El Prezıdentiniń bizder, ıaǵnı ustazdar qaýymy úshin asa mańyzdy sanalatyn Bilim kúninde jarııalaǵan Joldaýyn erekshe yqylaspen qabyldadym. Álemde oryn alǵan pandemııa jaǵdaıyna baılanysty «Endi ne bolar eken?» degendeı ári-sári kúıde otyrǵanymyzda Joldaýdyń erteńimizge degen senimimizdi arttyryp, bet alǵan baǵdarymyzdy aıqyndaı túskeni anyq.
Kúndelikti qoǵamda keńinen talqylanyp, alańdatyp júrgen máselelerdiń osy Joldaýda kóterilýi, Prezıdenttiń qoǵam tynysyn jiti baqylap otyrǵanyn ańǵartady. Bul óz kezeginde halyq pen bılikti jaqyndata túsedi.
«Ashyǵyn aıtqanda, áli kúnge deıin naqty bir onlaın-platforma joq. Muǵalimder, oqýshylar jáne ata-analar kúndiz-túni «WhatsApp»-tan bas kótermeıtin boldy», degen Prezıdent oryn alǵan jaǵdaıdy dóp basty. Ol osy oraıda, tolyqqandy oqý úderisi úshin qajetti barlyq fýnksııalary bar biryńǵaı onlaın bilim berý platformasyn shuǵyl ázirleý qajet ekenin atap kórsetti.
Aýdan ortalyǵyndaǵy bastaýysh mekteptiń muǵalimi ári kópbalaly ana retinde meni qalalyqtarǵa qaraǵanda aýyl balalarynda sapaly bilim resýrstary men tehnologııalarǵa degen qoljetimdiliktiń tómendigi únemi alańdatatyn. Máselen, meniń shákirtterimniń arasynda ónertapqyshtyqpen aınalysyp, óz qoldarymen túrli tyń dúnıeler jasaǵysy keletinder kóp. Olardyń birazy óz betterinshe izdenip, qolda bar quraldarmen jańa dúnıeler jasap ta júr. Degenmen, «bolam degen balanyń belin býyp», baǵyt-baǵdar kórsetetin bilikti maman, arnaıy úıirme, zerthanalar bolsa deımiz.
Osy oraıda Memleket basshysy kúndelikti máselelerdi sheshýmen qatar, balalardyń bárine birdeı múmkindik týǵyzý úshin júıeli sharalar qabyldaý qajet ekenin, balalarymyz qaı jerde tursa da, qandaı tilde oqysa da sapaly bilim alýy kerek ekenin oryndy kóterdi.
Ustaz bolǵan soń oqýshylardyń arasyndaǵy áleýmettik teńsizdikterge qatysty týyndaǵan túrli máselelerge kýá bolatynymyz jasyryn emes. Prezıdenttiń bilim salasyndaǵy jumysty «Qoljetimdi ári sapaly bilim» qaǵıdasyna baǵyndyrýy óte durys dep bilemin. О́ıtkeni Prezıdenttiń aıtýynsha, memlekettiń tek daryndy oqýshylardy qoldaýy balalar arasynda áleýmettik arajikti ulǵaıtýy múmkin. Buǵan jol berýge bolmaıdy. Memleket qarapaıym mektepterge qoldaý kórsetedi. Bul qadam qala men aýyl arasyndaǵy bilim berý salasyndaǵy alshaqtyqty qysqartýǵa jol ashady.
Prezıdenttiń Joldaýda kótergen bilim salasyna qatysty máselelerden ózge, aýyl turǵyny bolǵandyqtan, aýyl-aımaqty damytýǵa qatysty aıtqandary da erekshe nazarymyzdy aýdardy. Aýyldyń áleýetin paıdalaný strategııalyq mańyzdy másele ekenin Memleket basshysy jaqsy túsinip otyr. Osy rette aýyl-aımaǵymyzda oń ózgerister jasalyp jatqanyn aıta ketkim keledi. Aýylymyzda aýyz sý máselesi sheshilgen. Buryn alystan shelektep tasıtyn sýymyz, búginde esik aldynda shúmekten aǵyp tur. Endi aýylymyz gazben qamtylmaq. Ol úshin arnaıy qubyrlar júrgizilip te qoıdy. Buıyrsa, kógildir otyn arqyly aýyl mańyndaǵy orman-toǵaı otynǵa shabylmaı, jaıqalatyn kún de alys emes.
Prezıdent sóziniń túıininde endigi mindet halqymyzdyń jańa bolmysyn qalyptastyrý, tutas ult sapasyn arttyrý ekenin atap ótti. Osy mindetti júzege asyrý úshin árbirimiz atsalysýymyz qajet. Bul urpaq tárbıesimen aınalysyp otyrǵan ustazdar qaýymyna úlken jaýapkershilik júkteıdi.
Tamara NAHYP,
«Sháýildir» bastaýysh mektebiniń muǵalimi
Túrkistan oblysy,
Otyrar aýdany