"Bolashaq" halyqaralyq stıpendııasy ıegerleriniń tizimi jarııalandy. Bul týraly Bilim jáne ǵylym vıse-mınıstri Mıras Dáýlenov óziniń Facebook-tegi paraqshasynda málim etti, dep habarlaıdy Egemen.kz.
«Bolashaq» halyqaralyq stıpendııasyn taǵaıyndaýda konkýrstyq irikteýdiń ádildigi men ashyqtyǵyn qamtamasyz etýge baǵyttalǵan mańyzdy qadam jasaldy. Stıpendıattardy irikteý Prezıdenttik jastar kadrlyq rezervine irikteý úlgisi boıynsha tolyǵymen avtomattandyrylǵan. Konkýrstyq irikteýdiń ár kezeńi proktorıng júıesi arqyly sıfrlandyrylǵan jáne beınetirkeýge alyndy. Biz keshendi testileý men suhbattasý prosesin ótkizý tásilin sapaly etip ózgerttik. Úmitkerler oqý ornyna óz betimen túsýi tıis, sondyqtan pándik suraqtar qoıyp, tekserýdiń qajeti joq. Onyń ornyna biz úmitkerlerdiń taldaý, synı oılaý, faktilerdi túsindirý daǵdylaryn jáne erekshe jaǵdaılarda beıimdelý qabiletterin baǵalaýǵa nazar aýdardyq» - dedi M. Dáýlenov.
Onyń aıtýynsha, bul daǵdylarsyz sheteldik myqty joǵary oqý oryndarynda oqýdyń esh maǵynasy joq. Respýblıkalyq komıssııanyń sheshimimen «Bolashaq» stıpendııasy 106 úmitkerge berilgen.
«Taǵy bir basty jańalyq, barlyq stıpendıanttyń bilim alý barysy boıynsha monıtorıng Halyqaralyq baǵdarlamalar ortalyǵynyń jańa portalynda sıfrlyq formatta júzege asyrylatyn bolady. Endi stıpendıattarǵa jarty jylda bir ret transkrıpterdi skanerleýdiń, esepter jazýdyń jáne anyqtamalar jiberýdiń qajeti joq. Barlyq derek blokcheın tehnologııasyna negizdelgen júıede jınalady. Al sol júıedegi kez kelgen ózgerister avtomatty rejımde tirkelip, saqtalady. Bul stıpendıanttarǵa qatysty aqparattyń negizsiz ózgerýine jol bermeıdi», - deı kele stıpendıattardy quttyqtap, jańa belesterdi baǵyndyrýda tolaǵaı tabys tiledi.
Stıpendıattardyń tolyq tizimimen myna silteme arqyly tanysýǵa bolady.