Álemniń jetekshi kompanııalaryn tańdandyrý ońaı emes. Desek te, Atyraýdaǵy Nazarbaev zııatkerlik mektebiniń oqýshysy Asqar Álmuhametov dombyra shertýdi úıretetin sımýlıator jasap, Apple kompanııasynyń ınnovasııalar jobasyna usynǵan edi.
Jaqynda Asqar Álmuhametov Nazarbaev zııatkerlik mektebiniń 10 synybyna barady. Ol buǵan deıin birneshe ret respýblıkalyq, halyqaralyq deńgeıdegi startap konkýrstarǵa qatysyp, jeńimpaz atanǵan bolatyn. Onyń avtorlyq úzdik jobalarynyń – «Qulynym» mobıldi qosymshasy. Oǵan mektepke deıingi balalar úshin qazaq tildi kontent jınaqtaǵan edi. Keleshekte IT salasyn jetik meńgerip, ulttyq tehnologııany jańǵyrtýdy kózdep otyr.
– Álemge áıgili Stıv Djobs negizin qalaǵan Apple kompanııasy baǵdarlama jasaýmen aınalysatyn jastardy yntalandyrý úshin jyl saıyn ınnovasııalyq jobalar baıqaýyn ótkizedi. Aldymen konkýrstyń sharty boıynsha úzdik jumystar irikteledi. Odan soń kompanııa ókilderi jobanyń avtorlarymen baılanysqa shyǵady. Men bul konkýrsqa dombyra tartýdy úıretetin sımýlıatordy usyndym. Sımýlıatordy Swift baǵdarlamasymen jasadym, – deıdi Asqar Álmuhametov.
Konkýrs qorytyndysynda jobalary úzdik dep tanylǵan jeńimpazdar kompanııa qarjylandyratyn bilim grantyna ıe bolady eken. Bul grant daryndy jastardyń San-Fransısko qalasyndaǵy (AQSh) Apple keńsesinde tájirıbe jınaýyna múmkindik beredi. Alaıda bıyl álem elderin shyrmaýyqtaı shyrmaǵan pandemııaǵa baılanysty bul jospar keıinge qaldyrylyp otyr. Biraq jaqynda Apple kompanııasy atyraýlyq ónertapqysh oqýshy Asqar Álmuhametovtiń ónertapqyshtyq eńbegin baǵalap, yntalandyrý úshin kúzgi kúrteshe, kádesyı men arnaıy dıplom jiberdi.