Almaty qalasynyń eń basty máseleleriniń biri bolyp otyrǵan kólik qatynastaryn retteıtin jolaıryq qurylysynyń jumysymen tanysyp, atalǵan nysandy salyp jatqan jobalaýshy jáne merdiger kompanııalardyń atqaryp jatqan isine Memleket basshysy oń baǵa berdi.
– Aımaqtardy aralaǵanda, onyń ishinde Almaty qalasynda bolǵan kezimde men qaıtadan salynyp jatqan kóliktik jáne áleýmettik nysandardyń qurylystarymen tanysyp otyramyn. Mundaı qurylystar halqymyzdyń turmysy men qalalarymyzdyń damýyna erekshe úles qosary anyq.
Almaty qalasynyń eń basty máseleleriniń biri bolyp otyrǵan kólik qatynastaryn retteıtin jolaıryq qurylysynyń jumysymen tanysyp, atalǵan nysandy salyp jatqan jobalaýshy jáne merdiger kompanııalardyń atqaryp jatqan isine Memleket basshysy oń baǵa berdi.
– Aımaqtardy aralaǵanda, onyń ishinde Almaty qalasynda bolǵan kezimde men qaıtadan salynyp jatqan kóliktik jáne áleýmettik nysandardyń qurylystarymen tanysyp otyramyn. Mundaı qurylystar halqymyzdyń turmysy men qalalarymyzdyń damýyna erekshe úles qosary anyq.
Osyndaı jolaıryqtar men jaıaý júrginshi joldary – Almaty qalasyndaǵy kólik keptelegin azaıtýǵa baǵyttalǵan sharalar. Sońǵy jyldarda ǵana qalada 13 jolaıryq salyndy jáne mundaı qurylystyń sany Almaty qalasy boıynsha 20-ǵa jetip, keleshekte jalǵasyn taba beretin bolady, – dedi Elbasy Nursultan Nazarbaev jol qurylysynyń jumysymen tanysqannan keıin.
Qalanyń kólik ınfraqurylymyn jaqsartatyn atalǵan jolaıryq jobasy jýyrda ǵana paıdalanýǵa berilip, qazirgi tańda tek bul nysannyń syrtqy sıpaty men mańaıyn kógaldandyrý, sý qubyrlaryn júrgizip, jaıaý júrginshilerge arnalǵan jalǵyz aıaq joldarynyń jumysy atqarylýda.
Tashkent baǵytyna bastaıtyn kúre jol men Soltústik aınalma jolyn baılanystyratyn Ál-Farabı dańǵyly arqyly kúnine san myńdaǵan kólik tolassyz qatynaýda. Halyqaralyq talaptarǵa saı jaqsartylǵan dańǵyl boıynda qazirde kólik keptelegi edáýir azaıyp, qala qonaqtary men turǵyndaryna kóptegen sebi tıip otyr.
Atalǵan baǵyttar boıynsha, máselen, Ál-Farabı dańǵylymen táýligine 150-160 myń kólik júrse, Rozybaqıev kóshesiniń boıymen táýligine 30-40 myń mashına saǵatyna 60 shaqyrymdyq jyldamdyqpen júıtkıdi. Dańǵyl boıymen qarama-qarsy baǵytta 6 qatar, al kóshe boıymen 4 qatar kólik erkin qatynaıtyndaı etip keńeıtilgen. 1304 túp tal egilip, jalpy aýmaǵy 38 820 sharshy metrdi qamtıtyn jerge kógal tóselgen soń, aınalasy túrli jaryq shamdarmen jabdyqtalyp, bul jolaıryqtyń qurylysy jeltoqsan aıynyń sońynda tolyqtaı bitedi.
Elimizdiń kólik ınfraqurylymyna qosylǵan jańa nysan qurylysynan keıin Memleket basshysy Nursultan Nazarbaev «Mega-2» saýda jáne oıyn-saýyq kesheninde boldy. «MEGA Alma-Ata» saýda jáne oıyn-saýyq kesheniniń ekinshi ǵımaratyn qosqanda, kópshilikke qyzmet kórsetip otyrǵan nysannyń jalpy aýmaǵy 164 482 sharshy metrdi quraıtyn bolady. Qazirgi salynyp jatqan «MEGA-2» kesheniniń aýmaǵy – 78 852 sharshy metr. Atalǵan jobany aǵylshyndyq Shapman Taylor arhıtektýralyq kompanııasy jobalap, qurylys jumystaryna 21 mıllıard teńge qarjy ınvestısııalanyp otyr.
Jańa joba boıynsha taǵy da 1 400 adam jumyspen qamtylatyn bolady. Eskerer bolsaq, buǵan deıin halyqqa qyzmet kórsetip kelgen «MEGA Alma-Ata» saýda jáne oıyn-saýyq kesheninde qazirgi tańda 1 600 adam jumys isteıdi, endi jańa keshen iske qosylǵan soń bir ǵana Mega jobasy 4 000 qazaqstandyqty jumys ornymen qamtyp, qala turǵyndary men qonaqtaryna sapaly qyzmet kórsetetin bolady.
«Mega-2» jańa saýda jáne oıyn-saýyq kesheninde ornalasqan júzden asa saýda dúkenderinde Massimo Dutti, ZARA Home, Stradivarius, Pepe Jeans, Jack&Jones sekildi álemdik brend kompanııalardyń ónimderi qoıylǵan. Jalpy aýmaǵy 3 000 sharshy metrdi alyp jatqan álemdegi eń úlken Adidas brend-ortalyǵy da osy «Meganyń» jańa ǵımaratynda oryn teppek.
Saýda ortalyǵynyń taǵy bir ereksheligi, bul jerde tek oıyn-saýyq pen saýda núkteleri ǵana bolyp qoımaı, sonymen qatar, tańdamaly óner týyndylary da kelýshilerdiń nazaryna usynylyp otyr. Atap aıtsaq, qazaqstandyq tanymal sýretshi Marat Bekeevtiń eń úzdik tórt kartınasy, otandyq músin óneriniń ókili Edýard Kazarıannyń «Ýaqyt tarazysy» dep atalatyn 18 metrlik kompozısııalyq músini, Brıtanııalyq Scott Lihgting kompanııasy daıyndaǵan «Kún» shamshyraǵy men bıiktigi 12 metrlik «Tilekter aǵashy» týyndysy, sondaı-aq, álemge tanymal sheteldik jáne qazaqstandyq belgili sýretshilerdiń týyndylary ýaqyt aralatyp jańartylyp otyrady. Eýropa taǵamdaryn usynatyn Crudo meıramhanasynan fransýz sýretshisi Fernan Lejeniń álem jurtshylyǵyna tanymal «Áıelder men toty qus» týyndysynyń keramıkalyq úlgisin tamashalap, muhıt astyndaǵy tirshilikpen tanysqysy keletinderge eki úlken akvarıým qoıylǵan.
«MEGA Alma-Ata» jobasynyń ekinshi ǵımaratynda ekinshi qabat tolyqtaı 1 200 oryndy joǵary deńgeıli 9 meıramhanadan turatyn restorandyq klasterge berilip otyr. Odan ózge, aýmaǵy 4 000 sharshy metrlik Happylon oıyn-saýyq parki jumys istep, ol jerge 150-den astam oıyn avtomattary, bıiktigi 10 metrlik labırınt pen Qazaqstandaǵy tuńǵysh ári jalǵyz lazerlik tır sekildi jańa 11 iri attraksıon qoıylǵan. Túrli qoıylymdardy jany qalaıtyn kelýshiler úshin «Mega-2» ǵımaratynyń kire berisinde ornalasqan 2 300 sharshy metrlik 500 oryndy amfıteatr saǵatyna eki myńnan asa kórermendi qabyl alýǵa daıyn.
Ústimizdegi jyly «MEGA Alma-Ata» jobasy memleket qazanyna 400 mıllıon teńge qarajatty salyq retinde quıady dep josparlansa, 2014 jyly paıdalanýǵa tolyqtaı berilgennen soń odan túsetin salyq kólemi 1 mıllıard teńgeden asyp jyǵylady dep boljanýda. Qazirgi tańda «MEGA Alma-Ata» saýda jáne oıyn-saýyq keshenin jylyna 10 mıllıon adam tamashalap júrse, ekinshi ǵımarat iske qosylǵannan keıin jylyna 15 mıllıon adam erkin aralap, túrli oıyn men tynyǵý oryndarynda bola alady.
Elbasy Nursultan Nazarbaev halyq ıgiligi úshin jáne qazaqstandyqtardyń jaqsy demalýyna arnap jasalyp otyrǵan jaǵdaıdy tamashalaǵannan keıin jýrnalıstermen kezdesip, sońǵy jyldar ishinde Almaty qalasynda el ıgiligi men halyq suranysyna saı atqarylǵan isterdiń kóńilden shyǵatynyn, ýaqyt ozǵan saıyn qala sıpaty jańa reńkke bólenip, zamanaýı talaptarǵa saı qurylys nysandarynyń boı kóterip jatqanyn jetkizdi.
– Almaty qalasyna jumys saparymda el ıgiligi men keleshek urpaǵymyz úshin jasalyp jatqan birshama ıgi isterdiń kýágeri boldym, – dep málimdedi Memleket basshysy. – Qurylysshylarymyz salyp jatqan jolaıryq qalamyzdyń ınfraqurylymyn jaqsarta túseri anyq. Osyndaı keleshegi kemel qurylystar elimizdiń ár aımaǵynda júrgiziletin bolady. Saýda jáne oıyn-saýyq kesheni qazirgi zaman talabyna saı jabdyqtalyp, jaqyn ýaqytta halqymyzǵa usynylady. Biz osyndaı jetistikterimizben, osyndaı zamanaýı keshenderimizben damyǵan elderdiń qatarynan óz ornymyzdy alamyz. Bokstan álem chempıonatyn da tamashaladym. Bizdiń boksshylarymyzdyń mundaı jeńisi buryn-sońdy otandyq boks tarıhynda bolmaǵan. Men jeńis týyn jelbiretken jeńimpaz boksshylarymyzǵa shyn kóńilden alǵysymdy bildiremin.
Qanat ESKENDIR,
«Egemen Qazaqstan».
ALMATY.
Sýretti túsirgenBersinbek SÁRSENOV.