Parlament Senatynda "Qazaqstannyń sý qaýipsizdigi: qazirgi kezdegi qaýip-qaterler jáne olardy sheshý perspektıvalary" taqyrybyna arnalǵan úkimet saǵaty boldy. Sharaǵa ortalyq jáne jergilikti memlekettik organdardyń basshylary, sondaı-aq sý máseleleri jónindegi sarapshylar qatysty, dep habarlaıdy Egemen.kz Parlament Senatynyń baspasóz qyzmetine silteme jasap.
Senat Tóraǵasynyń orynbasary Asqar Shákirov óz sózinde kóterilgen taqyryp árbir qazaqstandyq úshin ómirlik mańyzy bar ári ulttyq qaýipsizdiktiń ajyramas bóligi retinde qarastyrylatynyn atap ótti. Adamdardyń ómir súrý sapasy men ekologııalyq sý júıesiniń saqtalýy sapaly aýyz sýdyń qoljetimdi bolýyna, gıdroqurylystardyń jaı-kúıine, sý resýrstaryn utymdy paıdalanýǵa baılanysty bolady.
"Prezıdent Qasym-Jomart Toqaev aǵymdaǵy jyldyń aqpan aıynda Ekologııa, geologııa jáne tabıǵı resýrstar mınıstrligine «sý resýrstaryn basqarý jónindegi tıisti baǵdarlamalardy ázirleý kezinde elimizdiń sý qaýipsizdiginiń barlyq máselelerin muqııat taldaýdy» tapsyrǵan bolatyn. Qazirgi kezde jańa Ekologııalyq kodekstiń jobasy QR Parlamenti Májilisiniń qaraýynda jatyr. Memleket basshysynyń ol tapsyrmasy osy qujatta tıisti kórinis tapty dep úmittenemiz", dedi Asqar Shákirov.
Transshekaralyq sý paıdalaný máseleleriniń mańyzyn eskere otyryp, osy salanyń halyqaralyq-quqyqtyq negizin qalyptastyrý usynylyp otyr. Sondaı-aq sý sharýashylyǵy obektileri men qurylystaryn tolyq kólemde pasporttaýdy júrgizý, olardyń tehnıkalyq jaı-kúıin esepke alý qajettigi atap ótildi.
Úkimet saǵatynyń júrgizip otyrǵan Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed sýdyń tasýy men topan sý jyl saıynǵy problema bolyp tabylatynyn atap ótti.
"Memleket deńgeıinde tabıǵı apat zardaptarymen kúres jáne onyń saldaryn joıý negizgi mindeti bolyp tabylatyn jeke mınıstrlik quryldy. О́tken aptada ǵana azamattyq qorǵaý máseleleri boıynsha keńeıtilgen otyrys barysynda aldyn alý jumystarynyń basymdyqqa ıe ekeni atap ótildi», - dedi Muhtar Qul-Muhammed.
Ekologııa, geologııa jáne tabıǵı resýrstar mınıstri M.Myrzaǵalıev sý týraly zańnamany jetildirý máselelerine toqtaldy.
«Kóptegen sarapshylardyń baǵalaýy boıynsha sý zańnamasy odan ári jetildirýdi talap etedi. Qoldanystaǵy Kodekske on jeti jyl ishinde 62 ret ózgerister men tolyqtyrýlar engizildi (jylyna orta eseppen – 3 retten sál artyq). Nátıjesinde quqyq qoldaný rettiliginiń joǵalýy baıqalady, bul tutastaı alǵanda sý sharýashylyǵynyń barlyq deńgeılerindegi jaǵdaıdyń nasharlaýyna ákeledi. Osyny eskere otyryp, 2021 jylǵa jańa Sý kodeksiniń jáne "Gıdrotehnıkalyq qurylystardyń qaýipsizdigi týraly" Zańynyń tujyrymdamalaryn ázirleý josparlanǵan", dedi ol.
Shara barysynda BUU Bas hatshysynyń Ortalyq Azııa boıynsha arnaýly ókili, BUU-nyń Ortalyq Azııaǵa arnalǵan preventıvti dıplomatııa jónindegi óńirlik ortalyǵynyń basshysy Natalıa German sóz sóıledi.
"Ortalyq Azııa óńirinde tolyqqandy ári turaqty ekonomıkalyq jáne áleýmettik damý turǵysynda sý jáne ekologııalyq problemalar ózekti bolyp qala beretinin atap ótkim keledi. Sońǵy jyldary BUU Bas Assambleıasynda Ortalyq Azııa elderiniń bastamasy boıynsha yntymaqtastyqty nyǵaıtýǵa, sonyń ishinde sý-ekologııalyq máselelerge baǵyttalǵan birqatar mańyzdy qararlar qabyldandy", dedi ol.
Sonymen qatar, sóz alýshylar elimizdegi sý resýrstarynyń jaı-kúıi, azamattyq qorǵanys salasyndaǵy aldyn alý jumystaryn jaqsartý máselelerine toqtaldy. Túrkistan oblysynyń ákimi О́mirzaq Shókeev О́zbekstandaǵy bógettiń buzylýynan zardap shekken Maqtaaral aýdanyndaǵy eldi mekenderdi qalpyna keltirý boıynsha júrgizilip jatqan jumystar týraly habarlady.
Otyrys qorytyndysy boıynsha senatorlar ortalyq jáne jergilikti atqarýshy organdardyń aqparatyn, depýtattardyń, halyqaralyq uıymdar ókilderiniń, ǵalymdar men mamandardyń sózderin tyńdaı kelip Úkimetke jiberiletin jáne olardyń oryndalý máselelerin turaqty baqylaýda ustaıtyn usynymdar ázirledi.