Prezıdenttiń bıylǵy «Jańa jaǵdaıdaǵy Qazaqstan: is-qımyl kezeńi» atty Joldaýyn qoǵamnyń barlyq deńgeıin qamtıtyn, eldi jańa ózgeristerge bastaıtyn bastama dep qabyldadyq. Sonyń ishinde bizge, áskerılerge de qatysty ózgerister bar.
Prezıdent óz Joldaýynda elimizge zamanǵa saı, ýaqyt talabyna sáıkes ózgerister qajet ekendigin, onyń qaı salada qandaı baǵytta, qalaı júzege asatynyn táptishtep aıtty. Ásirese búgingi pandemııa men daǵdarys jaǵdaıynda memlekettik basqarý júıesiniń jańa model qajettigi baıqaldy. Soǵan sáıkes Prezıdent memlekettik basqarý, kadr saıasaty salalarynda jańadan reformalardy júıeli túrde iske asyrý kerek ekenin aıtty. Bul elimizdegi eńkeıgen káriden eńbektegen balaǵa deıin qamtıtyn reforma bolmaq. Sondyqtan da Prezıdentke tikeleı baǵynatyn Strategııalyq josparlaý jáne reformalar agenttigi qurylatyn boldy.
О́z basym memlekettik qyzmeshilerdiń sanyn aldaǵy 2021 jyly 25 paıyzǵa azaıtyp, sapasyn arttyrýdy tolyq qoldaımyn. Sebebi eldi jaılaǵan pandemııa elge naqty qajetti mamandardy ózi-aq aıqyndady.
Qarapaıym halyqty qýantqan mańyzdy ózgeristiń biri – zeınetaqyǵa qatysty. Qasym-Jomart Kemelulynyń tikeleı tapsyrmasy boıynsha keler jyldan bastap Biryńǵaı jınaqtaýshy zeınetaqy qorynyń 700 myń salymshysy óz jınaǵynyń belgili bir bóligin úı alý, emdelý úshin paıdalanýǵa nemese qarjy uıymdarynyń basqarýyna berýge múmkindik aldy. Bul da buǵan deıin halyq tarapynan usynys bolyp kóterilgen másele bolatyn.
Sonymen qatar Joldaýda ulttyq qundylyqtar máselesi de kóterildi. Memleket basshysy keleshek adal, bilimdi, kásipke beıim urpaq tárbıeleý isine aralasýdy barlyq qoǵamdyq ınstıtýttarǵa júktedi. Ásirese bilimi men biligi, mádenıeti joǵary, iskerlikke qabiletti eldiń azamattary órkenıet kóshin órge bastaıdy. Bul oraıda jas urpaqqa bilim-tárbıe berip, osy daǵdyny bala boıyna darytýǵa muǵalimder qaýymynyń qosar úlesi mol. Sondaı-aq pandemııa kezinde «maıdannyń» alǵy shebine shyǵyp, ár naýqas úshin kúresken medısına qyzmetkerleriniń de eńbegi ólsheýsiz. Prezıdenttiń jańa Joldaýy áleýmettiń qos qanaty – muǵalimderdiń jalaqysy ósetinin, medısına qyzmetkerlerine ekinshi jartyjyldyqqa tólemaqy retinde 150 mlrd teńge kóleminde qarajat bólinetinin habarlady. Bul óte qýanyshty habar.
«Balaly úı – bazar, balasyz úı – qý mazar» degen qazaq halqy balany erekshe jaqsy kórip, bala dese baryn beretin baýyrmal halyq sanalǵan. «Bala – adamnyń baýyr eti, kóz nury» degen maqal osynyń aıǵaǵy ispettes. Bala – ómirdiń jalǵasy, ata-ananyń perzenti, otbasynyń qyzyǵy men shyjyǵy. Balaly bolyp, perzent súıý – eń úlken baqyt. Sondyqtan kóp jyldan beri bala súıe almaı júrgen otbasylarǵa 2021 jyldan bastap «Ańsaǵan sábı» arnaıy baǵdarlamasy qolǵa alynatyny aıtylyp jatyr. Iаǵnı Prezıdenttiń tapsyrmasymen EKU baǵdarlamalary arqyly kvota sanyn jeti myńǵa deıin, ıaǵnı jeti ese kóbeıtiletini kóńilimizge maıdaı jaqty. Sondaı-aq 2025 jylǵa deıin balalardy 100 paıyz balabaqshamen qamtý máselesi mejelendi.
Mine, osy aıtylǵan ıgiliktiń bári qoǵamnyń barlyq salasy sııaqty bizge, áskerı qyzmetshilerge de tikeleı qatysty. О́ıtkeni oqaly kıim kıip, tynyshtyq kúzetinde júrgen biz de elimizdiń qarapaıym azamatymyz. Qoǵamda zań ústemdigi ornyqpasa, azamattardyń qaýipsizdigine kepildik berilmese, áleýmettik-ekonomıkalyq damýdyń birde-bir mindeti júzege aspaıdy. Sondyqtan quqyq qorǵaý jáne sot júıelerin ınstıtýsıonaldy turǵydan ózgertý máselesi de ózekti. Bir sózben aıtqanda, azamattardyń konstıtýsııalyq quqyqtaryna kepildikti nyǵaıtý, zańnyń ústemdigin qamtamasyz etý, quqyq qorǵaý qyzmetin izgilendirý jumystary aldaǵy ýaqytta jalǵastyryla beredi.
Indetpen kúres ýaqytynda quqyq qorǵaý organdarynyń qyzmetkerlerine, áskerı qyzmetshilerge Prezıdentimiz erekshe alǵysyn bildirdi. Otanyna adal, kásibı turǵydan daıyndalǵan ofıserler men áskerı qyzmetshiler jańa geosaıası jaǵdaıda el qaýipsizdigine qaýip tóndiretin qaterlerge toıtarys berýge daıyn ekendigin dáleldep keledi. Osyndaı syn saǵatta áskerimiz yntymaǵy jarasqan halqymyzben birge judyryqtaı jumyldy. Sonyń ishinde Qazaqstan Respýblıkasy Ulttyq ulan áskerleri saıası turaqtylyqty qamtamasyz etip, azamattardyń quqyqtaryn saqtaý boıynsha zańdylyq pen quqyqtyq tártipti kúzetýde júktegen talaptar men mindetterdi múltiksiz abyroımen oryndap júr.
Memleket basshysynyń Joldaýynda atalǵan mindetter júzege asýy úshin barlyq qazaqstandyqtarmen birge Qazaqstan Respýblıkasynyń Ulttyq ulan áskerleri «Batys» óńirlik qolbasshylyǵynyń jeke quramy da aıanbaı úles qosady dep sendiremin.
Álibek SERALIEV,
general-maıor, Qazaqstan Respýblıkasy Ulttyq ulan «Batys» óńirlik qolbasshylyǵynyń qolbasshysy
Oral