Memleket basshysy «Jańa jaǵdaıdaǵy Qazaqstan: is-qımyl kezeńi» atty Joldaýynda elimizdiń ekonomıkalyq baǵdary negizgi jeti qaǵıdaǵa negizdeletinin aıtty, onyń ishinde «Jasyl» ekonomıka tujyrymdamasyna aıryqsha mán bergeni quptarlyq is. Bul tujyrymdamany iske asyrý úshin elimizdiń ekologııalyq strategııalyq baǵytyn tolyǵymen qaıta qarastyrý kerek.
Prezıdent Joldaýda birneshe ózekti máseleni kóterip, atap aıtqanda, ekologııalyq ahýaldy retteýdiń tetikterin usyndy. Bul oraıda elimizde jańa Ekologııalyq kodeks ázirlenip, ony jyl sońyna deıin qabyldaý boıynsha Parlamentke tapsyrma júktelgenin aıta ketý kerek. Memleket basshysynyń «jasyl» ósimge qatysty barlyq bastamany qoldap, ony engizýdiń joldaryn Úkimetke tapsyrǵany durys dep esepteımin. Nege deseńiz, ekonomıkany tek qana shıkizatqa negizdeý tıimsiz. Bul týraly Qasym-Jomart Toqaev ta aıtyp, «Jasyl» baǵyttaǵy jobalardy engizýdiń mańyzdylyǵyna toqtaldy. Búginde elimizdegi ekologııalyq jaǵdaı kóńil kónshiterlikteı emes. Muny moıyndaýymyz kerek.
Sonymen qosa jańa Ekologııalyq kodekste kórsetilgendeı, iri óndiris oryndaryn ozyq qoljetimdi tehnologııalarǵa kóshirý jumystaryn jedeldetken artyq etpeıdi. Eger de osy baǵyttaǵy tyń ádisterdi tıimdi paıdalansa, «jasyl» ekonomıkanyń barlyq ındıkatory tolyq júzege asyrylýy múmkin.
Pandemııa ýaqytynda adamdardyń janýarlarǵa jasaǵan qııanattary kóbeıip ketkeni jasyryn emes. Osyǵan qatysty tıisti zań qabyldanýy kerek. Sonyń negizinde zararsyzdandyrýdan bastap, zoobaqtardyń jumysyn júıelendirý syndy mańyzdy máselelerge kóńil bóliný qajet dep sanaımyn. Mysaly, kórshiles Reseıde janýarlarǵa qysym kórsetken adamdar zań aldynda jaýap beredi. Demek, ol jaqtaǵy halyq jaýapkershilikti túsinedi. Bizdiń elimizde de osyndaı zańnamalyq tetikter qarastyrylsa, jaǵymsyz jaǵdaılar tyıylar edi. Sol sekildi ekologııalyq tárbıe saǵatyn engizýdiń mańyzdylyǵy basym. Tárbıe tal besikten bastalatynyn eskersek, óskeleń urpaqtyń boıyna janýarlarǵa degen janashyrlyq sezimdi sińire bilýimiz kerek.
Eldos ABAQANOV,
«Qazaqstannyń ekologııalyq uıymdary qaýymdastyǵy» ZTB tóraǵasynyń orynbasary