Qazaq sportynyń ótkenin qazbalasań qazynaǵa toly. Árbir sportshynyń jetistikke deıingi júrip ótken joly, jasymaǵan jigeri men óz sportyna degen adaldyǵy adam janyn tebirentedi. Ár jeńistiń artynda tátti estelik, jeńilistiń artynda ashy ókinish turatyny anyq. Jeńisi men jeńilisi qatar júretin sportta qaımyqpaǵan ańyz sportshylardyń erligin búgingi urpaq bilýi tıis.
Ivan Garanın búginde 75 jasqa tolyp otyr. Zamanynyń zańǵary bolǵan Ivan Garanındi zamandastary «Shańǵy koroli» dep ataǵan. Úzdikter kóshin bastap álem chempıonatyn baǵyndyrǵan. KSRO quramynda Olımpııa oıyndarynyń júldegeri atanyp, jankúıerge esten ketpes qýanysh syılaǵan. Olaı deıtin sebebimiz, 1976 jylǵy Olımpııa oıyndarynda KSRO shańǵy quramasy shańǵy jarysynda dál Ivan Garanıniń arqasynda estafeta boıynsha qola júldeni qorjynǵa salady. KSRO komandasynyń quramyna kil myqtylar jınalǵan edi. Dese de, qorytyndy kezeńde Garanın jarys jolyna shyǵatyn bolǵandyqtan oǵan artylǵan jaýapkershilik júgi aýyr edi. Sheshýshi kezeń aldynda KSRO sportshylary 6-orynǵa turaqtady. Jaýapty sátte múmkindikti múlt jiberýge bolmaıtynyn túsingen Garanın jarys jolyna shyǵarda shymyrlyq tanytyp, shańǵysyn saılap úlgeredi.
Insbrýktegi Olımpııa oıyndarynda Ivan Garanın 30 shaqyrymdyq básekede qola júldeger atandy. Alaıda Garanın 50 shaqyrymdy baǵyndyra almaı qalǵanyna áli kúnge deıin ókinetinin aıtady. Sebebi, dál osy shaqyrymda synǵa túskendi jany súıetin, 50 shaqyrymdyq jarysta ábden shynyqqan shańǵy sheberi atanyp úlgergen sportshy edi. Ivan Ivanovıch 75 jasqa kelse de áli shymyr. Ol aptasyna bes ret jattyǵý jasap, 20 shaqyrym qashyqtyqty baǵyndyrady. Myqty sportshy tek ózin emes, aınalasyndaǵylardy da jigerlendirip, rýh berip júredi. Kópke úlgi bolyp, halyqtyń kýmıri atandy. Onyń jeńisti jolyn jalǵastyrǵysy kelgender sanynda shek bolmady. Máselen, táýelsiz Qazaqstannyń tuńǵysh Olımpıada chempıony Vladımır Smırnovty aǵa býynnyń dástúrin sátti ilip áketti deýge bolady. Sebebi, shańǵyshy Smırnov Ivan Garanınniń bastamasyn jalǵastyryp, Olımp shyńyn baǵyndyrdy.