Tájikstanda eldiń prezıdentin saılaý úshin daýys berý aıaqtaldy. Memleket basshysy aldaǵy jeti jylǵa qaıta saılandy. Bul týraly ITAR-TASS habarlady.
Respýblıkada jergilikti ýaqytpen 20:00-de barlyq saılaý ýchaskeleri daýys sanaý úshin jabyldy. Ortalyq saılaý komıssııasy apparatynyń tóraǵasy Abdýmanon Dodoev agenttik tilshisine barlyq jerde saılaýdyń azamattardyń óte joǵary belsendiligimen júrgizilgenin jetkizdi. Saılaýda barlyǵy 3,8 mln. adam daýys berýge qatysqan. Bul tizimgen engizilgen saılaýshylardyń 80,3 paıyzyn quraıdy.
Qazir elde Emomalı Rahmonnyń saılanǵanyna eshkim kúmán keltirip otyrǵan joq.Tájik saıasattanýshysy, ulttyq parlament depýtaty Sýhrob Sharıpov osyǵan oraı «Tájikstan aımaqtarynyń basym bóliginde jurt eshqandaı basqa partııa jóninde buryn estip kórmegen, biraq esesine olardyń bári Emomalı Rahmondy óte jaqsy biletinin» aıtty.
Sarapshylar sonymen qatar saılaýdyń oppozısııalyq partııalardyń qatysýynsyz ótkenine de nazar aýdaryp otyr. Sondaı eki yqpaldy saıası kúsh – Tájikstan Islam qaıta órleý partııasy men bılikke oppozısııalyq baǵyt ustaıtyn Sosıal-demokratııalyq partııa saılaýǵa qatysýdan bas tartqan. Bul sheshim oppozısııa usynǵan, esh partııada joq 61 jastaǵy quqyq qorǵaýshy Oınıhol Bobonazarova kandıdat retinde tirkelý úshin ózin qoldaıtyn 210 myń qol jınaý sheginen shyǵa almaı, saılaý aldy jarysynan shyǵyp qalǵannan keıin qabyldandy.
Oppozısııa eldiń basshylyǵyn qol jınaý naýqanynda saılaýshylarǵa qysym kórsetti dep aıyptaıdy. Al Tájikstan bıligi oppozısııa kemshilikti basqadan emes, ózderinen izdeýi kerek edi, dep otyr.
«Qazirgi saılaý bul – úlken spektakl. Bizdiń jaqtastarymyz onda ózderin kórermen retinde de kórgileri kelmeıdi», - dedi Islam qaıta órleý partııasy saıası keńesiniń múshesi, belgili saıasattanýshy Hıkmatýllo Saıfýllozoda.
Sáken Maılybaı.