О́tken aptanyń juma kúni Mońǵol eliniń astanasy Ulan-Batyr qalasynda Qazaqstan Respýblıkasynyń Mońǵolııadaǵy elshiliginiń uıymdastyrýymen aǵartýshy-aqyn Abaı Qunanbaıulynyń 175 jyldyǵy jáne uly ǵulama Ábý Nasyr ál-Farabıdiń 1150 jyldyǵyna arnalǵan «Abaı jáne Ál-Farabı taǵylymy» atty kesh uıymdastyryldy.
Is-sharaǵa Mońǵolııa Úkimeti janyndaǵy Mádenıet jáne óner isteri jónindegi atqarýshy agenttik basshysy S.Nasagdolgor, «Abaıdyń qarasózderi» kitabynyń mońǵol tilindegi aýdarmasynyń avtory, qoǵam qaıratkeri Sultan Táýkeı, sondaı-aq jergilikti buqaralyq aqparat quraldary jáne qazaq dıasporasynyń tanymal tulǵalary qatysty.
Keshti ashyp sóz sóılegen Qazaqstan Respýblıkasynyń Tótenshe jáne ókiletti elshisi Jalǵas Ádilbaev atalǵan qos tulǵanyń eńbegi hám qoǵamdy damytý tujyrymdamalary jalpyadamzattyq qundylyqqa, aǵartýshylyq ıdeıalaryna negizdelgenin atap ótti.
«Abaı Qunanbaıuly men Ál-Farabı – kóshpendi halyqtyń, ıaǵnı qazaq halqy mádenıetiniń kórinisi. Osy eki uly oıshyldyń arasynda myńjyldyqtar jatsa da, olardyń dúnıetanymy jáne shyǵarmalary bir mezgilde jazylǵan sııaqty» dedi óz sózinde Mońǵolııa Úkimeti janyndaǵy Mádenıet jáne óner isteri jónindegi agenttiktiń basshysy S.Nasagdolgor hanym.
Kesh barysynda mońǵol tiline aýdarylǵan «Abaıdyń qarasózderi» kitabynyń tusaýkeseri ótti. Kitaptyń avtory, dıplomat, professor, tarıhshy, jazýshy jáne aýdarmashy Sultan Táýkeıuly Abaı murasy – qazaq halqynyń ǵasyrlar boıy jınaqtalǵan jáne barlyq danalyqty boıyna sińirgen rýhanı baılyq ekenin basa aıtyp, aqynnyń shyǵarmalary qansha ýaqyt ótse de qundylyǵyn joımaıdy hám ár kez rýhanı baǵytty nusqaıdy dedi.
Jıyn barysynda Abaı Qunanbaıulynyń ómiri men shyǵarmashylyǵy týraly mońǵolııalyq abaıtanýshylar T.Etekbaı men A.Jambyldyń baıandamalary tyńdaldy. Sonymen qatar basqosý kezinde Abaıdyń «Jelsiz túnde jaryq-aı», «Aıttym sálem, qalamqas» týyndylary mońǵol halqynyń ulttyq aspaby morınhýrmen oryndalyp, qonaqtar qazaq dıasporasynyń daryndy jastarynyń oryndaýynda kópshilik súıip tyńdaıtyn «Kózimniń qarasy» jáne «Segiz aıaq» ánderi, sondaı-aq aqynnyń mánerlep oqylǵan óleńderi men qarasózderin tamashalady.
Kórermender úshin ulylarǵa arnalǵan fotokórmeler men kitap kórmeleri uıymdastyrylyp, jıynǵa qatysýshylar Abaı men Ál-Farabıdiń ómiri men shyǵarmashylyǵy týraly derekti fılmdi tamashalady.