Jer-jerdegi jurtshylyqqa, ásirese qaıyrymdylyq jasaýǵa etene jaqyn adamdarǵa «Aqtóbe qaıyrymdy jandar» volonterler tobyn tanystyryp jatýdyń ózi artyq. О́zderiniń taqyryptyq hám erekshe keshterimen belgili volonterler 2016 jyldan beri ıgi isterin atqaryp keledi. Qamkóńil jandarǵa dastarqan jaıyp, sol arqyly olardyń bir sátke bolsa da kóńilin kóterýdi kózdegen úlken júrekti jastar ártúrli toptaǵylardy qatar qamtıdy. Al olardyń osylaı klýb qurýyna almatylyq Aıdyn Toqsanbaeva degen belsendi qyzdyń bastamasy áser etken. Ol – ıdeıa avtory.
Álqıssa... Osydan 5 jyl buryn, ıaǵnı 2015 jyly Aıdyn ózi turatyn qalada «Almaty qaıyrymdy jandar» tobyn qurady. Oǵan sebepshi bolǵan – ájesi Lena. Keıýananyń: «Taǵdyry aýyr zamandastarymnyń kóńilin kóterip, olardyń basyn bir qosaıyqshy...» degen sózin jerge tastamaı, ózi sekildi jigitter men qyzdardyń kómegimen dastarqan jaıýdy qolǵa alady. Keıin bul ıgi úrdis Nur-Sultan, Aqtaý, Shymkent, Taraz qalalarynda jalǵasyn tabady. Bizdiń Aqtóbede de 2016 jyly osyndaı klýb qurylady.
– Qazirgi tańda elimizdegi úlkendi-kishili 20 qalada biz sekildi qaıyrymdy jandardyń toby bar. Maqsatymyz – az qamtylǵan, kóńili júdeý adamdardyń basyn qosý, kez kelgen qıyndyqtyń ýaqytsha ekenin túsindirý, olarǵa qoldan kelgenshe kómektesý. Bizdiń ózge toptardan aıyrmashylyǵymyz – eshkimge aqshalaı járdemdespeımiz, arasynda tek azyq-túlik taratamyz. Eń basty jobamyz – dastarqan jaıý. Iаǵnı jylyna úsh ret meıramhanada 200-250 adamdy jınap, merekelik keshter ótkizemiz. Birinshi kezekte ata-ájelerge, múmkindigi shekteýli azamattarǵa, sosyn ata-anasynan aıyrylǵan balalarǵa osyndaı qamqorlyq kórsetemiz, – deıdi «Aqtóbe qaıyrymdy jandar» volonterler tobynyń jetekshisi Ásem Jumabaeva.
Kópshilikke «100 ata-áje keshi», «Naǵyz batyrlar keshi», «Ertegi álemi keshi» ataýlary tanys bolar? Bul – joǵaryda aıtylǵan keshterdiń taqyryptary. Volonterler byltyr taǵy bir jobany iske asyrǵan. Ol «Anaǵa taǵzym» dep atalady. Qaıyrymdylyq keshke jalǵyzbasty, kópbalaly analar qatysady. Artynsha ázız tilekter aıtylyp, Quran oqytylady. Jınalǵandar bir-birimen tanysyp, bılep, án shyrqaıdy.
Asyly, qazirgi tańda ash júrgen eshkim joq, tek hal surasyp, sher tarqatyp, jalpy kóńil sergitýdi qunttaı bermeıtinimiz ras. Uıymdastyrýshylar kúndelikti kúıbeń tirshilik, qym-qýyt sharýalar men jumysbastylyqtan basqaǵa moıyn bura bermeıtin ómirimizde osy bir olqylyqty barynsha túzeýge tyrysyp-baǵyp júr...
– Tobymyzda 50 shaqty adam bar. Olardyń 80 paıyzy – stýdent jastar. Tek kámelet jasynan asqandardy qabyldaımyz. Muqtaj jandarǵa kómekteskendikten, volonterlerdiń ózderi qaı jaǵynan da myqty bolýy kerek. Birinshi kezekte, árıne, rýhty aıtyp otyrmyn.
Basty talap – ár múshemiz álginde aıtqan taqyryptyq keshterge bıletti ótkizýi qajet. Sol arqyly olar ózderimen qosa birneshe arnaýly toptaǵy adamnyń sharamyzǵa qatysýyna múmkindik jasaıdy. Ár bılettiń baǵasy – 3 myń teńge. Volonterlerdiń arasynda bizdi qarjylaı qoldap, biraq otyrysymyzǵa kelmeıtinder de kezdesedi. Iаǵnı olar ózgelerge kóringendi, jarııaly túrde járdemdeskendi onsha kóp qalamaıdy. Negizinen eriktilerdiń kópshiligi ózimiz sııaqty qarapaıym jandar. Árqaısysynda tek «basqalarǵa qolushyn sozsam» degen nıet-tilek bar, – deıdi áńgimelesýshimiz Ásem.
«Aqtóbe qaıyrymdy jandar» tobynyń ókilderi merekeler qarsańynda kómekke zárý adamdarǵa syı-sııapattar jasap, arasynda úı-jaıy joq, dalada júrgenderge ystyq tamaq ta taratady.
– Turaqty túrde eshkimge kómektespeımiz. Sebebi adamdar jaqsy nársege tez úırenedi, soǵan qalyptasyp ketedi. Sondyqtan kez kelgenine «bizdiń asyp-tasyp bara jatqan baılyǵymyz joq, tek jaqsylyq jasaýǵa qushtarmyz. Jaǵdaıy qıyn basqalardyń da baryn umytpańyz» dep eskertemiz, – dep áńgime arasynda syr shertti toptyń jetekshisi.
Biz tilge tıek etip otyrǵan klýbtyń alǵa qoıǵan joba-josparlary kóp. Sonyń biri kezekti «100 ata-áje keshin» jaqsy deńgeıde ótkizý. Odan soń basqa toptaǵy adamdarǵa osylaı dastarqan jaıý.
Aıbek TASQALIEV,
jýrnalıst
Aqtóbe oblysy