Memleket basshysy Nursultan Nazarbaev KSRO Halyq ártsi, Qazaq KSR halyq ártisi, asa kórnekti opera ánshisi Ermek Serkebaevtyń qaıtys bolýyna baılanysty otbasy men týǵan-týystaryna kóńil aıtý jedelhatyn joldady. Bul týraly Aqordanyń baspasóz qyzmeti habarlady.
Jedelhatta óz dara daýysy arqyly jastaı tanylǵan Ermek Serkebaevtyń ómir boıy elimizdiń basty óner ordasy – Abaı atyndaǵy Qazaq memlekettik opera jáne balet teatrynda jemisti eńbek etkeni atap ótilgen.
«Daýysy qandaı ásem bolsa, jany da sondaı sulý onyń oryndaýyndaǵy qazaqtyń halyq ánderi men álemdik opera týyndylaryndaǵy basty arııalar tyńdaýshylardyń janyn árdaıym nurǵa bóleıtin», – delingen jedelhatta.
Memleket basshysy Ermek Serkebaevtyń álemniń kóptegen elderi sahnalarynda óner kórsetý baqytyna ıe bolyp, halyqaralyq aýdıtorııa yqylasyna bólengenin atap ótken. Ol konservatorııada ustazdyq ete júrip, keńinen tanymal bolǵan kóptegen shákirtter de tárbıeledi. KSRO Joǵarǵy Keńesiniń, sondaı-aq Qazaq KSR-nyń depýtaty bolyp saılandy. Sosıalıstik Eńbek Eri ataǵyna ıe bolyp, «Otan» ordenimen marapattaldy.
Qazaqstan Prezıdenti Ermek Serkebaevtyń eńbegi elimizdiń án óneri tarıhynda, al esimi halqymyzdyń júreginde árdaıym saqtalatynyna senimin bildirgen.