Koreıa respýblıkasynyń bıligi seısenbiden bastap qoǵamdyq kólikterde jáne búkil el aýmaǵynda adamdar kóp jınalatyn jerlerde koronavırýstyq ınfeksııanyń taralýyn boldyrmaý úshin mindetti maska rejımin engizdi, dep habarlaıdy Egemen.kz TASS agenttigine silteme jasap.
Aýrýlardy baqylaý jáne aldyn alý jónindegi ulttyq basqarmanyń habarlaýynsha, áleýmettik alystaý deńgeıine qaramastan medısınalyq jáne mektepke deıingi mekemelerde maska kııý mindetteldi.
13 qazannan bastap tártip buzýshylarǵa 100 myń vonǵa deıin aıyppul salynady. Mindetti maska rejımi bar nysandarǵa jaýapty adamdarǵa onyń saqtalýyn qamtamasyz ete almaǵany úshin 3 mıllıon von aıyppul salynýy múmkin.
14 jasqa deıingi balalar men medısınalyq sebepter boıynsha maska kıe almaıtyn adamdar úshin jaǵdaı qarastyrylǵan. Olar maska kımese bolady. Sondaı-aq qorǵanys maskalaryn medısınalyq prosedýralar, tamaqtaný jáne basseınde júzý kezinde alyp tastaýǵa ruqsat etiledi. Mundaı jaǵdaılarda adamdarǵa aıyppul salynbaıdy.
О́z kezeginde Ońtústik Koreıanyń densaýlyq saqtaý jáne áleýmettik qamsyzdandyrý mınıstrligi elde tumaýǵa qarsy tegin vaksınasııa baǵdarlamasy qaıta bastalǵanyn habarlady. Ońtústik Koreıada bıyl pandemııa kezinde medısınalyq mekemelerge júktemeni azaıtý úshin halyqty maýsymdyq tumaýǵa qarsy jappaı tegin vaksınasııalaý bastaldy.
Ońtústik koreıalyq dárigerler ótken táýlikte 102 adamnyń koronavırýs juqtyrǵanyn anyqtady, pandemııa bastalǵaly beri respýblıkada koronavırýs juqtyrǵandardyń jalpy sany 24 805-ke jetti.