Anglııanyń Sheffıld qalasynda snýkerden 31 shilde kúni bastalǵan álem chempıonaty óziniń sheshýshi kezeńine de kelip jetti, – dep habarlaıdy Egemen.kz.
Jartylaı fınalda álemniń bes dúrkin chempıony Ronnı O'Sallıvan dúnıejúzilik reıtıngte 7-orynda turǵan Mark Selbıdi asa tartysty ótken oıynda 17:16 esebimen tize búktirdi.
Al ekinshi jartylaı fınaldaǵy Kaıren Ýılson - Entonı MakGıll arasyndaǵy jekpe-jek te dál osyndaı eseppen aıaqtalyp, nátıje alǵashqysynyń paıdasyna sheshildi. Aıta ketý kerek, snýker tarıhynda jartylaı fınaldardaǵy oıyn nátıjeleriniń dál osyndaı eseppen aıaqtalýy tuńǵysh ret kezdesip otyr.
Snýker oıynyndaǵy deńgeıi eń joǵary týrnırdiń bas júldesin fınalda sarapqa salatyn Ronnı O'Sallıvan men Kaıren Ýılson buǵan deıin túrli týrnırlerde alty ret kezdesip, ózara kim myqtyny anyqtaǵan eken. Ázirge, jalpy esepte 4:2 esebimen Ronnı O'Sallıvan alda tur. Aıta ketetin bir jaıt, bul qos snýkershiniń joly fınaldyq oıyndarda eki ret túıisipti. Alǵash ret olar 2017 jyly English Open týrnıriniń sheshýshi kezeńinde kúsh synastyryp, Ronnı O'Sallıvan 9:2 esebimen basym túsipti. Sondaı-aq, 2018 jyly ótken Champion of Champions dodasynyń fınalynda taǵy da Ronnı O'Sallıvan 10:9 esebimen jeńiske jetken eken.
Bıylǵy álem chempıonatynyń júlde qory £2,400,000 quraıdy (shamamen 1 317 765 467,52 teńge). Chempıonǵa £500,000 tıesili bolsa, jeńilip qalǵan snýkershi 200,000 fýnt sterlıngpen kóńil jubatady.
Snýkerden álemniń 2020 jylǵy chempıony erteń, 16 tamyz kúni belgili bolady. Eger, 45 jastaǵy Ronnı O'Sallıvannyń qoly júrip berse, áıgili snýkershi álemniń alty dúrkin chempıony atanady. Al 28 jastaǵy Kaıren Ýılson ǵaıyptan taıyp jeńer bolsa, ol óziniń sporttyq mansabyndaǵy eń joǵary ataqqa tuńǵysh ret qol jetkizedi.