Jaqynda belgili qalamger Ýálıhan Qalıjan áleýmettik jelide Qazaqstannyń halyq jazýshysy, Memlekettik syılyqtyń laýreaty Ábdijámil Nurpeıisov týraly estelikter serııasyn jarııalady. Sonyń biri «Soǵystan qalǵan bir de bir medalim joq» dep atalady eken.
«Surapyl soǵysty kórdim. Biraq maıdan shebinde bolǵanym joq. Fashısterdi de qyryp-joıdym dep aıta almaımyn. Kóbine shtabta jumys istedim...
– Ábe, men biletin derek ózgeshe. Siz uzaqtan atatyn artıllerııanyń quramynda boldyńyz. Onyń oǵy ondaǵan shaqyrymǵa deıin jetpeı me?
– Jetse jeter, biraq qansha fashıstiń joıylǵanyn qaıdan bileıin. Kórgenim joq. Sondyqtan da túrli maıdannan berilgen medaldardy jınap aldym da kózin joıyp jiberdim. Jasamaǵan erlikti qalaı jasadym dep keýdeme qaptatyp taǵyp júreıin.
Túsinikti, túsiniksiz Ábdijámil Nurpeıisov osyndaı Adam!»
Belgili jazýshynyń qandaı nagradalardy joıyp jibergenin kóreıin dep Reseıdiń «1941-1945 jyldardaǵy Uly Otan soǵysyndaǵy halyq erligi» elektrondyq qujattar bankin aqtardyq. Sóıtsek, bolashaq áıgili jazýshy maıdanǵa 1942 jyly shilde aıynda Qyzylorda oblysy Aral aýdanynan shaqyrylyp, Ońtústik, Prıbaltıka, Lenıngrad maıdandarynan ótkendigi anyq jazylyp tur eken. Leıtenant Nurshaıyqov 1945 jyly 10 mamyr kúni 137 zeńbirektik artıllerııalyq polk komandıri, podpolkovnık Komrakovtyń baıanaty boıynsha memlekettik nagradaǵa usynylǵan. Arada 5 kún ótkende, ıaǵnı osydan dál 75 jyl buryn, 1945 jyldyń 15 mamyrynda «Qyzyl Juldyz» ordenimen marapattalypty. Al jaýyngerge «1941-1945 jyldardaǵy Uly Otan soǵysynda Germanııany jeńgeni úshin» medali osydan 5 kún buryn, 9 mamyrda berilgen bolatyn.
«Qyzyl Juldyz» ordeni berilerde usynylǵan marapat qaǵazynda: «Bólimde artıllerııalyq qarý-jaraqtyń esebin júrgizgende uıymdastyrýshylyq qabiletin kórsetti, quraldardyń jaramdylyǵyn tikeleı ózi qadaǵalady, tipti aýyr urys kezinde atý beketine úzdiksiz oq-dári jetkizip, batareıalar árdaıym qamtamasyz etilip otyrdy» dep jazylǵan eken.
Mine, erlik umytylmaıdy degen osy da.
Batys Qazaqstan oblysy