Ulandaǵy jylyjaıda tropıkalyq jemister samsap tur
Jaqynda Ulan aýdanynyń ákimi Aıdos Sadyqovpen jolyǵyp, sharýa barysy jaıly suraǵanymyzda: «Ýkraınka aýylynda zeınetker Lıýdmıla Dmıtrıevna Zemlıanaıa degen ǵajap adam turady. Mamandyǵy ınjener-elektrık bolsa da, bıologııany bes saýsaǵyndaı meńgerip alǵan. Bes jyldan beri kúıeýi Nıkolaı Grıgorevıch, qyzy Iýlııa men kúıeý balasy qazaq jigiti Rýslan Qalıbekuly tórteýi aýmaǵy bir gektar jerge jylyjaı ornatyp, qazir eńbeginiń jemisin kórip otyr. Afrıkada ósetin sıtrýsty jemis-jıdek pen gúlderdiń júzge tarta sortyn qala turǵyndary men jaqyn mańdaǵy aýdandarǵa satyp, kásipkerlikti damytyp otyr. Solar jaıly qalam silteseńizder, ókinbeısizder», – dep bizdi bir jelpindirip tastady.
Ulandaǵy jylyjaıda tropıkalyq jemister samsap tur
Jaqynda Ulan aýdanynyń ákimi Aıdos Sadyqovpen jolyǵyp, sharýa barysy jaıly suraǵanymyzda: «Ýkraınka aýylynda zeınetker Lıýdmıla Dmıtrıevna Zemlıanaıa degen ǵajap adam turady. Mamandyǵy ınjener-elektrık bolsa da, bıologııany bes saýsaǵyndaı meńgerip alǵan. Bes jyldan beri kúıeýi Nıkolaı Grıgorevıch, qyzy Iýlııa men kúıeý balasy qazaq jigiti Rýslan Qalıbekuly tórteýi aýmaǵy bir gektar jerge jylyjaı ornatyp, qazir eńbeginiń jemisin kórip otyr. Afrıkada ósetin sıtrýsty jemis-jıdek pen gúlderdiń júzge tarta sortyn qala turǵyndary men jaqyn mańdaǵy aýdandarǵa satyp, kásipkerlikti damytyp otyr. Solar jaıly qalam silteseńizder, ókinbeısizder», – dep bizdi bir jelpindirip tastady.
Mamandyǵymyz jańalyqqa jany qumar jan bolǵannan keıin qalaı shydaıyq, janymyzda aýdandyq aýyl sharýashylyǵy, veterınarııa jáne kásipkerlik bóliminiń bastyǵy Amangeldi Serǵazın bar, salyp uryp Ýkraınkaǵa keldik. Ýkraınka naryqtyń ótpeli shaǵynda syr bermegen, sebebi, munda «Shyǵys-Sút» zaýytynyń úlken óndirisi jumys istep tur, aýyldyń júzge tarta adamy eńbek etip, jalaqylaryn ýaqtyly alýda. Sút zaýytynyń qarsy aldynda eki qabatty eńseli úıde Zemlıanoılar otbasy, janynda qatar, tórt jylyjaı kesheni sap túzegen.
Asyra aıtqandyq emes, jylyjaıǵa kirip kelgende beınebir ıranbaqtyń tabaldyryǵyn attaǵandaı áserde qaldyq. Dál irgemizde osyndaı ǵajaıyp jylyjaı bar degen qaperimizge de kelmepti. Ishteı ózimizdi sógip, tórt jylyjaı úılerinde ósip turǵan banan, lımon, injir, mandarındi, ómiri kórmegen alqyzyl, sary, kók tústes gúlderdiń ǵajap ıisine eltip, oıǵa shomyp ketippiz.
– Alǵashqyda ońaı bolǵan joq. Otaǵasy Nıkolaı Grıgorevıchtiń basqa sharýasy jetip artylady. Degenmen, ol kisi kóp kómektesti. Jumystyń aýyrlyǵynan bárin tastap ketsem degen oı mazalady. Alǵashqy kezde qııar, sarymsaq, sábiz, qyzanaq ósirdik. Afrıkanyń sıtrýsty jemisterin ósirem degende jerlesterim ań-tań bolyp, senimsizdik tanytty. Altaıdyń 40 gradýs aıazynda banan, lımon, mandarındi qalaı ósirmeksiń, qoı áýre bolma degen sózderdi estigende qobaljyǵanym ras. Mine, eki-úsh jyl boldy lımon, banan, mandarın bitik óse bastady. Bıyl 1,5 myń tonna sıtrýsty saýda oryndaryna jónelttim. Kóp bolmasa da, tabys bar, nemerelerim qolǵabys jasap, jemiske qaryq bolýda. Mine, dámin tatyp kórińizder, dep «Kıevskaıa» sortty lımon men mandarındi úzip berdi. Dámi til úıiredi, mıneraldy tyńaıtqyshtar qosylmaǵandyqtan hosh ıisi ańqyp, adam janyn elitkendeı.
Jaqyn mańdaǵy aýyl turǵyndary, oblys ortalyǵyndaǵy gúl satatyn dúkender raıhan, tropıkalyq «býchenvıllııa», orhıdeıa, túrli-tústi gúlderge aldyn ala tapsyrys beredi eken. Gollandııadan kelip jetkenshe, gúlderdiń sapasyn tómendetip, birer kúnnen keıin sola bastaıtyny belgili. Al Ýkraınkadan ákelingen gúlder bir apta, tipti, on kún boıy óńin bermeı, hosh ıisi ańqyp turady. «Internetke jıi-jıi enip, ósimdik, gúl álemindegi jańalyqtardy qalt jibermeımin. Gúl sorttaryn kúıeý balam jetkizip beredi. Nemerelerim Tımýr men Lıýdmılaǵa alǵysym sheksiz, qashan bolmasyn júgirip júrip qolǵabys jasaıdy», dep Lıýdmıla Dmıtrıevna aǵynan jaryldy.
«Aýmaǵy 1000 sharshy metr jylyjaıǵa qajetti jylylyqty berý ońaı sharýa emes. Qatty aıazda saq bolǵan jón. Jylý beretin Reseıdiń qazandyǵyn ózderi ornatyp alypty. Jylyna júz tonnadan astam kómir jaǵamyz», deıdi kochegar jigitter. Aýyldaǵy jylyjaıdan úlken ásermen oraldyq.
Ońdasyn ELÝBAI,
«Egemen Qazaqstan».
Shyǵys Qazaqstan oblysy,
Ulan aýdany.
-------------------------------
Sýretti túsirgen avtor.