Aıbynymyz – birlik, aıdynymyz – tirlik

Alǵa, «Nur Otan»! Alǵa, Qazaqstan!

Keshe Táýelsizdik saraıynda «Nur Otan» partııasynyń kezekten tys HV sezi bolyp, onyń jumysyna Elbasy – partııa Tóraǵasy Nursultan Nazarbaev qatysyp, sóz sóıledi.

Sezd jumysyn partııa Tóraǵasynyń birinshi orynbasary Baýyrjan Baıbek ashyp, júrgizip otyrdy. Qurmetti áriptester, elimiz óziniń damýyndaǵy jańǵyrý kezeńine aıaq basty, dep bastady ol óziniń sózin. Osydan bir jyl buryn Elbasy Nursultan Nazarbaev «Qazaqstan-2050» Strategııasyn jarııalap, elimizdiń aldyna barynsha damyǵan 30 memlekettiń qataryna engizý týraly jańa mindet qoıdy. Sondyqtan, jańa asýlardy baǵyndyrýǵa bereke men birlik, táýelsizdikke jańasha kózqaras, ashyqtyq pen ynta kerek.

Alǵa, «Nur Otan»! Alǵa, Qazaqstan!

Keshe Táýelsizdik saraıynda «Nur Otan» partııasynyń kezektentys HV sezi bolyp, onyń jumysyna Elbasy – partııa Tóraǵasy Nursultan Nazarbaev qatysyp, sóz sóıledi.

 

 

Sezd jumysyn partııa Tóraǵasynyń birinshi orynbasary Baýyrjan Baıbek ashyp, júrgizip otyrdy. Qurmetti áriptester, elimiz óziniń damýyndaǵy jańǵyrý kezeńine aıaq basty, dep bastady ol óziniń sózin. Osydan bir jyl buryn Elbasy Nursultan Nazarbaev «Qazaqstan-2050» Strategııasyn jarııalap, elimizdiń aldyna barynsha damyǵan 30 memlekettiń qataryna engizý týraly jańa mindet qoıdy. Sondyqtan, jańa asýlardy baǵyndyrýǵa bereke men birlik, táýelsizdikke jańasha kózqaras, ashyqtyq pen ynta kerek. Az ǵana ýaqyt ishinde elimizde aýqymdy reformalar bas­taldy. Qoǵamdyq baqylaý, halyq aldyndaǵy esep berý, memlekettik organdardyń ashyqtyǵy, ózin ózi basqarý júıesi aıtarlyqtaı jetildirildi. Halyqtyq partııa retinde biz de bul jumystarǵa bel­sendi túrde qatysyp, qyzmetimizdi jańǵyrtýymyz qajet. Sol sebepti partııa kóshbasshysynyń tapsyrmasyna sáıkes «Nur Otan» partııasynyń jańa Doktrınasy ázirlendi. Qujatty ishki partııalyq talqylaýdyń aıasynda Saıası keńes, Bıýro, Úkimet jáne partııamyzdyń Parlamenttegi fraksııasynyń músheleri eki aı boıy alys aımaqtarǵa baryp, partııanyń bastaýysh uıymdaryndaǵy múshelerimen kezdesip, talqylaýlar ótkizdi. Búgingi sezde Doktrınaǵa qatysty sońǵy pikirler aıtylyp, partııanyń basty qujaty qabyldanatyn bolady. Sóıtip, partııamyzdyń HHI ǵasyrdaǵy mıssııasy men «Qazaqstan-2050» Strategııasyn iske asyrý aýqymyndaǵy róli aıqyndalady.

Odan ári Baýyrjan Baıbek sezge 1194 delegat qatysyp otyrǵanyn jetkizdi. Sonyń ishinde Parlament depýtattary, basqa da saıası partııalar men úkimettik emes uıymdardyń basshylary, memlekettik organdar, Ulttyq holdıngter men kompanııalardyń, dıplomatııalyq korpýs pen halyqaralyq uıymdardyń, BAQ basshylary men ókilderi qatysyp otyrǵanyn aıtty.

Sezdi bastaýǵa qajetti kvorým bar, sondyqtan onyń jumysyn ashýǵa ruqsat etińizder, dedi ol. Osy usynys daýysqa qoıylyp, biraýyzdan qabyldanǵan soń sezd jumysy ashyq dep jarııalandy.

Memlekettik Ánuran oryndal­ǵan soń sezdiń jumys organdary saılandy. Osydan keıin B.Baıbek sezde qaralatyn kún tártibin jarııalady. Birinshi másele «Nur Otan» partııasynyń Saıası doktrınasy týraly; ekinshi másele partııa Jarǵysyna ózgerister men tolyqtyrýlar engizý týraly; úshinshi másele partııanyń Saıası keńesine ózgerister engizý týraly; tórtinshi, partııanyń baqylaý-tekserý organdarynyń keıbir máseleleri týraly. Osy kún tártibine eshqandaı qosymshalar men ózgerister usynylmaǵan soń ol daýysqa qoıylyp, bekitildi. Odan ári sóıleýshiler reglamenti de daýysqa salý ádisimen anyqtaldy. Sonymen birge, mandat komıssııasyna túsken hattamalar boıynsha saılanǵan delegattardyń ókilettigi de daýysqa qoıý tártibimen bekitildi.

Osydan keıin sezd kún tártibindegi máselelerdi qaraýǵa kóshti. B.Baıbek Doktrınany eki aı boıy talqylaý barysynda kóptegen syndarly usynystar túsip, onyń bári qaralyp, qujattyń sońǵy redaksııasy sezge usynylyp otyrǵanyn aıtty. Keshegi seksııalyq talqylaýlarda sezde sóıleý úshin birneshe adam belgilendi, deı kelip, partııa Tóraǵasynyń birinshi orynbasary alǵashqy sózdi Parlament Senatynyń depýtaty, Qazaqstan Jazýshylar odaǵy basqarmasynyń tóraǵasy Nurlan Orazalınge berdi (Qaıratker qalamgerdiń sózi gazettiń búgingi nómirinde bólek jarııalanyp otyr).

Kelesi sóz kezegi úkimettik emes uıymdardyń ókili, partııa Doktrınasyn ázirleý jónindegi jumys tobynyń múshesi, Ulttyq, qoǵamdyq «Altyn júrek» syılyǵyn uıymdastyrý komıtetiniń tóraıymy Juldyz Omarbekovaǵa berildi. Búgin sizderdiń aldaryńyzda sóz sóıleý men úshin úlken mártebe. Men on jyldan astam ýaqyt boıy qaıyrymdylyq qorynda jumys isteımin. О́z jumysymda «jalǵyz aǵash orman emes» degen uǵymmen jıi ushyrasamyn. Biraq sol jalǵyz aǵash kóp adamdarǵa saıa da bola alady eken. Búgingi tańda qaıyrymdylyq salasyndaǵy jobamyz búkilhalyqtyq qozǵalysqa ulasty, dedi ol. Odan ári J.Omarbekova partııa Doktrınasynyń talaptaryna toqtala kelip, óziniń oıynsha «myqty ult» degenimiz memleket damýy men órkendeýine úles qosýǵa daıyn turatyn jaýapty azamattardyń uıymy ekenin aıtty. Sondyqtan da barshamyz qol qýsyryp qarap otyrmaı, óz ómirimizdi jaqsartýǵa umtylyp, Qazaqstannyń órkendeýine belsene atsalysýymyz kerek. Saıyp kelgende, memlekettiń jetistigi onyń árbir azamatynyń jetistigimen ólshenedi, dedi sheshen. Sóz sóıleýshi kelesi kezekte óz jobasynyń barysy týraly áńgimeledi. Sońǵy on jylda, dedi ol, «altyn júrekti» azamattarymyz 100 mıllıard teńgeniń qaıyrymdylyq kómekterin jasap, kóptegen áleýmettik nysandar saldy. Osy jyldyń ózinde Aqtóbe oblysynyń Qobda aýdanynda 350 oryndyq balabaqsha, Almaty oblysynyń Jylandy aýylynda 650 oryndyq mektep, sport kesheni, mádenıet úıi boı kóterdi. Árıne, munyń bári el damýyna qosylǵan az ǵana úles. Degenmen, ıgilikti istiń úlken-kishisi bolmaıtynyn nyq senimmen aıta alamyn. Bolashaqtyń kilti – berekeli birlikpen jasalatyn tirlikte, dedi J.Omarbekova.

Sondaı-aq, ol óz bastamalaryn iske asyrýda partııadan birneshe ret kómek surap, únemi qoldaý kórip kelgenin yrzalyqpen atap ótti. Bıyldyń ózinde ǵana biz «Nur Otannyń» qoldaýymen jetim balalar arasynda fýtboldan birinshi respýblıkalyq chempıonat ótkizdik. Oǵan elimizdiń túkpir-túkpirinen 115 bala qatysty. Jeńimpaz atanǵan «Esil» balalar úıi Ispanııaǵa aparatyn týrıstik joldamany jeńip alyp, ataǵy jer jaratyn «Barselona» klýbymen kezdesti. Osyndaı baqytqa ıe bolǵan balǵyndardyń júzderi shattyqtan qalaı bal-bul janǵanyn kórseńizder ǵoı. Endi osyndaǵy keıbir jetkinshekterdi kásibı fýtbol klýbtary ózderine tartýǵa tyrysyp júr, dedi ol. Sóziniń sońynda sheshen óz taǵdyrymyzdy jaqsartý ózimizdiń qolymyzda ekenin atap kórsetti.

Sóz sóıleýshige alǵys aıtqan B.Baıbek endigi kezekti partııanyń Saıası doktrınasyn ázirleý tobynyń múshesi, Májilis depýtaty Máýlen Áshimbaevqa usyndy. Búgingi sezdiń kún tártibine partııamyz úshin mańyzdy máseleler enip otyr, dep bastady sózin depýtat. Solardyń biri ári negizgisi ­– Elbasymyzdyń tapsyrmasymen ázirlengen partııamyzdyń Saıası doktrınasynyń jobasy. Onda elimizdiń strategııalyq múddeleri men partııamyzdyń maqsattaryna qatysty naqty ári aıqyn basymdyqtar belgilengen. Osy sezde ol qabyldansa, Saıası doktrınanyń bastamalar men baǵdarlamalarǵa arqaý bolatyny sózsiz.

Doktrınany partııanyń jańa damý kezeńine jol ashady deýge tolyq negiz bar. Sondyqtan ol jaıyndaǵy bir-eki oıymdy ortaǵa salsam, degen depýtat, birinshiden, onyń óte ýaqtyly qabyldanyp otyrǵanyn atap kórsetti. Ekinshiden, óte ózekti máseleler qarastyrylǵanyn jáne onyń partııa kóshbasshysynyń el aldyna álemdegi ozyq 30 eldiń qataryna qosylý syndy strategııalyq mindetimen sabaqtasyp jatqanyn aıtyp ótti. Osyǵan baılanysty, biz barlyq múmkindikterimizdi, resýrstarymyzdy elimizdiń sapaly damýyna burýymyz qajet. Oǵan jetý úshin aýqymdy ınvestısııa­lar men ekonomıkalyq ósimder kerek. Bul rette adamı faktorlar alǵa shyǵady. Álemdik tájirıbe kórsetkendeı, mundaı maqsattardy belsendi, órshil ulttar ǵana oryndaı alady. Al ondaı ultty birinshi kezekte birlikti tý kótergen dúnıetanymdyq kózqarastar jasaıdy. Sondyqtan, qoǵamymyzǵa adamzattyq turǵydan qaraı alýymyz óte mańyzdy. Bul, túptep kelgende, memleketimizdi jańǵyrtýy­myzdyń basty faktory. Doktrına osy maqsat úshin jumys isteýi tıis, degen Máýlen Saǵathanuly: «Doktrınanyń ereksheligi nede?» degen rıtorıkalyq saýal tastap baryp oıyn jalǵap, ol onyń ıdeologııalyq qujat bolýynda dep túıdi.

Osydan keıin ol óz sózin Dok­trınadaǵy zań ústemdigi másele­si­ne qaraı burdy. Quqyqtyń ústem­digi, zańnyń ústemdigi halyqqa qyzmet etýimen qundy. Jáne onyń zamanaýı aǵymǵa ilesýi mańyzdy, bul oraıda Májilis depýtattary jumystaryn jalǵastyra beredi. Eger qujatty sezd qoldaıtyn bolsa, bizdiń aldymyzda atqarylatyn orasan jumystar tur. Osylaı degen sheshen ári qaraı Doktrınanyń saıası tuǵyrnamalyq turǵydaǵy jańalyǵyn sóz etti. Ol – partııa­ny ortalyqtandyrý máselesi eken. Ortalyqtanǵan ba­ǵyt barlyq qazaqstandyqtardyń múd­desin kózdeýi tıis, al osyndaı kóptegen ıgilikti maqsattardy, jos­parlardy júzege asyrýdaǵy bas­­ty másele – toptasqandyq. Bul qujatta Elbasy Nursultan Na­zar­baevtyń ustanǵan saıasaty ja­zyl­ǵan. Eldi biriktirý, básekege qa­biletti memleket qurý – basty maqsat.

Depýtat sózinen keıin kelesi rette mıkrofon «Erke Nur» kompanııasynyń prezıdenti, ujymdaǵy bastaýysh partııa uıymynyń tóraıymy Farıda Merhamıtqyzyna usynyldy. «Táýelsizdik – bar baqyttyń bas­taýy. Jer júzindegi bar qazaqtyń júregi Qazaqstan dep soǵady. Qazaqtyń jeruıyǵy – Qazaqstan», dep tebirene sóz bastaǵan, bıznestiń kórigin qyzdyryp júrgen isker qyz Qytaıdan atamekenge qonys aýdarǵan alǵashqy oralman jastyń biri. Táýelsizdikpen birge elge oralý baqytyna ıe bolǵan mıllıondaǵan qandastarymyzdyń atynan ózińizge basymdy ıemin, degen ol ári qaraı óziniń Qazaqstan halqy Assambleıasynyń múshesi ekenin aıtty. Qurmetti Nursultan Ábishuly, dedi ol kelesi kezekte Prezıdentke qarap. 1999 jyly Assambleıanyń «Dostyq úıinde» bir kórme ótti. Onda Sizge gúl usynǵan meniń kishkentaı sábıimdi qolyńyzǵa kóterip, batańyzdy berip edińiz. Sol joly ulttyq kıimdi tigýdi qolǵa alǵan meniń jumysymdy da joǵary baǵalaǵansyz. Múmkin, sol Sizdiń batańyzdyń shapaǵaty shyǵar, 5-6 tigin máshınesinen bastaǵan jumysym ósip-óndi. Qudaıǵa shúkir deımin, aldymnan qıyndyqtar da shyqty, biraq ulttyq ónerge degen talpynysym qıynshylyqtardy jeńýge kúsh-qýat berdi. Búginde «Erke Nur» kompanııasy kóp baǵytta jumys isteıdi.

Muqaǵalı aqynnyń: «Kúpi kıgen qazaqtyń qara óleńin, Shekpen jaýyp ózine qaıtaramyn», degenindeı, men de qazaqtyń ulttyq ónerin sandyqtyń túbinde jatqan jerinen alyp shyǵyp, qaıta jańartyp, halyqtyń ózine qaıtarýdamyn. Siz, Nursultan Ábishuly, «Qazaqstan-2050» Strategııańyzda ekonomıkalyq klaster baǵytyn damytýdy jolǵa qoıý qajettigin kórsettińiz. Kásipker retindegi armanym ári usynysym – jún-toqyma isin myqty bir klasterge aınaldyrý edi. О́ıtkeni, biz erte zamannan jip ıirip, jún basqan qazaqpyz ǵoı. Ákeden balaǵa, shesheden qyzǵa berilgen qasıetti kásipti búgingi kúnniń talabymen halqymyzdyń ıgiligine aınaldyrsaq, degen onyń oıyn kópshilik óte jyly qabyldady.

Tatıana Novıkova – sezge qatysýshy jas delegattardyń biri. Ol qalalyq máslıhattyń jas depýtaty eken. Qostanaıdan kelgen T.Novıkova ózi úshin osy jyldyń óte erekshe jyl ekendigin aıtýmen sózin bastaǵan. Men 23 jasymda Qostanaı qalalyq máslıhatynyń depýtaty atandym. Qala turǵyndary maǵan úlken senim artty, sondyqtan qazir ózimdi tek otbasym aldynda ǵana emes, myńdaǵan saılaýshylarymnyń aldynda da jaýapkershilik ıesi retinde sezinemin. Men olardyń ózime artqan úmitin aqtaýym qajet. Okrýgimde 9 myńdaı adam ómir súrip jatyr. Olardyń árqaısysynyń problemalary, sheshilmegen túıinderi men san salaly saýaldary bar. Qoǵamdyq kúndelikti qabyldaýlarymyzǵa ondaǵan adamdar kelip, partııadan qoldaý kútedi. Olardyń osylaısha bizge júginýi máslıhattar jumysynyń tıimdiligin kórsetedi. Sondyqtan da men árbir depýtat jumysynyń basty qaǵıdaty – naqty adamǵa naqty kómek bolýy tıis dep uǵynamyn, dedi ol.

Qalamyzdaǵy jastar saıasa­tynyń kýratory retinde jastar­dy tolǵantatyn máselelerdi bilemin dep aıta alamyn, dep jalǵady sózin jas delegat. Birinshi kezekte ol – sapaly bilim, jaqsy jumys, qoljetimdi turǵyn úı. «Jas Otan» jastar qanatynyń ókilderi jergilikti ózin-ózi basqarý organdarynda jumys istep, jastardyń múddeleri men quqyqtaryn qorǵaýda. Máselen, Qostanaı qalasynda jas depýtattar 70 paıyzdy quraıdy. Al elimiz boıynsha ol kórsetkish 3 paıyz shamasynda. Biz óz elimizdiń adamdaryn erkin, zańy men dástúrlerin qurmetteıtin, qundylyqtaryn ulyqtap ustanatyn azamattar retinde kórgimiz keledi. Osy turǵyda jastar saıasatyna Doktrınada basymdyq berilýi ózin aqtaıtyny sózsiz. Bul Qazaqstannyń bolashaqtaǵy orasan tabysynyń sarqylmas kózi. Osylaı degen sheshen ári qaraı taza qazaq tilinde: «Qazaqstan – meniń jerim, meniń Otanym. Meniń oıymsha, árbir azamat ultyna qaramastan, óz eliniń salt-dástúri men tilin qurmetteýi tıis. О́ıtkeni, til – halyq qazynasy», dep baryp, oıyn ári qaraı jalǵastyrdy.

Qurmetti Nursultan Ábishuly, byltyrǵy jyldyń qarasha aıynda Siz jastar aldyna naqty mindetter qoıǵan bolatynsyz. Soǵan baılanysty myńdaǵan adamdar qulaq asyp, qazirdiń ózinde olar «Sátti qadam», «Jastar – Otanǵa», «Dıplommen – aýylǵa!» baǵdarlamalaryn oryndaýda. Bul árbir jastyń joǵary maqsattarǵa umtylýyna yqpal etedi.

Máselen, aýylda Mádenıet úıi bolmasa da úıirmeler ashyp, senbilikter ótkizip, qarııalarǵa, ardagerlerge kómektesip, osyndaı kishigirim qadamdar jasaý arqyly qoǵamymyzdyń adamgershilik bet-beıneleri ózgere túsýde. Bul – óte mańyzdy. Osyndaı jasalǵan sharýalardan eliniń qamyn oılar azamattar ósip shyǵady. Meni ata-anam da osyndaı baǵytta tárbıeledi. Men ózimdi týǵan qalamnyń patrıoty retinde sezinip, onyń ósip-órkendeýine óz úlesimdi qossam deımin, degen onyń sóziniń sońy qol shapalaqtaýǵa ulasty.

Kelesi sóz Qazaqstan Respýblıkasy Prezıdenti Is basqarmasy Medısınalyq ortalyǵynyń «Oqjetpes» emdeý-saýyqtyrý kesheni» AQ prezıdenti Qanat Tósekbaevqa berildi. «Memleket elge qyzmet etedi» seksııasy aıasynda ótken talqylaý barysynda oǵan qatysýshylar memlekettik organdar qoǵamǵa qyzmet kórsetýdi kúsheıtip keledi degen pikir bildirdi. Osy turǵydan kelgende, Doktrınada: «Memleket azamattardyń múddelerine qyzmet etýge baǵyttalatyn bolady», dep naqty jazylǵan. Mundaı qaǵıda bizdiń kóz aldymyzda júzege asýda. Táýelsizdik alǵan jyldarda turǵyndar turmys jaǵdaıynyń artýy qoǵam turaqtylyǵynyń, onyń daǵdarystarǵa tótep berýiniń kepili boldy. Partııa birizdilikpen osy baǵytta jumys istep keledi. Turǵyndardyń bilim berý men densaýlyq saqtaý qyzmetine, áleýmettik jáne zeınetaqy tólemderine qoljetimdigin qamtamasyz etý «Nur Otan» jumysy tıimdiliginiń ólsheýishi bolyp tabylady. Jemisti áleýmettik saıasat erteńgi kúnge degen senimdi arttyrady, dedi ol.

Q.Tósekbaevtyń paıymynsha, áleýmettik saıasat máselesinde bılik pen halyq teń quqyqty áriptes retinde áreket etýleri tıis. Tek memleket, jumys berýshi jáne azamattardyń ózara yntymaǵy bolǵanda ǵana joǵary nátıjelerge qol jetkizilmek. Osy oraıda «Oqjetpes» bastaý­ysh partııa uıymy turaqty negizde turǵyndardyń áleýmettik az qorǵalǵan jigine ataýly kómek kórsetip kele jatyr eken. Ústimizdegi jyly atalǵan uıym turmysy tómen otbasy balalaryn mektepke daıyndap, óńirlik búldirshinder úılerine demeýshilik qoldaý uıymdastyrypty.

О́z áriptesterimizben tájirıbe almasýdamyz jáne ózge de kásip ıelerin adamdar múddesin birinshi orynǵa qoıýǵa shaqyramyz, dep sózin sabaqtaǵan sheshen bul ásirese, bıýdjettik mekemelerde jumys isteıtinder úshin mańyzdy ekenin basa aıtty. Memlekettiń azamattar aldyndaǵy jaýapker­shiligin baǵalaý da osy jumystarǵa negizdeledi. Jumys tıimdiligi – turǵyndar seniminiń basty kepili. О́tken jyly Astanada «E-skoraıa» jobasy iske qosyldy. Jedel kómek kólikterin IR-telefon, GPS-baǵyttaý jáne medısınalyq anyqtamalyqpen jabdyqtaý arqyly jaqsy nátıjelerge qol jetkizilgen.

Birinshiden, qalanyń alys aýdandaryna 15 mınýt ishinde jetip, medısınalyq kómek kórsetý ýaqytyn qysqarttyq; ekinshiden, resýrstyq shyǵyndar azaıdy; úshinshiden, onlaın rejimi arqyly aýrýhanalar men emhanalardan konsýltasııa alýǵa múmkindik týǵyzdyq. Tótenshe jaǵdaıda árbir sekýnd adam taǵdyryn shesherin eskersek, joba jańashyldyq retinde jańa ıdeıalar men shyǵarmashylyq qadamdar arqyly adamdarǵa ómir syılaýǵa bolatynyn kórsetti, deı kele, Q.Tósekbaev «E-skoraıa» Qazaqstanda patenttelgenin erekshe maqtan tutatynyn erekshe maqtanyshpen jetkizdi. Onyń aıtýynsha, memleketimizde azamattar úshin barlyq jaǵdaı jasalǵan. Tabysty bolý ár adamnyń tek kózdegen maqsattary men ańsaǵan armanyna jetý jolyndaǵy qajyrlylyǵyna baılanysty.

Qyzylorda oblysy Jańaqor­ǵan aýdany Sýnaq ata aýylynyń ákimi Azııa Qystaýbaevaǵa sóz berildi. Ol «Nur Otan» par­tııasynyń sezinde sóz sóıleý múmkindigine ıe bolǵany úshin taǵdyryna rıza ekenin erekshe tebirenispen jetkizdi. Qasıetti Syr topyraǵynan, qazaq handyǵynyń ortalyǵy bolǵan Syǵanaq qalasynyń ornyna qonystanǵan Sýnaq ata aýylynan kelgen sheshen óziniń basynan ótken jaıtpen de bólise ketkendi jón kórdi. Ol táýelsizdik alǵan jyldary búkil halyq qıyndyq kórdi, dedi. «Jumyssyz qalǵan kezimde Siz, Nursultan Ábishuly, túsime enip, qolymdy alyp, jaǵdaıymdy suradyńyz. Barlyq nárseni jaqsyǵa balaıtyn qazaqpyz ǵoı. Artynsha eldiń jaǵdaıy túzelip, ózim aýyl ákimi bolyp taǵaıyndaldym. Sodan beri 20 jyl ótti. Qazir qýansaq ta, qınalsaq ta aýzymyzǵa Alla taǵala, Elbasy amandyǵy, halyqtyń birligi túsedi. Qazaqstan – tabysty memleket dep qaıtalaǵanmen, astarynda halyqtyń qajyrly eńbegi men birligi, eń bastysy, Elbasyna degen erekshe senimi jatyr.

Memleketimiz jańa damý kezeńine qadam basqandyǵyna baıan­damashy birneshe mysal keltirdi. «Qazaqstan-2050» Strategııasy qabyldandy. Ákimder saılaýy ótip, quzyreti kúsheıtildi, dedi A.Qystaýbaeva. Onyń aıtýynsha, kúni keshe aýyldyń ortalyq eki kóshesine asfalt, al úsh kóshesine tas tóselipti. Osy rette okrýgte aýyz sý máselesi tolyǵymen sheshilgendigi, sońǵy úsh jylda úsh aýylda da jańa mektepter, mádenıet úıi, sport jáne balalar oıyn alańdary salynǵandyǵy atap kórsetildi. Ásirese, aýyl irgesinen ótip jatqan «Batys Eýropa – Batys Qytaı» kólik dálizi men «Beıneý – Bozoı – Shymkent» gaz qubyry kásipkerliktiń damýyna yqpal etýde eken. 2000-jyldary memleketten 120 myń teńge qarajat bólinip, jetpegen jeri asarlatyp, Eńbek aýylynda medpýnkt salynypty. Sonda qarııalar 70 jyl boıy Keńes ókimetiniń salmaǵan dúnıesine tek táýelsizdiktiń arqasynda qol jetkizdik, soǵan myń qaıtara shúkir, dep rıza bolysqandyǵy da alǵa tartyldy.

Qurmetti Nursultan Ábishuly! Siz qarapaıym jumysshydan Elbasyna deıingi jemisti eńbektiń ónegeli jolyn kórsetip kelesiz. Men de eńbek jolymdy mehanızator bolyp bastaǵanymdy maqtanysh etemin, dedi A.Qystaýbaeva sóziniń sońyna qaraı. Jer-Ananyń erinbeı eńbek etken adamǵa berer rızyǵy mol. Elbasy bastap, «Nur Otan» qostap, qazaqtyń altyn ǵasyry úshin aıanbaı eńbek eteıik.

Delegattar pikir bildirip bolǵan soń sezde Qazaqstan Respýblıkasynyń Prezıdenti, «Nur Otan» partııasynyń Tóraǵasy Nursultan Nazarbaev sóz sóıledi.

Memleket basshysy N.Nazar­baev­tan keıin sóz alǵan «Nur Otan» partııasy Tóraǵasynyń birinshi orynbasary Baýyrjan Baıbek: «Elbasy qoıǵan mańyzdy mindetterdi oryndaý maqsatynda, eldi biriktirýde bar kúsh-jigerimizdi aıanbaı jumsaımyz dep senim bildirýge ruqsat etińizder», dedi sezd qatysýshylaryna qarata aıtqan sózinde. Osylaı deı kele, ol kún tártibinde turǵan máseleler boıynsha qaýly qabyldaý qajettigin atap ótti. Bul rette: «Sizderdiń qoldaryńyzda Doktrına jobasy bar. Ol keńeıtilgen Saıası keńeste qabyldanǵan bolatyn. Sezde birqatar jaqsy usynystar kelip tústi. Olardyń eń bastysy, Saıası doktrınany qabyldaý», deı kele, partııa Doktrınasyn qabyldaýdy usyndy. Partııa Tóraǵasy birinshi orynbasarynyń bul usynysyn sezge qatysýshylar tolyqtaı qoldap, nátıjesinde partııanyń jańa Doktrınasy qabyldandy.

Budan keıingi kezekte kún tártibiniń ekinshi máselesi týraly sóz qozǵaǵan B. Baıbek partııanyń atrıbýttaryn ózgertý máselesine toqtaldy. Bul oraıda, ol: «Halyqaralyq praktıkada saıası partııalar ózderiniń ıdeologııalyq ustanymdaryn kórsetedi. Soǵan baılanysty bizdiń ortalyq ıdeologııamyz Doktrınada kórsetilgen. Bizdiń halqymyzdyń arasynda partııany «Nur Otan» partııasy dep ataıdy. Sondyqtan, partııanyń ataýynan «halyqtyq-demokratııalyq» degen sózdi alyp tastaý usynyldy. Osyǵan oraı, Saıası keńeste partııanyń ataýyn qaıta ózgertý jóninde usynys engizildi. Endi partııa «Nur Otan» dep atalady». Osylaı degen ol partııanyń jańa ataýynyń bekitilgenin jarııa etti.

Budan keıingi kezekte B.Baıbek «Nur Otan» Saıası keńesiniń partııalyq sımvolıkany da ózgertýdi usynǵanyn atap ótti. «Máselen, XV sezdiń logotıpinde jańadan atyp kele jatqan kún beınelengen. Buǵan qosa, taýdyń kórinisi bar. Bul bizdiń bıik murattarymyzdy beıneleıdi. Al qar barysy táýelsizdigimizdiń kórinisi. Logotıptegi «Nur Otan» jazýy partııanyń bizdiń elimizdiń damýyna qosqan úlesin kórsetip otyr. Demek, partııa uıystyrýshy ról atqarýy tıis. Sondyqtan da keshe Saıası keńes osy emblemany qoldaý jáne qabyldaý jóninde usynys bildirgen bolatyn», deı kele, partııanyń jańa emblemasyn qabyldaý jónindegi máseleni daýysqa saldy. Onyń bul usynysyn da sezge qatysýshylar túgeldeı qoldady.

Sezd aıasyndaı, sondaı-aq partııa Jarǵysyna ózgerister men tolyqtyrýlar engizildi. Bul ózgerister boıynsha partııanyń múshelik jarnasy 94 teńgeden 187 teńgege ósti. Iаǵnı, aılyq eseptik kórsetkishtiń 1 paıyzyna deıin ulǵaıtyldy. Stýdentter úshin bul kórsetkish 9,3 teńgeden 19 teńgege ósti. Al jumyssyzdar, bala kútimimen otyrǵan áıelder múshelik jarnadan bosatylady, dedi B. Baıbek bul oraıda.

Sonymen qatar, partııa Saıası keńesiniń quramyna da ózgerister engizildi. Bul másele kadrlyq ózgeristerge sáıkes, sondaı-aq, birqatar fılıaldarǵa jańa basshylardyń kelýine baılanys­ty júzege asyryldy. Saıası keńes partııanyń organy bolǵandyqtan, barlyq qoǵam músheleri jáne barlyq óńirler qamtylýy tıis. Osyǵan oraı, Saıası keńeske ózgerister engizý usynylyp, ol keńeıtilgen otyrysta talqylanǵan bolatyn, dedi partııa Tóraǵasynyń birinshi orynbasary. Budan keıingi kezekte «Nur Otan» Saıası keńesiniń quramynan birqatar partııa músheleri shyǵarylyp, onyń quramy jańa azamattarmen tolyqty. Saıası keńestiń jańa quramyna kirgen azamattardyń ishinde «Egemen Qazaqstan» respýblıkalyq gazeti» AQ prezıdenti Saýytbek Abdrahmanov bar.  

Búginde partııanyń Saıası keńesi 49 paıyzǵa jańartylyp otyr. Al onyń quramyndaǵy áıelder sany 60 paıyzǵa jetti. Iаǵnı, Saıası keńestiń quramyndaǵy áıelderdiń paıyzdyq kórsetkishi 11 paıyzdan shamamen 30 paıyzǵa kóterildi, dedi B.Baıbek. Búginde partııanyń quramynda tek memlekettik qyzmetkerler ǵana emes, ózge de mamandyq ıeleri kóp. Máselen, partııa quramyn­daǵy memlekettik qyzmet­ker­lerdiń sany 46 paıyzdan 28 paıyzǵa deıin tómendegen. Olar­dyń ornyna úkimettik emes uıymdar men mádenıet, bilim-ǵylym, densaýlyq saqtaý salalary ókilderiniń, sportshylardyń sany artyp otyr. Osyǵan oraı, partııanyń Saıası keńesiniń jańadan taǵaıyndalǵan quramyn quttyqtaı kele, olardyń qyzmeti­ne tabys tileımiz, dedi partııa Tóraǵasynyń birinshi orynbasary.

Budan keıingi kezekte B.Baıbek partııa Jarǵysyna sáıkes, Saıası keńestiń taǵaıyndaýymen Saıası keńes Bıýrosynyń músheleriniń quramy da qaıtadan jańartylatynyn jetkizdi. Osyǵan oraı, sezd aıasynda Saıası keńes Bıýrosynyń quramyna da ózgerister men tolyqtyrýlar engizildi, sondaı-aq, partııanyń baqylaý-tekserý organdarynyń birqatar máseleleri qaraldy.

B.Baıbek Memleket basshysyna barlyq delegattar atynan sezd jumysyna qatysqany úshin alǵysyn bildirdi. Búgingi sezd partııa kóleminde ǵana emes, memleket tarıhyndaǵy mańyzdy kezeń. Sizdiń búgingi baǵdarlamalyq baıandamańyz partııa jumysynyń negizgi strategııalyq ustanymy bolyp tabylady. Osy múmkindikti paıdalana otyryp, barlyq partııa músheleri atynan Siz qoıǵan mindetterge saı bolyp, elimiz, jurtymyz bolyp, Qazaqstannyń jarqyn bolashaǵy úshin bar kúsh-jigerimizdi salyp, aıanbaı eńbek etýge senim bildirýge ruqsat etińiz, dedi ol.

Sondaı-aq, sezde «Nur Otan» partııasynyń Kóshbasshysy Nur­sul­tan Nazarbaevtyń tóraǵalyq etýimen partııa Saıası keńesi Bıý­rosynyń keńeıtilgen otyry­sy ótip, onda «Nur Otan» par­tııa­synyń jańǵyrtylýyna, partııa apparatynyń jumys tıimdiligin túbegeıli arttyrýǵa baılanysty naqty tapsyrmalar berildi.

Sýretterdi túsirgen S.BONDARENKO, B.OTARBAEV.

 

*Sezge qatysýshylar lebizi

Raýyl AHMETJANOV,

«Nur Otan» partııa­sy Qostanaı oblysy, Jangeldın aýdandyq fılıaly tóraǵasynyń birinshi orynbasary:

– Partııanyń bul sezi elimiz úshin, búkil qazaqstandyqtar úshin jóni bólek, úlken tarıhı oqıǵa boldy dep esepteımin. Elbasy, «Nur Otan» partııasynyń Tóraǵasy Nursultan Nazarbaev sezde sóılegen sózinde ótken jyly jarııa etilgen «Qazaqstan-2050» Strategııasy Qazaqstandy álemde ozyq damyǵan otyz eldiń qatarynan kórinýge jetkizetin qujat ekenin atap ótti. Uzaq merzimge arnalǵan strategııanyń basty maqsaty osy bolatynyn qadap aıtty.

Joǵaryda aıtqanymdaı, partııanyń bul sezi – biz úshin tarıhı oqıǵa. О́ıtkeni, «Nur Otan» partııasy qurylǵan­nan bergi 15 jyl ishindegi jumysynyń qorytyndysy shyǵarylyp, partııanyń bola­shaqtaǵy baǵyt-baǵdary aıqyndaldy. Memleket basshysy atap ótkendeı, Qazaq elin damýdyń dara jolyna bastaý eli­mizdegi eń qýatty saıası kúsh – «Nur Otan» partııasyna júktelip otyr.

Ábdijappar QYSTAÝBAEV,

Almaty oblysy, Balqash aýdanyn­da­ǵy «Birlik» agrofırmasynyń bas dı­rektory, oblystyq máslıhattyń depýtaty:

– Jańa ǵana «Nur Otan» partııasynyń Doktrınasy qabyldanǵanyna kýá boldyq. Qujatta partııanyń HHI ǵasyrdaǵy negizgi mıssııasy kórsetilgen. Doktrınada basty ıdeıa elimizdi órkendetý bol­sa, al Táýelsizdik – elimizdiń eń bas­ty jetistigi retinde qa­rastyrylǵan. Táýel­siz­dik alǵan jyldan bergi kezeńder tájirıbesi kór­setkendeı, myzǵymas birlik pen yntymaq Qazaqstandy búginde álemge ta­nyt­ty. Sonyń ıgilik-shapaǵatyn kórip kelemiz.

Elbasy – partııa Tóraǵasy jastar elimizdiń altyn qory ekendigine erekshe nazar aýdardy. Elimizde júzege asyrylǵan jáne aldaǵy ýaqytta júzege asyrylatyn keshendi baǵdarlamalardyń barlyǵy, eń aldymen, jastar úshin jasalyp jatqanyn atap kórsetti. Sonyń biri – «Qazaqstan-2050» Strategııasy bolyp tabylady. Sebebi, qazirgi kezde mektep pen joǵary oqý ornyn bitiretin jastar bolashaqta el basqarý isine aralasa bas­taıdy. Strategııa ıgiligin jastar kóretin bolady.

Vladımır REDKOKAShIN,

Senat depýtaty:

– «Nur Otan» partııasynyń kezekten tys XV seziniń ótýi osy saıa­sı qurylymnyń músheleri úshin de, sondaı-aq elimiz úshin de úlken mańyzǵa ıe. Ásirese, «Nur Otan». Nurly bolashaq jolynda!» atty «Nur Otan» partııasynyń Saıası doktrınasynyń qabyldanýy aıtýly oqıǵa boldy. Onda «Nur Otannyń» HHI ǵasyrdaǵy mıssııasy kórinis tapqan. Basty jetistik – Táýelsizdik, basty ıdeıa – elimizdi órkendetý, saıası tuǵyrnama – ortalyqshyldyq jáne saıası murat – Elbasy ekendigi taıǵa tańba basqandaı naqty jazylǵan. Saıası doktrına partııanyń ómir súrý ıdeologııa­sy ǵana emes, ol sonymen qatar, azamattarymyz ál-aýqatyn jáne elimizdiń áleýetin arttyrýǵa negiz qalaıtyn basty qujatymyz. Osy turǵydan kelgende, Elbasy «Qazaqstan-2050» Strategııasyn jarııalaý arqyly elimizdi 30 damyǵan eldiń qataryna qosýdy aldymyzǵa mindet etip qoıyp, sol údeden shyǵýdyń joldaryn aıqyndap berdi.

Azamat AITBAIULY,

Aqmola oblysy Egindikól aýdanynyń ákimi:

– «Nur Otan» partııasynyń bul jolǵy sezin tarıhı sezd dep aıtýǵa bolady. Sebebi, bul sezde partııanyń mańyzdy qujaty qabyldandy. Al Doktrınada Elbasynyń «2050» Strategııasynda kórsetilgen máseleler boıynsha qalaı ilgeri jyljýymyz kerektigi aıqyn jazylǵan. Jastar Memleket basshysy júktegen tapsyrmalardy oryndaıtyn negizgi kúsh bolǵandyqtan, olarǵa úlken úmit artylyp otyr. Sol sebepti, qujatta jastar máselesine úlken kóńil bólingen.     Iаǵnı, bul mańyzdy saıası qujatta jastarmen jumysty kúsheıtýge úlken mán berilgen. Endigi kezekte biz, jastar partııanyń aldyna qoıylǵan maqsat-mindetterdi, onda aıqyndalǵan máselelerdi júzege asyrýǵa bir kisideı jumyla kirisýimiz kerek.Jastar ózderine artylǵan jaýapkershilik júgin tolyqtaı sezinip, memleketti alǵa jyljytý baǵytynda eńbek etýi qajet.

Jasqaırat NUROV,

Pavlodar oblysy Maı aýdanyndaǵy sharýa qojalyǵynyń basshysy:

– Bıylǵy jyly eńbegimiz jemisti bolyp, astyǵymyz jaqsy shyqty. Meniń jeti myń gektardaı egistik alqabym bar. Kombaın, traktorlarym jańa, jetkilikti. Tek aýa raıynyń qolaısyzdyǵynan áli kúnge astyqty jınap bitire almaı jatyrmyz.

Prezıdenttiń shaǵyn jáne orta bıznesti qoldaý baǵdarlamasy boıynsha bizde kóptegen adamdar shaǵyn nesıe alyp, ózderiniń isterin júrgizip jatyr. «Jaılaý» baǵdarlamasy boıynsha mal alýǵa da nesıe alyp jatqandar kóp. Bizdiń de 200-deı jylqymyz, 500-deı qoıymyz, 200 bas qara malymyz bar. Bulardan basqa, janar maı stansasy sııaqty qosalqy tabys kózderi de joq emes.

«Nur Otan» partııasynyń el úshin kóterip jatqan bastamalarynyń bárin de qoldaımyn. Bizdiń elimiz jeke sharýalarǵa úlken qoldaý kórsetýde, sol úshin Elbasyna rızamyz.

«Egemen Qazaqstannyń» tilshiler toby.

Sýretterdi túsirgen Erlan OMAROV.