Derek boıynsha Qazaqstanda ınternet tutynatyn abonentter sany 17,5 mln adamǵa jetken. Onyń ishinde 15 mln tutynýshy ǵalamtor qyzmetin uıaly baılanys jelisi arqyly paıdalanyp otyr. Al osy sátte elimizde jyldamdyǵy joǵary ári keńjolaqty ınternetti qoldanatyn 14 mln 800 abonent bar eken.
Iаǵnı ǵalamtor baılanysy adam ómirinde mańyzdy oryn alatyn qajettilike aınaldy. Demek, oǵan degen suranys arta túsetini belgili. Bul úrdis qazir ortalyq qalalardyń aýmaǵynan asyp, alys aýyldarǵa da jetkeni anyq. Al shalǵaıdaǵy eldi mekenderdiń keń jolaqty ınternet baılanysyna qosylýy kún tártibindegi ózekti máseleniń biri. Basqasha aıtqanda, eldi qoljetimdi baılanyspen qamtý úshin orasan jumys istelýde. Onyń nátıjesi de joq emes. Buıyrsa, jaqynda Almaty oblysynyń Panfılov aýdanyndaǵy aýyl turǵyndary sapaly ınternetti paıdalanatyn bolady.
Qazir Panfılov aýdanynda 16 eldi mekenge joǵary jyldamdyqtaǵy ınternet jelisi tartylýda. Onyń ishnde buǵan deıin múldem baılanys jelisi bolmaǵan birneshe aýylǵa uıaly baılanys stansasy ornatylyp, ınternet jelisin qosý jumystary júrip jatyr. Osy tizimde ótken kóktemdegi qashyqtan oqytý kezinde baılanystyń qıyndyǵyn sezingen Sarytóbe aýyly da bar eken. Oqyrmannyń esinde bolsa, sol tusta oqýshylar men stýdentter ınternetke qosylý úshin bıik tóbe basyna shyǵyp, qolaıly oryn izdep ketken bolatyn. Endi osy aýylǵa «Bılaın» kompanııasy óz baılanys jelisin quryp jatyr eken. Uıaly baılanyspen birge keńjolaqty ınternet te qoljetimdi bolmaq.
Sondaı-aq aýdandaǵy 9 aýylǵa bazalyq stansa ornatylýda. Buǵan deıin múldem baılanys bolmaǵan Bóribaı, Yntaly aýyldary qazir «Tele 2», «Bılaın» uıaly baılanys operatorlarynyń qyzmetin tutynýǵa kóshken. Al «Qazaqtelekom» kompanııasyna qarasty jelilik toraptar bólimi negizgi 16 eldi mekenderge talshyqty-optıkalyq baılanys jelisin tartyp jatyr.
– Joǵary jyldamdyqtaǵy ınternet jelisine eń aldymen mektep, medısınalyq pýnkter men jergilikti ákimdikter qosylmaq. Búgingi tańda 6 eldi mekenge keńjolaqty jeli tartyldy. Qalǵan aýyldarǵa jeli tartý jumystary jaqyn kúnderi aıaqtalady, – deıdi «Qazaqtelekom» kompanııasy Panfılov aýdany boıynsha jeli toraptarynyń bólim basshysy Rýslan Qurbanov.
Aıtpaqshy, jańa oqý jylynda Panfılov aýdanynda 24 myńnan astam oqýshy qashyqtan jáne onlaın túrde oqymaq. Osyǵan oraı, keıbir aýyldardyń ınternet, baılanys sapasyn arttyrý úshin qosymsha jyldamdyq arttyratyn qondyrǵylar da qoıylyp jatyr.
Almaty oblysy