AQSh prezıdenti Donald Tramp «TıkTok» baǵdarlamasyn el aýmaǵynda qoldanýǵa tyıym salatynyn málimdedi.
Aq úı basshysynyń sózine súıensek, atalǵan qytaılyq baǵdarlama turǵyndardyń jeke málimetine qaýip tóndirýi múmkin. Sondaı-aq ol «Maıkrosoft» kompanııasynyń «TıkTokty» satyp alýǵa nıet bildirgenine de nazar aýdarǵan joq.
«TıkTok máselesine kelsek, biz ony AQSh aýmaǵynda qoldanýǵa tyıym salmaqpyz», dep málimdegen D.Tramp.
CNN arnasynyń habarlaýynsha, Aq úı basshysy baǵdarlamany jabý úshin tótenshe jaǵdaı kezindegi ekonomıkalyq máseledegi quzyretin paıdalanbaq. Resmı Vashıngton atalǵan baǵdarlamany qoldanýshylar derekterin Qytaı bıligine berip otyrǵanyn alǵa tartady. Sondaı-aq jeke málimetteriniń saqtalý qaýipsizdigine, demokratııalyq emes Qytaı úkimetiniń ony túrli maqsatta paıdalaný yqtımaldyǵyna alańdaıdy.
«TıkTok» túrli effektilermen árlengen 15-60 sekýndtyq shaǵyn vıdeony bólisýge arnalǵan áleýmettik jeli. Ol alǵash 2016 jyly Douyin degen ataýmen Qytaıda taralǵan. Keıinnen syrtqy naryqqa shyǵyp, 2018 jyly Muscial.ly kompanııasymen qosylǵan soń ony qoldanýshylar sany arta tústi. Qazirgi tańda «TıkToktyń» 1,5 mıllıardqa jýyq qoldanýshysy bar.