Elimizde jyldan jylǵa altyn júrekti atymtaı jomart adamdardyń qatary kóbeıip kele jatqandyǵy kóńilge qýanysh uıalatady. Olar óz qaltalarynan myńdaǵan, mıllıondaǵan qarjy jumsap, jetim balalardy aıaly qamqorlyqqa alyp, úmitsiz syrqattardy sheteldik emhanalarda emdetip, muqtajdarǵa kómektesip, mektepter men meshitter, balalar úılerin salýda. Osyndaı qaıtarymsyz qaıyrymdylyq Qazaqstan qoǵamy damýyndaǵy jaqsy nyshandardy tanytady, birte-birte izgilikti adamı qundylyqtardyń alǵy shepke shyǵyp kele jatqanyn kórsetedi. Saıyp kelgende, osyndaı izgi amaldar, ıgi ister elimizdi órkendetýge, memleketimizdi nyǵaıtyp kórkeıtýge septigin tıgizeri anyq.
Elimizde jyldan jylǵa altyn júrekti atymtaı jomart adamdardyń qatary kóbeıip kele jatqandyǵy kóńilge qýanysh uıalatady. Olar óz qaltalarynan myńdaǵan, mıllıondaǵan qarjy jumsap, jetim balalardy aıaly qamqorlyqqa alyp, úmitsiz syrqattardy sheteldik emhanalarda emdetip, muqtajdarǵa kómektesip, mektepter men meshitter, balalar úılerin salýda. Osyndaı qaıtarymsyz qaıyrymdylyq Qazaqstan qoǵamy damýyndaǵy jaqsy nyshandardy tanytady, birte-birte izgilikti adamı qundylyqtardyń alǵy shepke shyǵyp kele jatqanyn kórsetedi. Saıyp kelgende, osyndaı izgi amaldar, ıgi ister elimizdi órkendetýge, memleketimizdi nyǵaıtyp kórkeıtýge septigin tıgizeri anyq.
Qaıyrymdy jandar basqalarǵa jasaǵan darqan jaqsylyqtary úshin alǵys-ataq, qurmet-marapat dámetpeıdi. «Bir qolyńmen jasaǵan jaqsylyǵyńdy ekinshi qolyń kórmesin» degen eken Rabbymyz. Biraq jaqsynyń jaqsylyǵyn ózi aıtpasa da, basqalardyń aıtqany, jaqsy úlginiń kópke shashylyp pash etilgeni ǵanıbet qoı. Osy parasatty paryzdy moınyna júktegen «Baýyrjan» qoǵamdyq qory bıyl jetinshi ret aınalasyna sharapaty men shapaǵaty mol qaıyrymdy jandardyń esimderin atady. Sóıtip, olarǵa Abaı atyndaǵy akademııalyq opera jáne balet teatrynda 11 atalym boıynsha jyl saıynǵy «Altyn júrek» ulttyq qoǵamdyq syılyǵy tabys etildi.
Mine, jandary súıinip, mereıleri tasyǵan mártebeli marapat ıeleri birinen soń biri sahna tórine, alqaly qaýym aldyna shaqyrylyp jatyr. «Jetim balalarǵa kórsetken qamqorlyǵy úshin» nomınasııasy boıynsha Talǵar qalasyndaǵy «Nur» otbasylyq balalar úıiniń dırektory Tuıaq Esqojına «Altyn júrek» músinshesin birinshi bolyp aldy. Bıyl kóktemde Qazaqstan halqynyń birligi kúni qarsańynda Tuıaq Qazkenqyzynyń Elbasy qolynan «Birlik» altyn medalin alǵanyn da bilemiz. 16 jyldan beri 340 balanyń anasy bolǵan osynaý abzal jandy altyn marapat taǵy da laıyǵymen tańdap, dál tapqanyna qýanyp otyrdyq.
«Altyn júrektiń» budan keıingi laýreattary qatarynda bilimdi damytýǵa qosqan úlesi úshin Qyzylorda qalasynan «Nuraı» JShS, múgedek jandarǵa kórsetken qamqorlyǵyna oraı jeke kásipker Ǵalymbek Qunapııauly, sportty qoldap damytqany úshin Aqmola oblysy Zerendi aýdanyndaǵy «Altyntaý – Kókshetaý» JShS, ardagerlerge kórsetken kómegi úshin «Almatygazservıs Holdıng» AQ basqarma tóraǵasy jáne «ISKER Company» JShS aktıvteriniń basqarýshysy Bolat О́mirálıev, densaýlyq saqtaý salasyna qoldaý kórsetkeni úshin «Amazonka» qoǵamdyq qorynyń dırektory Anjelıka Sarıan, Qazaqstannyń órkendeýine qosqan úlesi úshin halyqaralyq farmasevtıkalyq Polpharma kompanııalar tobyndaǵy «Gerbapol Lıýblın» kompanııasynyń prezıdenti Ejı Starak marapatqa ıe boldy. Sondaı-aq, «AShK» JShS bas dırektory Esimhan Jańabaev jyl mesenaty, «Astana» telearnasynyń «Biz birgemiz» baǵdarlamasy aqparattyq qoldaýshy, «ZHERSU» korporasııasy qadaǵalaýshy keńesiniń tóraǵasy Baýyrjan Ospanov jyl qaıyrymgeri, Almaty qalasyndaǵy «Efes Kazakhstan» kompanııasy jyl uıymy atanyp, «Altyn júrektiń» laýreattyǵyn qanjyǵalaryna baılady.
Saltanatty marapattaý keshiniń jan jadyratar tamasha dýman, taǵylymdy jıyn bolyp ótýine Juldyz Omarbekova bastaǵan uıymdastyrýshylar da baryn salypty. Merekelik shara ǵıbratty aq tilektermen aıshyqtalyp, án-kúımen órnekteldi. Arnaıy shaqyrylyp, Sarreı aǵylshyn graftyǵynan kelgen álemge tanymal jalǵyzqoldy pıanıst Nıkolas Makkartı óner kórsetti. Maıra Muhamedqyzy, Mádına Sádýaqasova, Aqjol Meıirbekov syndy Qazaqstan óner juldyzdary da altyn júrekti abzal jandardy ásem ánderimen aıalap baqty. Uıymdastyrýshylar alqasy osynaý tanymal jobaǵa jylma-jyl turaqty aqparattyq qoldaý kórsetip kele jatqan «Egemen Qazaqstan» gazetine iltıpatty Alǵys hat arnaýdy da umytpapty.
Qorǵanbek AMANJOL,
«Egemen Qazaqstan».
Almaty.
Sýrette: «Altyn júrek» syılyǵynyń laýreaty Tuıaq Esqojına.
Sýretti túsirgen Iýrıı BEKKER.