Memlekettik tehnıkalyq qyzmet Cybersecurity Alliance for Mutual Progress (CAMP) О́zara ilgerilikke arnalǵan kıberqaýipsizdik alıansynyń 5-shi jyl saıynǵy konferensııasynda júldeli orynǵa ıe boldy. Bul týraly «Memlekettik tehnıkalyq qyzmet» RMK baspasóz qyzmeti habarlady.
2020 jylǵy 14-20 qyrkúıek aralyǵynda CAMP músheleriniń 5-shi jyl saıynǵy konferensııasy ótti. Onda qatysýshy eldermen áriptestik sheńberinde aqparattyq qaýipsizdik máseleleri talqylandy jáne 2019-2020 jyldardaǵy aqparattyq qaýipsizdik ınsıdentteriniń asa mańyzdy oqıǵalary taldandy. Bıyl COVID-19 pandemııasyna baılanysty uıymdastyrýshylar is-sharany onlaın-formatta ótkizý týraly sheshim qabyldady.
Alıanstyń árbir qatysýshysyna óz elin tanystyrýǵa jáne kıberqaýipsizdik jaǵdaıy týraly aıtýǵa múmkindik berildi. Qazaqstan atynan Memlekettik tehnıkalyq qyzmettiń departament dırektory Medet Ysqaqov sóz sóılep, Qazaqstannyń COVID-19 pandemııasy kezeńinde kıbershabýyldarǵa qarsy kúrestegi tájirıbesimen bólisti. Qazaqstandyq spıkerdiń sóz sóıleýi CAMP qatysýshy 47 elden «Best Speaker» atalymynda úzdik dep tanyldy.
Eske sala keteıik, ótken jyly Qazaqstan CAMP uıymdastyrý komıtetiniń quramyna kirip, uıymdastyrý komıtetiniń tizimin on elge deıin tolyqtyrdy. CAMP (Cybersecurity Alliance for Mutual Progress) – Ońtústik Koreıada jumys isteıdi, onyń quramyna 46 elden 60 uıym kiredi. Alıansty kıberqaýipterdiń aldyn alý úshin jahandyq uıymǵa aınaldyrý maqsatynda CAMP músheleri barǵan saıyn kúrdelene túsetin jáne búkil álem boıynsha paıdalanýshylar men uıymdardy kóbirek qozǵaıtyn kıberqaýipsizdik máseleleri boıynsha oqý baǵdarlamalarymen jáne aqparatpen almasý múmkindigine ıe.