Elbasynyń Úkimettiń keńeıtilgen otyrysynda aıtqan syn-eskertpelerine qatysty óz oı-pikiri men «Aq jol» partııasynyń ustanymyn Parlament Májilisiniń depýtaty, Ekonomıkalyq reforma jáne óńirlik damý komıtetiniń múshesi Azat Perýashev ta jetkizdi.
Elbasynyń Úkimettiń keńeıtilgen otyrysynda aıtqan syn-eskertpelerine qatysty óz oı-pikiri men «Aq jol» partııasynyń ustanymyn Parlament Májilisiniń depýtaty, Ekonomıkalyq reforma jáne óńirlik damý komıtetiniń múshesi Azat Perýashev ta jetkizdi.
Memleket basshysynyń bıylǵy jyldyń 11 qazanynda ótken Úkimettiń keńeıtilgen otyrysynda eshkimniń bet-júzine qaramaı, budan ári jol berýge bolmaıtyn kemshilikterdi atap kórsetip, Úkimettiń jumysyn ótkir synǵa alýy biz úshin tosyn jaǵdaı bolǵan joq. Bizdiń partııa memlekettik organdardaǵy kóptegen jaǵymsyz derekterdiń betin ashý arqyly Prezıdent memlekettiń halyq aldyndaǵy jaýapkershiligin qamtamasyz etetinin jáne óziniń qarapaıym azamattardyń jaǵynda ekenin taǵy bir kórsetti dep esepteıdi», dep bastady óz sózin Azat Turlybekuly.
Ol sondaı-aq Prezıdent keńeıtilgen otyrysta qarapaıym adamdardyń jáne kásipkerlerdiń basynda kezdesip júrgen kúndelikti problemalary týrasynda Úkimetke qatań túrde eskertkenin atap ótti. «Men bul syn-eskertpelerdiń biz úshin tosyn bolmaǵanyna birneshe mysal keltire alamyn. Máselen, «Aq jol» partııasynyń fraksııasy elimizdegi «Turǵyn úı qurylys jınaq bankinde» oryn alǵan soraqy jaǵdaılar týraly Úkimetke jáne Bas Prokýratýraǵa bıylǵy jyldyń 11 aqpanynda jáne 19 maýsymynda depýtattyq saýaldarmen eki márte shyqqan bolatyn. Sol kezde bul másele kóptegen BAQ-tarda jarııalanyp, al men bank basshylyǵynyń jumysyna kóńilimizdiń tolmaıtyny jóninde birneshe ret túsinikteme bergen edim. Alaıda, biz О́ńirlik damý mınıstrliginiń, mınıstrdiń mindetin atqarýshy Nokınniń atynan: «Aq joldyń» depýtattary keltirgen derekter dáleldengen joq. Al bank basshylyǵy men olardyń týǵan-týystary páterlerdi «Qoljetimdi turǵyn úı» baǵdarlamasy boıynsha zańdy túrde alǵan. Bári durys», degen syńaıdaǵy syńarjaq jaýap qana aldyq. Al eger de bul málimetter Elbasyna jetpegende eshkim mundaı zańsyzdyqtardy dáleldeı almas edi. Sebebi, búgingi kúnge deıin bir sheneýnik basqa sheneýnikterdiń zańǵa qaıshy áreketterin jamap-jasqap, búrkemelep kelgen», dedi depýtat bul oraıda.
A.Perýashevti oblystyq ákimderdiń janyndaǵy óńirlik keńesterde maquldanyp qoıǵan jobalardyń tıisti mólsherde memlekettik qoldaý ala almaıtyn jaǵdaıǵa jetkeni de qynjyltady eken. «Aq jol» partııasynyń depýtattyq fraksııasy «Bıznestiń jol kartasy - 2020» baǵdarlamasy boıynsha qolǵa alynǵan jobalardy qarjylandyrýdaǵy kemshilikter týrasynda 1 qazanda depýtattyq saýal jarııalaǵan edi. Sol depýtattyq saýalymyzda: «Baǵdarlamaǵa qarajat bólinbegen kúnniń ózinde kásipkerlikti qoldaý baǵytyndaǵy barlyq memlekettik baǵdarlamalarǵa tekseris júrgizip, olardyń ishindegi eń tabysty jáne kóp suranysqa ıe baǵdarlamalarǵa qaıta qarajat bólý qajettigin» eskertken edik. Biraq, ol is júzine aspady», dedi depýtat. Bul oraıda, «Aq jol» fraksııasy qajetti qarajatty tabý úshin basqasha jol qarastyrýdy usynǵan. «Máselen, biz jumys tetiginiń iske qosylǵanyna 3 jyldan astam ýaqyt ótse de, áli kúnge deıin bir de bir jeńil ushaq shyǵarmaǵan Qaraǵandydaǵy «QazAvıaSpektr» zaýytyn synǵa aldyq. Al elimizde qazirdiń ózinde ónim shyǵaryp, biraq ýáde etilgen qarjyny ala almaı otyrǵan basqa da kásiporyndar bar emes pe? Olar bul jaǵdaı týraly ne oılaıdy? Sondyqtan, júzege asyrylmaǵan jobalardy qysqartyp, olarǵa bólingen qarjyny jumys istep turǵan kásiporyndarǵa aýdarýymyz kerek», dedi A. Perýashev.
Depýtat Memleket basshysynyń Keden odaǵy aıasyndaǵy kelissózderdiń nátıjeli júrgizilmeı otyrǵanyna qatysty syny da der kezinde aıtylǵanyn jetkizdi. Onyń sózine qaraǵanda, «Aq jol» partııasy Úkimettiń keńeıtilgen otyrysynan 2 kún buryn, ıaǵnı 9 qazanda qazaqstandyq sheneýnikterdiń Keden odaǵy aıasyndaǵy kelissózder úderisine enjarlyqpen qaraıtyny týrasynda, al mundaı jaǵdaı otandyq bızneske jáne ekonomıkaǵa aıtarlyqtaı deńgeıde nuqsan keltirip otyrǵany jóninde depýtattyq saýal kótergen eken.
«Men kemshilik ataýlyny tizip qana qoıǵym kelmeıdi. «Qazir kemshilikter qalaı túzetilýde? Olar jalpy túzetilip jatyr ma?» degen saýaldarǵa nazar aýdarsaq deımin. Búginde biz zań shyǵarýshy jáne atqarýshy bılik organdary arasyndaǵy ókilettilikterdiń úılesimsizdigi men teńgerimsizdigine kýá bolyp otyrmyz. Sondyqtan, Úkimettiń depýtattardyń keıbir soqqan dabyldaryna syrǵytpa sózdermen ǵana jaýap beretini biz úshin úırenshikti jaǵdaıǵa aınaldy. Máselen, Prezıdenttiń keltirgen syndaryna qatysty: «Kináliler bar shyǵar. Biraq, men emes, basqa bireý» degen sııaqty kózqaraspen qaraıtyn jaǵdaılar oryn alýda. Qarapaıym ǵana mysal. Osy jaǵdaıdan keıin Premer-Mınıstr eki vıse-mınıstrdi qyzmetinen ketirdi, vıse-premer oblystyq ákimdik qyzmetkerlerin jumystan shyǵarýdy talap etti, al Indýstrııa jáne jańa tehnologııalar mınıstrligi baǵdarlamalardyń júıeli oryndalmaǵany úshin kásipkerlerdiń ózine kiná taqty. Al syrt kózge bul: «Aıran ishken qutylatyn, shelek jalaǵan tutylatyn» jaǵdaı bolyp kórinetinin nege qaperlerine almaıdy? Biz úshin sheneýniktiń óz laýazymdyq mindetterin jáne Memleket basshysynyń naqty tapsyrmalaryn tap-tuınaqtaı oryndaýy mańyzdy», dedi depýtat.
Sonymen qatar, A.Perýashev, Elbasynyń eldi ındýstrııalandyrýdy tıisti mólsherde qarjylandyrý, otandyq óndirýshilerge qoldaý kórsetý, óndiris jáne jańa tehnologııalar salasyndaǵy kásiporyndar úshin qolaıly salyqtyq rejim engizý sekildi basqa da kóptegen máselelerge qatysty aıtqan pikirlerin de tolyqtaı qoldaıtynyn jetkizdi. «Sondyqtan, Prezıdenttiń qatysýymen ótken Úkimettiń keńeıtilgen otyrysy aldaǵy ýaqytta Úkimet pen parlamenttik fraksııalar ózara tyǵyz baılanysta jumys istep qana qoımaı, zań shyǵarýshy jáne atqarýshy bılik tarmaqtary arasyndaǵy teńgerimdilik tetigin nyǵaıtý qajettigin taǵy bir dáıektep bergendeı boldy», dedi A.Perýashev.
Láıla EDILQYZY,
«Egemen Qazaqstan».