Qazaqstan Respýblıkasynyń Tuńǵysh Prezıdeti – Elbasynyń «Abaı amanaty» atty eńbegin qatty qyzyǵyp oqydym. Ol uly aqyn tusyndaǵy qazaqtyń rýhanı jańarýynyń baǵaly oılaryn qamtyǵan, oı-pikiri, jańashyldyǵy mol, úlken mańyzdy týyndy eken. Tarıhı paralell de kóp. Aǵartýshylyq nemese oıaný dáýiriniń belgileri keıingi oqyǵandarmen sabaqtasyp, asyldy taný jolyn ashýǵa ulasyp, bolashaq Elbasy júrip ótken alǵash bolat qorytýshynyń joly, qazaqtyń jańa memleketiniń qurylýy, «Máńgilik el» bolýdaǵy batyl izdenister ózara baılanysa ádemi ashylypty.
Qazaqtyń Tuńǵysh Prezıdentiniń Abaı amanaty men ósıeti týraly oı-pikiri arǵy tarıh pen jańa tarıhtyń arasyn tabıǵı jalǵap, búgingi býynǵa aıryqsha oı salady. Osylardy kópti kórgen kári ádebıetshi, zertteýshi retinde joǵary baǵalaımyn.
Men – Elbasymmen talaı márte jolyqqan, suhbattasqan ǵalymmyn. Sol kezdesýlerdiń bári de esimde. Nursultan Ábishuly – ult tarıhyn, tulǵalar taǵdyryn, mádenı murany halyqtyń, ulttyń múddesimen oraılastyra túsinetin qaıratker. Osy eldik túsinikti qaıratkerlik ulanǵaıyr isinde paıdalana alatyn saıasatker. Buǵan ósken ortasy men alǵan tálim-tárbıesi, bılik satylaryndaǵy baı tájirıbesi yqpal etkeni sózsiz.
Dana Abaı – Nursultan Ábishulynyń árdaıym oqıtyn, jıi dáıek alatyn tulǵasy. Meniń esime de uly aqynnyń IýNESKO sheńberinde ótken 150 jyldyq mereıtoıy túsedi. Rasynda, Nursultan Ábishuly bolmasa, ol kisiniń halyqarylyq bedeli bolmasa, mereıtoı bıik deńgeıde ótpes edi. Ol kezde men aqynnyń akademııalyq eki tomdyǵyn ázirlegen M.O.Áýezov atyndaǵy Ádebıet jáne óner ınstıtýtynyń dırektory edim. «Toıdyń bolǵanynan boladysy qyzyq» degen, Elbasynyń arqasynda úkimettik deńgeıde atqarylǵan jumystar qanshama oń nátıje berdi. Eskertkishter de turǵyzyldy, ǵımarattar da salyndy, kitaptar da shyǵaryldy, túrli janrda fılmder de túsirildi. Bular – abaıtanýdyń zor bıigi bolyp qaldy.
Kópti kórgen, dana da dara qaıratker deńgeıine eńbegimen kóterilgen Nursultan Ábishuly osy maqalasyn: «Abaıdyń sózi men oıy bizdiń kúnbe-kúngi tirligimizge, órkendi ómirimizge kirpish bolyp qalanyp, búgingi órkenıet pen aldaǵy bolashaq talabyna laıyq umtylystarymyzdan jáne ıgi isterimizden naqty kórinis tabatynyna kámil senemin» dep túıindepti. Elbasy tujyrymyn tutas ulttyń talabyna berilgen bata, aq nıet dep qabyldasaq ta bolady. Bul – ult danalyǵyna adaldyq.
Abaı amanaty jańarǵan, jańǵyrǵan Qazaqstandy shyńdap, jańa bıikterge bastaı bergeı.
Serik QIRABAEV,
akademık