S.Seıfýllın atyndaǵy Qazaq agrotehnıkalyq ýnıversıtetine qoı saýýǵa arnalǵan jyljymaly keshen tabystaldy. Ortalyq Azııa aımaǵynda alǵash ret Qazaqstanda paıdalanylatyn tehnologııany Túrkııanyń yntymaqtastyq jáne úılestirý agenttigi qaıtarymsyz negizde berip otyr.
S.Seıfýllın atyndaǵy QazATÝ mal sharýashylyǵy, balyq sharýashylyǵy, shyryn óndirisi jáne sýdy basqarý salasyndaǵy qyzmetkerlerdiń biliktiligin arttyrý maqsatynda Túrik yntymaqtastyq jáne úılestirý agenttigimen (TIKA) aldaǵy ýaqytta bilim-ǵylym salasy boıynsha yntymaqtastyq ornatpaq. Osyǵan deıin agenttiktiń qoldaýymen Halyqaralyq mal sharýashylyǵyn zertteý jáne oqytý ortalyǵymen (Ankara, Lallahan) áriptestik baılanys jasalǵan-dy. Onyń aıasynda doktorant Aqnur Moldasheva tamaq ónimderin qaıta óńdeý tehnologııasy boıynsha ǵylymı taǵylymdamadan ótip, jas maman qoı sútinen alynatyn ónimder boıynsha túrli zertteýler júrgizip, taza ónim alýdyń jańalyǵyn úırenip keldi.
«Jobaǵa sáıkes, qoı sútinen alynatyn ónimderge arnalǵan tehnologııany jáne ázirlengen ónimderge qajetti normatıvtik-tehnıkalyq qujattamany daıyndaý kózdelgen. Ashyǵan sút ónimderin, jumsaq irimshikti jáne ulttyq ónim qurtty ázirleý men óndirýge baǵyttalǵan jumystar pysyqtalady», dedi ýnıversıtet ókilderi.
Ýnıversıtettiń basqarma tóraǵasy Qaırat Aıtýǵanovtyń aıtýynsha, birlesken ǵylymı jobanyń keleshekte maman daıarlaý jolynda paıdasy kóp. Aldaǵy ýaqytta atalǵan keshen sharýashylyqtarda óndiriske engizilip, qoıdyń sútin ýnıversıtet zerthanalarynda saraptamadan ótkizýmen qatar ónim retinde shyǵarylady.
Halyqaralyq mal sharýashylyǵy ǵylymı-zertteý ortalyǵy bul jobaǵa qyzyǵýshylyq tanytyp, Túrik yntymaqtastyq jáne úılestirý agenttigi qural-jabdyqtardy oqý ornyna aqysyz túrde berý jóninde sheshim qabyldady. Bul jabdyqty qurastyratyn túrik kompanııasy trenıng ótkizip, jyljymaly júıemen jumys isteýdi jáne alynatyn ónimder tehnologııasy boıynsha keńester berdi.