Qazannyń 3-i kúni AQSh-tyń Nıý-Iork qalasyndaǵy ataqty «Medıson skver garden» sport kesheninde Búkilálemdik boks assosıasııasynyń nusqasy boıynsha 72,6 kıloǵa deıingi salmaqta óziniń ataǵyn toǵyzynshy márte amerıkalyq Kertıs Stıvenspen shaıqasta qorǵaǵan qazaqstandyq Gennadıı Golovkın 8-raýndta jeńiske jetti.
Sóıtip, bizdiń jerlesimiz 12 raýndtan turatyn jekpe-jekti aqyryna deıin jetkizbeı, ony óz paıdasyna sheshe bildi. Ol osymen bıylǵy jyly ótkizgen 4 shaıqasynyń bárin de jeńispen aıaqtady.
Osy aıqastyń aldynda ǵana Gena múmkindigi bolǵanynsha qarsylasyn uryp qulatyp, nokaýtpen jeńýge umtylatynyn málimdegen edi. Saıypqyran jigitimiz sol degenine jetti. Ol qarsylasyn uryp qulatpaǵanymen, segizinshi raýndta amerıkalyqtyń jattyqtyrýshylar shtaby urysty aıaqtaýǵa sheshim qabyldap, ortaǵa aq oramal tastady. Tehnıkalyq nokaýt! Al shaıqastyń barysy báribir Genanyń jeńetinin baıqatqandaı bolatyn. Onyń ústine jetinshi raýndtan bastap Stıvenstiń bir kózi jumylyp, ashylmaı qaldy.
Qazaqstandyq boksshy jekpe-jektiń basynan onyń tizginin óz qolynda ustady. Ol barlyq raýndtarda básekelesinen basym túsip otyrdy. Biz Kertıstiń tek tórtinshi raýndtyń sońynda belsene qımyldaǵanyn kórdik. Qalǵan ýaqyttardyń bárinde Genanyń aýyr soqqylary onyń basy men kózine, baýyry men búıirine dembil-dembil tıip turdy.
Bul shaıqasy úshin Gennadıı 400 myń dollarǵa qol jetkizetin bolsa, Stıvenske 290 myń dollar beriledi.
Al jeńis qutty bolsyn, aǵaıyn!
Rýslan Igilik.
{youtube}I3aSU_fE2p4{/youtube}