Eger el Prezıdenti Qasym-Jomart Toqaevtyń halyqqa Joldaýyn tutastaı aıtsaq, sirá, osylaı deýge bolatyn shyǵar. Qoǵamnyń alpys eki tamyryn taldap, tanytyp aıtqan Memleket basshysy áýeli halyqtyń jaǵdaıyna degen órkenıetti ónegeniń óreli ólshemin, saǵy synbaıtyn saıasatkerliktiń uzaǵynan súıindirer ustanymyn, eńsesi bıik eldiń kósegesin kógertýdi kókseıtin memlekettik tulǵanyń tý jyqpaıtyn tuǵyrynan kórindi.
Eger Nursultan Nazarbaev jańa Qazaqstandy qursa, Qasym-Jomart Toqaev osynyń erteńgi kúnine eldiń kóshin shashpaı-tókpeı tutas kúıinde bastap alyp barýǵa baryn salýda. Halyqtyń oı-sanasyn oıatyp, ádildik pen adaldyqqa, jankeshti eńbekke betburys jasaýdy jańa turpatpen qolǵa aldy. Memleket basshysynyń Joldaýynan osyny ańǵaramyz.
Iá, qazir ońaı tıip jatqan joq. Tótennen tónip kelgen indetten álem halqy teńselip qaldy. Onyń emi tabylar. Al tótennen emes, adamdardyń deninde paıda bolǵan jáne etek ala bastaǵan jemqorlyqtyń arnaıy dárisi joq. Áýeli mynany aıtsaq. Joldaýda qazirgi jaǵdaıymyzdyń bári aıtyldy. Bári tarazylandy, tanymdyq turǵyda tamyry tarqatyldy. Bul eldiń es jııýyna zor áser etti. Eńsesin kóterýge tikeleı yqpal jasady.
Men Memleket basshysynyń Joldaýyndaǵy jemqorlyq indetke qózqarasyna erekshe toqtalǵym keledi. Qulqynnyń qulyna aınalyp, ashkózdengen adamdardyń ishki nıet, peıiliniń dıagnozyn qalaı qoıýǵa bolady? Laýazymdaǵylardyń arasyndaǵy toıymsyzdyq bul jaı ǵana qylmys emes, bul – ultqa uıat keltiretin qasiret. О́z halqynyń tabanaqy, mańdaı terine aıaýsyz qol salǵandardyń halyq pen Qudaıdyń qarǵysyna ushyraıtyny bir basqa. Ol urpaqtyń namysyna tıetin arsyz qubylys. Mundaı jaǵdaıda Memleket basshysy ondaılarmen eshýaqytta qoltyqtasyp kete almaıdy.
Joldaýda Qasym-Jomart Toqaevtyń aıqyn eskertýi sheksiz baıyp, qalyń buqaraǵa shekesinen qarap júrgen topqa soqqy bolyp tıip jatqanyn buqara bilip otyr. Memlekettik múddedegi kesimdi kemel sóz ben ustanym kezekti reformanyń pármenin uqtyrdy. Qoǵamdaǵy jańa bir sanalyq qozǵalystan habar beretin bul saıası oqıǵa bárimizdiń kózimizdi ashty. Eń bastysy bul qundy qujat Prezıdenttiń o bastaǵy ustanymy – qoǵamnyń beti boıalmaǵan shyndyǵy. Keler kúnderimizge qaqtyrmaı-soqtyrmaı alyp baratyn aıbyndy jol osy.
Nesipbek DÁÝTAIULY,
jazýshy, Qazaqstannyń eńbek sińirgen qaıratkeri