Búgingideı ǵylym damyp, órkenıet órlep turǵan dáýirde bilimdi urpaqtyń qalyptasatyny da zańdylyq. Egemen elimizdiń erteńi sanalatyn jastardyń deni jańalyqqa qushtar, ǵylymǵa áýes. Bul oraıda elimizdiń ár qıyrynda talantymen talaıdy tamsandyryp júrgen bilimdi jastar jeterlik. Taraz qalasyndaǵy Nazarbaev zııatkerlik mektebiniń túlegi Móldir Aıjaryq ta sondaı jastardyń biri.
Jas ónertapqysh ımpýlsti, temperatýrany, sonymen qatar balanyń geolokasııasyn qadaǵalaı alatyn jáne bul týraly ata-anaǵa habarlama jiberetin jańalyq oılap taýyp, oǵan «Your friend» degen ataý beripti.
Móldir Aıjaryq bul bıznes-jobany 11-synyptan bastap ustazy Álııa Jýsanbaevanyń jetekshiligimen ekonomıka sabaǵynda qolǵa ala bastaǵan eken. «Qoǵamnyń máselelerin zertteı otyryp, kóptegen ata-ana balasynyń densaýlyǵyna tıisti ýaqyt bóle almaıtyndyǵyn baıqadym. О́ıtkeni olar kóp ýaqytyn jumysta ótkizedi. Osy máselelerdi zertteı kele, balanyń densaýlyǵyn baqylaıtyn jáne ata-anasyna málimet jibere alatyn smart-bilezik jasaý ıdeıasy paıda boldy», deıdi ol. Aıta keteıik, jas ǵalym ZhasCamp Accelerator áleýmettik jobalardy damytý baǵdarlamasynyń túlegi. Atalǵan baǵdarlamanyń nátıjesinde ol ǵalym jáne Technologies Lab bas dırektory Tımýr Ryspekov syndy tálimger tapqan. Keıinnen mentordyń jetekshiligimen kod jazyp, qurylǵynyń jumys prototıpin jasap shyqqan. Qazirgi kezde ol jobasyn damytý ústinde. Sondaı-aq Móldir Aıjaryq oılap tapqan qurylǵy paıdalanýshy sensorlardy óz qajettiligine saı aýystyra alady eken. Búginde tek óndiris pen atalǵan jobany odan ári damytý úshin ınvestısııalar tartý máselesi ǵana qalyp tur. Joba 3 jastan 8 jasqa deıingi balalarǵa arnalǵan. О́nertapqysh endi atalǵan joba arqyly aýdıtorııany keńeıtýdi josparlap otyr. Sonymen qatar múmkindigi shekteýli jandar men qutqarýshylardy qamtý da oıynda bar eken. Búginde jas ónertapqysh osy bıznes-jospar boıynsha belsendi jumys isteýde. Al joǵary oqý ornyna túsken soń ártúrli mamandyq stýdentterinen jobalyq top qurýdy josparlaýda.
Jambyl oblysy