Memleket basshysy Qasym-Jomart Toqaev óz Joldaýyn jarııalaý barysynda eń aldymen dárigerlerge, quqyq qorǵaý salasynyń qyzmetkerleri men eriktilerge alǵys aıtty. Bul alǵys búkil eldiń atynan aıtylǵan alǵys boldy dep esepteımin. Sebebi, indetpen kúres kezinde eń basty aýyrtpalyq osy mamandarǵa tústi.
Memleket basshysy Joldaýynda qazirgi daǵdarystan shyǵýdyń naqty joldaryn usyndy.
Sonyń biri – sheneýnikter men kvazımemlekettik sektordaǵy mamandar sanyn qysqartý arqyly únemdelgen qarjyny sol salada aýqymdy eńbek etken qyzmetkerlerge balldyq shkalamen jalaqy retinde tóleý. Buǵan qosa aýyl-aımaqty damytyp, aýyl ákimderin saılaý máselesi kóterildi. Sebebi, aýyl tirshiligi túzelmeı, el ómiri tolyq damydy deı almaımyz.
Prezıdent Joldaýynda qoǵamnyń barlyq salasy qamtylyp, ádettegideı, áleýmettik máselelerge erekshe mán berildi. Qazirgi tańda densaýlyq saqtaý salasy basty nazarda tur. Osyǵan oraı barlyq dári-dármek pen medısınalyq quraldar elimizde shyǵarylýy tıis, dedi Memleket basshysy. Al dárigerlerdiń jalaqysy aldaǵy ýaqytta kóterilmek. Muǵalimderdiń eńbekaqysy da ósiriledi.
Prezıdenttiń tapsyrmasy boıynsha pandemııamen kúres jóninde keshendi baǵdarlama daıyndalady. Aldaǵy ýaqytta Áleýmettik kodeks ázirlenip, 2023 jylǵa deıin áleýmettik tólemderdi ındeksasııalaýǵa 1 trln teńge bólinbek.
Munyń barlyǵyn júzege asyrý úshin kedergi bolýy múmkin sybaılas jemqorlyq qaýipterin tolyq joıýymyz kerek. Prezıdent Joldaýynda bul máselege de toqtalyp, quqyq qorǵaý salalaryn jetildirý joldaryn atap ótti. Oǵan qosa óskeleń urpaqty otanshyl, elin súıer azamat retinde tárbıeleýimiz kerek. Sebebi, el ómirindegi ıgi ózgeristerdi júzege asyratyn da siz ben biz.
Darııa QOJAMJAROVA,
M.Áýezov atyndaǵy OQMÝ rektory