaǵany úshin de keshire salatyn ańǵal-ańqyldaq qasıetimiz de bar ǵoı, sonymen qatar «ótkelde at aýystyrmaıdy» qaǵıdasyn eskere otyra, qamsyzdyqqa salynǵan qaıran úkimetimiz ben oblystar ákimdikterine de sengimiz keledi. Olardyń da áleýmettik syn qyspaǵynda pandemııaǵa qarsy kórsetip jatqan shapshań da shalt qımyl-áreketterin baıqap otyrmyz. «Igiliktiń erte-keshi joq». Vırýsologııasy men epıdemıo­logııasy kenjelep qalǵan elde ardaqty­larynan aıyrylyp jatqanyna qaramas­tan, ólimge bas tikken, ol úshin arnaıy tólener aqylardyń berilmeı jatqa­nyna da máý demesten, mamandyǵyn adam­dyǵy asqaqtatqan dárigerlerimizdiń janqııarlyq eńbegine senemiz! Myń da bir rahmet aıtamyz! Ásirese, qaýiptiligi jaǵynan atomdyq jarylystyń radıasııaly aýmaǵynan birde-bir kem emes emhanalarda, ottaı janǵan medısınalyq skafandrlar ishinde kúndiz-túni tunshyǵa júre, salmaǵy batpandaı ottegi ballondaryn  joǵary-tómen tasyp, em jasap, bilektaldy-belúzdi azapty bastarynan udaıy ótkerip júrse de, eńbeginiń onsha elenbesine de renish bildirmeı kele jatqan aıaýly meıirbıkeler men sanıtarlarǵa senemiz. Olarǵa degen alǵysymyz sheksiz.Janyn shúberekke túıe zyr júgirip júrgen aınalaıyn eriktilerge senemiz! Bárin aıt ta, birin aıt, Memleket basshysy retinde taǵdyry el peshenesine jazylǵan; Alash aldynda ant berip te úlgermeı jatyp, Arys qalasyndaǵy tehnogendik orasan apatpen, dúngendik-uıǵyrlyq qyrsyq oqıǵa­larmen, Túrkistan oblysyndaǵy sý apaty jáne olarǵa jalǵasa jetken joı­qyn tájtajal indetimen de betpe-bet kel­genindegi asa zor jaýapkershilik tanyta bilmegi, ár qıyndyqqa oraı múltiksiz she­shim shyǵarmaǵy, Farabıdiń – 1150, Altyn Ordanyń – 750, Abaıdyń 175 jyldyq mereıtoılaryn abyroımen ótki­zýdegi álemet jumystar barysyn mu­qııat qadaǵalamaǵy jáne bir­ me­zette syrtqy saıasatty da kemel oı­lanyp-tolǵanbaǵy, az ýaqyt ishinde sonyń báriniń taýdaı sal­maǵy bir óziniń qyl­sha moınyna tússe de, esh qajymaǵan Prezı­dentimiz Qasym-Jomart Toqaevtyń aqyl-parasatyna senemiz.

Halyq degenimiz tula boıy tol­ǵan kózden turatyn Argýs sekildi, bárin kórip-bilip otyr. Eýrazııalyq eko­nomıkalyq keńestiń kezekti otyrysynda Reseıdiń ımperııalyq ambısııasyna toıtarys berildi, pandemııaǵa qarsy tó­tenshe jaǵdaı rejimi jarııalandy, as­tanadaǵy otshashý sekildi qatelikter es­kerilip, Qaraly kún belgilendi, «SQ-Farmasııa» bylyǵy dereý áshkerelendi, basshylarynyń ústinen qylmystyq is qozǵaldy, indetti joıýǵa bólingen asa kólemdi qarjynyń qaıda ketkeni shapshań tekserilýde, janazalar ústinde jappaı saýda júrgizgen dárihanalyq arsyzdar jaýapqa tartylyp, dári-dármek jetispeýshiligi joıylýda, tumshan (mas­ka) shyǵaratyn júzdegen seh iske qosylýda. Úkimetke degen ekiaptalyq qatań talapqa oraı, eldiń túkpir-túk­pirinde áleýmettik kómek, ekonomıkany quldyratpaý amaldary syndy qaıyry mol qarqyndy áreketter jasalýda. Indettiń beti qaıta bastady. Qashyqtan onlaın oqytý jumystary barysynda «Sıfrly Qazaqstan» jobasynyń jalǵandyǵyna qaraı, Sıfrlyq damý, ınnovasııalar jáne aeroǵarysh ónerkásibi mınıstri A.Jumaǵalıev qyzmetinen alyndy, Densaýlyq saqtaý mınıstrligine jańa basshy keldi. Ol ózgerister de Prezıdentimizdiń «Memlekettik basqarý júıesin qaıta qurý» ıdeıasynyń bastamasy retindegi alǵashqy nátıjeler dep bilemiz. Al jyldar boıy qordalanyp qalǵan saıası-áleýmettik, ekonomıkalyq máselelerdiń Prezıdent uıǵarymymen qurylǵan Ulttyq qoǵamdyq keńeste dúrkin-dúrkin talqyǵa túsýi men telearnalarda qoǵamdyq-saıası tok-shoýlardyń tikeleı efırde uıymdastyryla bastaýy da – Qasym-Jomart Toqaevtyń «Halyq únine qulaq asatyn memleket» tujyrymdamasyna oraıǵy áýelgi ádiletti tirlikter. So­nyń ózi sóz bostandyǵy qaqyn asyra paı­­da­­lanýdyń jabaıy trıbýnasyna da aınalǵan áleýmettik jelilerdegi daýasyz demagogııanyń, tóńkeriske úndeýdiń, qoǵam qaıratkerlerin jónsiz ǵaıbattaý men jalǵan aqparat taratýdyń, «5G qateri» men «Bıll Geıts vaksınasy» sekildi qaýesettermen qoǵamda úreı tý­ǵyzýshy psıhodıversııanyń, t.s.s. kesapattardyń aptyǵyn da basaryna daý joq. Indettiń betin túbegeıli qaıtarýda «Biz birgemiz!» qory men chellendji de óz septigin tıgizer. Biraq bolashaǵymyzdyń jarqyn bolmaǵynyń kepili retindegi halyq birliginiń negizi – memlekettik ıdeologııa, onyń negizi – memlekettik til. Til birligi bolmaı, el birliginiń bolmasy – aksıoma. Prezıdentimizdiń «Qazaq tili – ultaralyq til bolarǵa kerek!» degen málimdemesi de bolashaqta bolar úlken rýhanı ózgeristerdiń anyq belgisi.

Tynyshtyqbek ÁBDIKÁKIMULY,

aqyn, Memlekettik syılyqtyń laýreaty