Prezıdent Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» atty Joldaýynda memlekettigimizdi nyǵaıtý jolyndaǵy eń basty máselelerge nazar aýdaryp, qoǵam men memleketimizde strategııalyq baǵyttar boıynsha qandaı ózgertýler jasaý kerek ekenin aıqyndady. Memleket basshysy basty qujatta sybaılas jemqorlyqty boldyrmaý, jolyn kesý máselesine aıryqsha toqtaldy.
Azamattardyń laıyqty ómir súrýine jaǵdaı jasaýǵa, olardyń quqyqtaryn qorǵaýǵa, zań ústemdigin qamtamasyz etýge jáne jemqorlyqqa qarsy kúresti kúsheıtýge mindettimiz dep aıryqsha atap ótti. Jemqorlyqqa aparatyn sebepterdi anyqtaý úshin memlekettik organdar men kvazımemlekettik sektordyń normatıvtik aktileri men jumys úderisterine arnaıy taldaý júrgizý belgilendi.
Sybaılas jemqorlyq úshin jaýapkershilikti kúsheıtýde Qylmystyq kodekske ózgeris engizýdi usynýy qoǵam dertimen kúrestiń nátıjeli bolaryna sendire túsedi. Osyǵan deıin jemqorlyqqa baılanysty sottalǵan adamnyń kesimdi jazany tolyq ótep shyǵaryna jurttyń senimi az edi. Sondyqtan da sottalǵan jemqorlardy merziminen buryn shartty túrde bosatýdyń kúshin joıý eń qýatty profılaktıkalyq áserge ıe bolady.
Jemqorlyq derekteri týraly habarlaǵan adamdardy zań júzinde qorǵaıtyn júıe qalyptastyrý týraly usynysy da osyǵan deıin eskerilmeı kelgen máseleniń biri.
2021 jyldan bastap memlekettik qyzmetshiler, depýtattar men sýdıalar úshin shetelde bank shottaryn ıelenýge tyıym salýdy engizý bastamasy el múddesi úshin qyzmet etý ıdeologııasy turǵysynan ǵana emes, jemqorlyq kapıtalyn shetelge shyǵarý múmkindikterin joıý maqsatynda da mańyzdy.
«Qoǵamdyq baqylaý týraly» zańnyń qabyldanýy azamattar men úkimettik emes uıymdardy sybaılas jemqorlyq pen bıýrokratııaǵa qarsy júıeli túrde áreket etýge barynsha keń aýqymda tartýǵa sep bolady.
Ardaq ERSEIITOV,
Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) Qyzylorda oblysy boıynsha departament basshysy