Budan biraz ýaqyt buryn Qyzylordada Qazaqstannyń birinshi derbes prokýrory, belgili qoǵam qaıratkeri Súleımen Esqaraevtyń týǵanyna 115 jyl tolýy keń kólemde atap ótildi. Osy saltanat sharasynyń aıasynda oblystyq prokýratýra ǵımaratynyń aldynda tuńǵysh prokýrordyń tastuǵyrǵa qonǵan eskertkishi ashyldy.
Budan biraz ýaqyt buryn Qyzylordada Qazaqstannyń birinshi derbes prokýrory, belgili qoǵam qaıratkeri Súleımen Esqaraevtyń týǵanyna 115 jyl tolýy keń kólemde atap ótildi. Osy saltanat sharasynyń aıasynda oblystyq prokýratýra ǵımaratynyń aldynda tuńǵysh prokýrordyń tastuǵyrǵa qonǵan eskertkishi ashyldy.
Qaısybir izgi nıetti iste de onyń ilki ıdeıasyn kóterip, keregesi kerilýine muryndyq bolyp júretin bir azamattar bolady. Bul joly tap sondaı izgilik nyshanyn oblys prokýrory, aǵa ádilet keńesshisi Saparbek Nurpeıisov kórsetti. Ol eń aldymen oblysta osyndaı sharanyń ótýin zańdastyrýǵa qol jetkizdi. Sodan keıin tuńǵysh prokýror týraly estelik kitap jazylyp, derekti fılm túsirilýin qamtamasyz etti. Bularmen qatar, oblystyq prokýratýra ǵımaratynda S.Esqaraev atyndaǵy vedomstvolyq murajaıdy daıyndaý jumystary qyzý júrip jatty.
Aqyrynda kópten kútken kún de keldi. Sharaǵa Bas prokýratýra men oblys basshylarynan bólek, tuńǵysh derbes prokýrordyń qyzy Marıetta Esqaraeva, nemeresi Marat Baımuhanov jáne basqa da týystary, sondaı-aq, prokýratýra organdarynyń ardagerleri qatysty. Osy alqaly top aldymen Súleımen Esqaraev eskertkishiniń ashylý rásimin ótkizdi. Munyń ózi jan tebirenterlik sátterge toly boldy. Ony «Ulttyń rýh tulǵasy» atty teatrlandyrylǵan qoıylym bastap berdi. Budan soń Bas prokýrordyń orynbasary Nurmahanbet Isaev Bas Prokýrordyń sharaǵa qatysýshylarǵa arnalǵan izgi lebizin jetkizdi. Oblys ákimi Qyrymbek Kósherbaev, oblystyq ardagerler keńesiniń tóraǵasy Seıilbek Shaýhamanov sóz alyp, Súleımen Esqaraev eńbeginiń tarıhtan esh óshpeıtin ónegesi týraly tolǵamdy áńgimeniń arqaýyn tarqatty.
Qazaqstan Sýretshiler odaǵynyń múshesi, «Mádenıet salasynyń úzdigi» tósbelgisiniń ıegeri Muratbaı Úmbetovtiń qolynan shyqqan músin jınalǵandardyń kóńilinen shyqty. Jıynǵa qatysýshylar osyndaı kóterińki kóńil kúımen tuńǵysh prokýror atyndaǵy vedomstvolyq murajaıdyń da ashylý rásimine atsalysty.
Mereıtoıdyń kelesi negizgi bóligi Qorqyt ata atyndaǵy memlekettik ýnıversıtettiń Stýdentter saraıynda ótken «S.Esqaraev: Táýelsiz Qazaqstan prokýratýrasynyń qalyptasýy men damýy» atty ǵylymı-tájirıbelik konferensııa túrinde qanat jaıdy. Konferensııa aıasynda birinshi prokýrordyń ómiri men qyzmetine arnalǵan «Tarlanboz» kitaby men derekti fılmniń tusaýkeseri ótkizildi.
Serik PIRNAZAR,
«Egemen Qazaqstan».
QYZYLORDA.